Wotchilency w uniji su za kanclerku mjerzacy zjaw

Berlin (dpa/SN/K). Hižo druhi raz je zwjazkowy sejm lěćnu přestawku přetorhnyć a na wurjadnym schadźowanju z Grjekskej so zaběrać dyrbjał. Na programje měješe třeći pomocny paket wot bankrota wohroženemu krajej we wysokosći 86 miliardow eurow. Po wočakowanju je wjetšina zapósłancow z wosobinskim wothłosowanjom „haj“ za to dała, Grjekskej financielnje znowa pod pažu přimnyć. Zapósłancy sobuknježaceje SPD su jednomyslnje přihłosowali kaž tež opozicionelni Zeleni. Lěwica wupraji so zhromadnje přećiwo tomu kaž tohorunja dźesatki zapósłancow unije, štož wšak je za kanclerku Angelu Merkel (CDU) chětro bolostny zjaw. Zwjazkowy minister za financy Wolfgang Schäuble (CDU) bě w knježerstwowym wozjewjenju naležnje za to rěčał, třećemu pomocnemu paketej z wuchowanskeho krywa eura ESM přihłosować. To je w „zajimje Grjekskeje kaž tež w zajimje Europy“, wón podšmórny. Grjeksku wón napomni, přilubjene reformy tež zwoprawdźić. Zdobom minister přizna, zo je tójšto woprawnjenych wobmyslenjow přećiwo nowej pomocy.