Němski zwjazkowy sejm so snano wutoru zeńdźe

Athen (dpa/SN/K). Zaso jónu steji Grjekska na rozpuću. Parlament ma wo třećim pomocnym a lutowanskim programje debatować a wothłosować. Dyrbjał-li ­wotum negatiwnje wuńć, móhło bjeze wšeho k nowólbam dóńć. Kóždy hłós je tuž prašany.

Předwidźane je wothłosowanje dźensa na pózdnim popołdnju. Wuzamknjene wšak njeje, zo dóńdźe k tomu hakle jutře w zažnych rańšich hodźinach. Kak wotum wupadnje, je absolutnje njewěste. Lěwe křidło Syrizy, knježaceje strony ministerskeho prezidenta Alexisa Tsiprasa, je hižo připowědźiło, zo rjeknje kaž dotal tež tónkróć „ně“. Dyrbjała-li rata přihłosowanja z lěhwa knježerstwa pod kritiskej hódnotu 120 hłosow wostać, měło so z dočasnymi nowowólbami ličić. Móžno wězo je, zo znowa opozicija premierej Tsiprasej trěbnu wjetšinu zawěsći.