Słowjenska najćešo potrjechena – dóstanje policajsku pomoc
Brüssel/Berlin/Ljubljana (dpa/SN/K). Migraciska kriza – abo nowočasne ćahanje ludow, kaž je wona swojich rozměrow dla tohorunja mjenowana – je dźensa Europski parlament w Brüsselu zaběrała. Z wuradźowanjow, na kotrychž so tež prezident komisije Europskeje unije Jean-Claude Juncker a prezident Rady EU Donald Tusk wobdźělištaj, wuńdźe na knježerstwa 28 statow zhromadźenstwa a někotrych afriskich krajow naležne žadanje za dorěčanym zhromadnym postupowanjom, zo bychu krizu a jeje sćěhi zmištrowali. Bayerski ministerski prezident Horst Seehofer (CSU) je kanclerku Angelu Merkel (CDU) namołwił, rěčeć nablaku z awstriskim knježerstwom nastupajo njekoordinowany přiwal migrantow přez hranicy kraja do Bayerskeje. Bě dźě telefonat mjez woběmaj šefomaj knježerstwow politiku wotewrjenych hranicow zahajił, Seehofer argumentuje.