Budyšin (SN/at). Wo aktualnym skutkowanju krajneho dźěłoweho zjednoćenstwa Serbska lěwica je so předsydstwo Budyskeho wokrjesneho zwjazka Lěwicy na swojim wčerawšim wuradźowanju w sprjewinym měsće wobhoniło. Wo­krjesna předsydka, zapósłanča Sakskeho krajneho sejma Marion Junge, podšmórny, zo njeje wokrjesny zwjazk ze swojimi namjetami k mjeńšinowej politice strony na lětušim zjězdźe w Neukieritzschu wjetšinu delegatow přeswědčić móhł. Wona pak zwěsći, „zo su w druhich wo­krjesnych zwjazkach wo tym rozmyslować započeli“. Za problematiske Junge ma, zo Zhorjelski wokrjesny zwjazk namjety Budyskeho k tomu wotpokazuje. Najebać to chcedźa so Budyscy towaršojo ze Zhorjelskimi rozmołwjeć, wšako přisłuša kónčina sewjerneho Zhorjelskeho wo­krjesa serbskemu sydlenskemu rumej. Njewěda wo Serbach tole sobu haći.