Heiner Geißler šwika CSU a namjetuje Merkel za Nobelowe myto

Berlin (dpa/SN/K). Čorno-čerwjene zwjazkowe knježerstwo je na swojim dźensnišim zeńdźenju koncept wobje­d­nało, z kotrymž wotmysli wone w naležnosći migrantskeje krizy hić do ofensiwy – mjenujcy z porjadnym zrjadowanjom nawala ćěkancow. Tak zarjaduja w zarjedźe kanclerki wosebity stab „migrantska politika“. Šefa zarjada Petera Alt­meiera (CDU) powoła kanclerka za cyłkowneho koordinatora.

Tutu naprawu hódnoći Spiegel Online jako „plistu“ nutřkownemu ministrej Thomasej de Maizièrej (CDU) a zastupnik Zelenych samo jako toho „degradowanje“. Z kruhow knježerstwa wšak rěka, zo njeńdźe wo to, ministra zesłabić, zaměr bywa, jemu trochu ćežkeho brěmja wotewzać. Hač na dalše změje kóžde schadźowanje kabineta dypk „ćěkancy“ na dnjowym porjedźe.