Budyšin (SN/at). Na 13. generalnu zhromadźiznu w Budyšinje wočakuje Europska swobodna alianca (EFA) něhdźe 150 wobdźělnikow z 18 krajow. Schadźowanišćo budźe jutře a sobotu dopołdnja hotel Best Western Plus. Jako hosćićel je Łužiska alianca zarjadowanje wobsahowje sobu přihotowała.
Zastupjerjo 45 čłonskich stron a kandidatow za čłonstwo EFA wěnuja so pod hesłom „Běchmy, smy, budźemy“ prócowanjam Serbow, zachować sej maćeršćinu a kulturnu identitu. Prašenja samopostajowanja hraja runje tak rólu kaž kulturna a ekologiska doraznosć město ničenja žiwjenskeho ruma mjeńšiny přez wudobywanje brunicy. Debata wo trěbnosći Serbskeho sejmika ma po zahajenju schadźowanja jutře dopołdnja w srjedźišću stać. Po zdźělenju zarjadowarjow chcedźa w tym zwisku program k łužiskej regionalnej politice wozjewić.