Kriza žada sej nowy poměr EU k afriskim statam
Valletta (dpa/SN/K). W stolicy Malty kónči so dźensa dwaj dnjej trajacy wjeršk Europskeje unije a 35 afriskich statow. Jeho wuslědk ma być zhromadny akcijny plan k zmištrowanju migraciskeje krizy.
Po słowach němskeje zwjazkoweje kanclerki Angele Merkel (CDU) akcijny plan afriske knježerstwa k tomu zawjazuje, mjez druhim „wobchadźeć ze swojej ludnosću tak, zo skići so młodźinje kontinenta šansa za lěpše žiwjenje“. EU Afričanam připraja, zo budźe spěchować legalne připućowanje. Přilubja tohorunja wuwićowu pomoc, zo móhli afriske staty skutkownišo chudobu a bjezdźěłnosć přewinyć, jednu z přičin ćěkanja ludźi. Podpěru maja wone nic naposledk za to dóstać, zo přiwozmu wotpokazanych próstwarjow wo azyl.