Rada za serbske naležnosće Sakskeje je so dźensa w Drježdźanach schadźowała. Na wuradźowanju wobdźěli so tež sakska ministerka za wědomosć a wuměłstwo dr. Eva-Maria Stange (SPD).
Drježdźany (SN/MkWj). Wukubłanje serbskich wučerjow bě jedne z ćežišćow dźensnišeho „intensiwneho a nadrobneho wuradźowanja“ z ministerku Stange. To rjekny předsydka serbskeje rady, zapósłanča CDU w zwjazkowym sejmje Marja Michałkowa, našemu wječornikej.
Ministerka Eva-Maria Stange skedźbni na to, zo měli Serbja w prěnim rjedźe sami za dorostom serbskich pedagogow pytać. Přiwšěm je Sakska z uniwersitami wotpowědne zaměrowe zrěčenje wotzamknyła. Kultusowe ministerstwo je wuličiło, zo trjebaja serbske šule přichodne lěta hač do 70 nowych wučerkow a wučerjow, z toho znajmjeńša 37 maćernorěčnych. Praktisce to woznamjenja, zo dyrbjało kóžde lěto dźesać serbskich wučerjow z uniwersitow přińć. Kaž ministerka za wědomosć a wuměłstwo připowědźi, chcyła sej přichodny čas wukubłanje serbskich wučerjow wosobinsce wobhladać, dokelž ma to za jara wažne.