Wo zajědojćenje Nawalneho a přichodźe płunowoda Nord Stream 2 šło
Berlin/Drježdźany (dpa/SN). Sakski ministerski prezident Michael Kretschmer (CDU) je so w padźe zajědojćeneho ruskeho opoziciskeho politikarja Alekseja Nawalneho jasnje přećiwo tomu wuprajił, twar nimale hotoweho płunowoda Nord Stream 2 z Ruskeje do Němskeje přetorhnyć. „To je dospołnje wopačna kročel“, rjekny Kretschmer we wčerawšim wusyłanju telewizije ARD „Bericht aus Berlin“. Sakski premier w tym zwisku na to skedźbni, zo bě dodawanje surowiznow z Ruskeje do Němskeje samo w časach zymneje wójny stajnje zaručene.
Podobnje argumentowaše jednaćel wuchodneho wuběrka Němskeho hospodarstwa Michael Harms. W samsnym sćelaku pokaza wón na to, zo wobsteja mjeztym 50 lět „absolutnje spušćomne energijowe styki k Ruskej. Tež w najćešich politiskich dobach smy so na nje dźerželi. To tež tónkróć poručam.“