Tusk žada sej wjetšu nawodnu rólu Němskeje

Berlin (dpa/SN/K). Tuchwilu njełamaja sej němscy politikarjo po zdaću hłowu přejara wo tym, kak migracisku krizu docyła zmištrować, skerje bóle tohodla, kak ze Syričanami wobchadźeć. Namjet zwjaz- koweho nutřkowneho ministra Thomasa de Maizièra (CDU), jim jenož hišće wobmjezowany škit poskićić, bě w uniji samej, hłownje pak mjez njej a SPD njemału wadźeńcu načinił.

Do dźensnišeho schadźowanja frakcije unije je so kanclerka Angela Merkel (CDU) słowa jimała a w zajimje spěšneho dojednanja měniła, wony tak mjenowany subsidiarny škit Syričanam z wobmjezowanym prawom přićehnjenja swójbnych płaći jeno za mały dźěl ćěkancow. Wokomiknje je prašenje wažniše, hač přichodnje wo škitnym statusu Syričanow njerozsudźić hakle po ertnym słuchanju na nich, rjekny Merkel wčera w Schwerinje. Po změnje kursa w nowembru 2014 dóstawaja Syričenjo bjez kóždehožkuli indiwiduelneho přepruwowanja škit jako ćěkancy po Genfskej konwenciji a tak prawo na dlěši přebytk kaž tež na přićehnjenje swójbnych.