Parlament Europskeje unije wothłosuje wo rozdźělenju 120 000 ćěkancow
Pirna/Brüssel/Zagreb (dpa/SN/K). Sakska je dalšu hraničnu kontrolu zarjadowała. Na awtodróze A 17, hłownej wobchadnej čarje mjez Němskej a Čěskej, potrjechi to na přechodźe blisko Bad Gottleuby-Berggießhübela wosobowe a nakładne jězdźidła kaž tež pěškow. Kontrolowali běchu dotal hižo w Oberwiesenthalu a Marienbergu. Na A 4 njejsu při pólskich hranicach tuchwilu žane kontrole předwidźane, praji rěčnik zwjazkoweje policije w Pirnje.
Po tym zo je Madźarska hranicu k Serbiskej dospołnje zawrěła a wčera na přechodźe Röszke ze sylzopłunom přećiwo płót kóncowacym a kamjenje mjetacym ćěkancam postupowała a 17 z nich zajała, spyta so dale a wjace migrantow přez Chorwatsku na zapad. Dotal je hižo něhdźe 5 400 ćěkancow do kraja přišło, rozprawja zjawnoprawniski telewizijny sćelak HRT. Na wšěch 4 000 dalšich tam w přichodnych dnjach wočakuja. Dźensa rano su 800 migrantow z Tovarnika při serbiskej hranicy z ćahom do Dugo Sela wuchodnje Zagreba dowjezli. Tam chcychu jich najprjedy raz w prěnjej přijimarni zaměstnić.