Nětko su financni ministrojo europasma na rjedźe

Athen/Brüssel (dpa/SN/K). Dlěje hač 24 hodźin je grjekski parlament wo wu měnjenjach za třeći pomocny paket 86 miliardow eurow horco diskutował, doniž njewupraji so wjetšina zapósłancow za to, zwoprawdźić za poskićenu pomoc rigorozne naprawy lutowanja.

Ministerski prezident Alexis Tsipras bě naležnje napominał, zrěčenje z wěrićelemi schwalić, zo móhli „přežiwjenje kraja“ zawěsćić. 222 zapósłancow je reformowemu programej přihłosowało, 64 jón wotpokazało a jědnaćo so hłosa wzdali. Znowa je premier Tsipras za schwalenje žadanych naprawow podpěru opozicije trjebał. Dokelž pak wón znowa wjetšinu hłosow ze swójskeho lěhwa Syrizy dóstał njebě, je prawdźepodobne, zo staji wón k datej składnosći prašenje dowěry. Z kruhow knježerstwa je słyšeć, zo móhło so to wokoło 20. awgusta stać – tón dźeń dyrbi Grjekska Europskej centralnej bance (EZB) 3,2 miliardy eurow wróćić.