Kandidat požadanje krótkodobnje cofnył
Budyšin (SN/JaW). Załožba za serbski lud njezměje wot 1. januara 2016 noweho direktora, městno je dale wakantne. To zdźěli wčera nowy předsyda jeje rady Jan Budar žurnalistam. „Smy dołho wo naležnosći rěčeli. Žadyn z kandidatow njezamó trěbnu wjetšinu dweju třećinow za sebje zjednoćić, z čimž je zarjadniske jednanje bjez wuslědka zakónčene“, Budar rozłoži. Załožbowa rada tuž wobzamkny, městno k 1. julijej 2016 znowa wupisać. Wutworić ma so komisija, kotraž aktiwnje za kandidatami pyta. Tuchwilneho direktora załožby Marka Sucheho chcedźa so prašeć, hač swoje zrěčenje wo poł lěta podlěši.