Berlin (dpa/K/SN). Migraciska kriza wostawa dominowaca tema w Němskej. Šef frakcije unije Volker Kauder (CDU) je pominał,­ z kursom kanclerki sćerpnosć měć. Trjeba je zwoprawdźić to, štož bu dotal wobzamknjene, rjekny wón rano w telewizijnym sćelaku ZDF. W zwjazkowym sejmje wobsteji zhromadny zaměr, ličby ćěkancow wuznamnje pomjeńšić. „Nětko dyrbimy kanclerce za to dać čas a podpěru – a měć z njej trochu sćerpnosće.“ Wudawanje předsydy SPD Sigmara Gabriela, k čujomnemu wobmjezowanju nawala ćěkancow ma wona chwile najdlěje hač do pózdnjeho nalěća, a přibě­racych kritiskich zwukow ze stron koaliciskeho partnera dla njewidźi Kauder eksistencu­ koalicije za wohroženu. Wobzamknjenje, sewjeroafriske staty kaž Algerisku a Marokko zastopnjować jako wěste pochadne kraje, je zhromadny rozsud. A někotre namjety čini SPD dźiwajo na wólbny bój. „15 procentow to boli“, praji Kauder hladajo na wuslědki woprašowanja do měrcowskich wólbow Badensko-württembergskeho krajneho sejma.