Awstriski premier hrozy njesolidarnym čłonam EU
Brüssel (dpa/K/SN). Migraciskeje krizy dla wotměwa so dźensa a jutře w belgiskej stolicy dalši wjeršk 28 šefow statow a knježerstwow krajow Europskeje unije. Jednore schadźowanje tónkróć z wěstosću njeje, dokelž stej so nastupajo rozdźělowanje přichadźacych ćěkancow w Europje mjeztym dwě wšelakorej poziciji wujewiłoj. Tak su předewšěm kraje Visegrádskeje štyrki (V4) – Čěska, Słowakska, Pólska a Madźarska – zasadnje přećiwo postajenej kwoće. Pólska so nimo toho raznje tomu spjećuje, zo ma so hranicy škitaca agentura Frontex personelnje rozšěrić tež přećiwo woli potrjechenych statow, widźo w tym wobmjezowanje swojeje statneje suwerenity.