FDP chce žurlu wopušćić

Mittwoch, 04. März 2020 geschrieben von:

Erfurt (dpa/SN). Frakcija FDP w Durinskim krajnym sejmje chcyše při dźensnišich wólbach ministerskeho prezidenta plenarnu žurlu wopušćić a tak demonstrować, zo politikarja Lěwicy Boda Ramelowa kaž tež šefa frakcije AfD Björna Höcku jako móžneho ministerskeho prezidenta kraja wotpokazuje. „Štóž chcył dokumentować, zo žanoho z wobeju nochce, njesmě so na wólbach wobdźělić“, rěčnik durinskeje frakcije FDP Thomas Philipp Reiter wčera argumentowaše, skedźbnjejo na to, zo njeje na wólbnym lisćiku žane „ně“ předwidźane. „Hłosa so wzdać njeje žane ně.“ Po jeho słowach je frakcija wobzamknyła ze žurle wućahnyć, dołhož so woli. Frakcija FDP ma pjeć zapósłancow w durinskim sejmje. Jedyn z nich je amtěrowacy minis­terski prezident Thomas Kemmerich. 55lětneho běchu 5. februara z hłosami AfD, CDU a FDP wolili. Zjawneho ćišća dla je wón tři dny po tym wotstupił.

Röttgen: Pólskej so přiwobroćić

Mittwoch, 04. März 2020 geschrieben von:

Paris (dpa/SN). Němska a Francoska dyrbjałoj so po słowach wonkowneho politikarja CDU Norberta Röttgena zhromadnje Pólskej přiwobroćić, zo by so jednota Europy skrućiła. Pólska móhła so najebać rozdźělne měnjenja z „centralnym akterom w Europje stać“, rjekny Röttgen na zarjadowanju Pariskeho slědźenišća za strategiske studije Institut Montaigne. Bywši zwjazkowy minister za wobswět je jedyn z kandidatow za předsydu CDU.

Waršawa a EU so pólskeje justicneje reformy dla wadźitej. Zakoń wo disciplinowanju sudnikow bě mjezynarodnu kritiku zbudźił. Francoski prezident Emmanuel Macron bě Pólsku hakle minjeny měsac wopytał. Kaž Röttgen rjekny, je „zwjazanosće Europy dla wažne, zo nětko k nutřkownej zwadźe njedóńdźe“.

Norbert Röttgen ma wodźacej europskej krajej Němsku a Francosku tež w prašenju europskeje wonkowneje politiki w zamołwitosći. Zhromadnje z Wulkej Britaniskej, kotraž wšak je z EU wustupiła, měli wonkownu politiku wothłosować, kotraž je druhim krajam wotewrjena.

Klimu ze zakonjom škitać

Mittwoch, 04. März 2020 geschrieben von:

Komisija EU naćisk za neutralnu Europu 2050 předpołožiła

Brüssel (dpa/SN). Po puću ke „klimoneutralnej“ Europje hač do lěta 2050 žada sej komisija EU wjace połnomocy. Tak chcył Brüsselski zarjad prawo měć, etapowe zaměry, pomjeńšić wustork klimje škodźacych płunow, po lěće 2030 prawidłownje přiwótřić. To wuchadźa po informacijach powěsćernje dpa z najnowšeho naćiska klimoweho zakonja EU. Naćisk chcychu dźensa w Brüsselu zjawnosći předstajić. Zeleni běchu dokument hižo do toho kritizowali.

Zakoń ma wot Europskeje unije wobzamknjeny zaměr klimoweje neutrality hač do lěta 2050 za wšitkich zawjazujcy zakótwić. Měnjene je, zo so potom žane klimje škodźace parnišćowe płuny z EU do atmosfery njedóstanu. Za to ma so najwjace emisijow zalutować a zbytk narunać, na přikład ze sadźenjom štomow abo ze składowanjom škódnych maćiznow. W tym zwisku planuja wobšěrny přetwar hospodarstwa a dospołny kónc wolija, wuhla kaž tež płuna.

Přistaw so njetepi

Mittwoch, 04. März 2020 geschrieben von:
Wšěm dwělowarjam praju: Perspektiwa nakładnistwow njejeje hubjeńša, dokelž su zarjadowarjo Lipšćanske knižne wiki, zarjadowani Lipsk čita a Manga-Comic-Con corona-wirusa dla wotprajili. Podkładuju swoje měnjenje z wobrazom. Lětsa mějachu w srjedźišću wikow stać kraje něhdyšeje Juhosłowjanskeje. Wulki přistaw, z knihow twarjeny, měješe centralne městno zetkanjow a čitanjow być. Štóž so z twarstwom přistawow wuznawa, tón wě, zo so jeho murje po jednym dyru njesypnu. Na kóncu dźě smy jako čitarjo zamołwići za dalewobstaće nakładnistwow. Je na nami, wudźěłki awtorow čitać. Je tuž prawje, zo chcedźa łužiske nakładnistwa, mjez kotrymiž je tež Ludowe nakładnistwo Domowina, kotrež běchu na Lipsk přihotowane, připowědźenu nowinarsku konferencu přewjesć. A nadźijam so, zo móžemy balkanski přistaw na klětušich knižnych wikach w Lipsku dožiwić. Milenka Rječcyna

Planuja čaru mjez stolicomaj

Mittwoch, 04. März 2020 geschrieben von:

Drježdźany (dpa/SN). Nowa železniska čara mjez Němskej a Čěskej ma jězbny čas mjez stolicomaj wobeju krajow wuraznje skrótšić. Za to planuja perspektiwiski zwisk zwonka połobskeho doła z cyłkownje 26 kilometrow dołhim pomjeznym tunlom. By to najdlěši železniski tunl Němskeje był. Póndźelu su zastupnicy Čěskeje a Němskeje za to w Drježdźanach wotpowědnu deklaraciju podpisali. Za jězbu ze sakskeje stolicy do Prahi njebudźe ćah po dotwarje čary wjace hač hodźinu trjebać, tuchwilu je to połdra hodźiny wjace. „Europa hromadu rosće“, wuzběhny za infrastrukturu zamołwity wotrjadnik Němskeje železnicy Roland Pofalla w swojim stejišću a mjenowaše projekt jara naročny.

Tuchwilu přewjeduja proceduru za rjadowanje krajiny z wjacorymi móžnosćemi čary. Wo kóštach dotal ničo znate njeje. Fachowcy z toho wuchadźeja, zo budźe projekt najzašo za dwaceći lět hotowy. Wobydlerjo a zwjazki maja hišće hač do pjatka składnosć, swoje wobmyslenja zapodać. Sakski ministerski prezident Michael Kretschmer (CDU) rěčeše wo „projekće lětstotka“.

To a tamne (04.03.20)

Mittwoch, 04. März 2020 geschrieben von:

Wohnjowemu wobornikej z belgiskeje gmejny Kaprijke je po puću k zasadźenju zawěsće wutroba stejo wostała. Najprjedy bu jeničce informowany, zo so na Rysselhofskej dróze pali. Čisło domu njebě podate. Čim bóle pak so z hašenskim jězdźidłom městnosći bližeše, ćim wěsćiši sej Patrick Goossens bě, zo jědu k jeho domej. Susod bě wohenja dla nuzowe čisło wolił. Po štyrjoch hodźinach běchu płomjenja skónčnje zhašane.

Paduchaj staj w Moskwje před kupnicu 20 tonow butry w hódnoće wjac hač 100 000 eurow z nakładneho awta spakosćiłoj. Šofera awta a sobujěduceju bě­štaj do druheho nuzowałoj a staj jich w lěsu wusadźiłoj. Jako so šofer na městno njeskutka nawróći, drje tam Lkw hišće steješe, ale butra bě fuk. Policija je ju w druhim awće našła, što pak měještaj paduchaj z njej planowane, wostanje potajnstwo.

Von der Leyen w Grjekskej

Dienstag, 03. März 2020 geschrieben von:

Orestiada (dpa/SN). Napjateho połoženja při grjeksko-turkowskej mjezy dla su wodźacy zastupnicy Europskeje unije dźensa namjezne městačko Orestiada wopytali. Na sewjerowuchodźe Grjekskeje chcychu so prezidentka komisije EU Ursula von der Leyen, šef Rady EU Charles Michel a prezident Europskeho parlamenta David Sassoli wo połoženju wobhonić. Turkowski prezident Recep Tayyip Erdoğan bě sobotu připowědźił, zo je Turkowska mjezy wotewrěła. Na to poda so tójšto migrantow na puć do EU.

Netanjahu wólby dobył

Jerusalem (dpa/SN). Konserwatiwna strona Likud ministerskeho prezidenta Benjamina Netanjahuwa je z třećich wólbow parlamenta w běhu lěta w Israelu jako najsylniša móc wušła. Před wyskacymi přiwisnikami w Tel Avivje rěčeše 70lětny minjenu nóc wo „hoberskim dobyću“. Netanjahu je sej ze swojej stronu Likud 37 mandatow zdobył, jeho wužadar Benny Gantz 34. Hač móže tak nowe knježerstwo wutworić, pak dawno hišće wěste njeje.

Buttigieg podpěruje Bidena

Policisća wotwjedźetaj zajateho podhladneho w Berlinskim měšćanskim dźělu Srjedźa. We wobłuku cyłoněmskeje racije přećiwo vietnamskej cwólbje wikowarjow ludźi su dźensa rano tež wšelake objekty w zwjazkowej stolicy přepytali a wjacore wosoby zajeli. Cwólba je podhladna, zo je krajanow z falšowanymi dokumentami do Němskeje přiwjezła. Foto: dpa/Paul Zinken

Prěni zaryw hišće w měrcu

Dienstag, 03. März 2020 geschrieben von:
Grünheide/Podstupim (dpa/SN). Braniborski hospodarski minister Jörg Steinbach (SPD) wočakuje, zo twarc elektroawtow z USA Tesla hišće w měrcu započnje swoju nowu fabriku w Grünheidźe pola Berlina twarić. W druhej połojcy měsaca liča z prěnim zarywom, hospodarske ministerstwo­ w Podstupimje powěsćerni dpa potwjerdźi. Nowiny běchu jako prěnje wo tym rozprawjeli. Dočasny zazběh projekta je móžny, byrnjež hišće wšitke dowolnosće njepředleželi. Hač do štwórtka móža ludźo hišće swoje wobmyslenja přećiwo projektej krajnemu zarjadej za wobswět w Podstupimje, gmejnskemu zarjadej w Grünheidźe a we wokolnych komunach zapodać. 18. měrca chcedźa po dotalnym planowanju wo zapodaćach wuradźować. „Hač do lěća měła do­skónčna twarska dowolnosć předležeć. Potom liča hišće raz ze skóržbami přećiwo tworni.

Nuzne zetkanje

Dienstag, 03. März 2020 geschrieben von:

Istanbul (dpa/SN). Hladajo na eskalaciju wobrónjeneho rozestajenja mjez turkowskim a syriskim wójskom na sewjeru Syriskeje chcetaj so prezident Recep Tayyip Erdoğan a ruski prezident Wladimir Putin­ zajutřišim, štwórtk, w Moskwje zetkać. To je Erdoğan w narěči w Ankarje připowědźił. Wón nadźija so přiměra abo druheho rozrisanja, zo móhli po najspěšnišim puću „wuslědk docpěć“.

W Moskwje su planowane zetkanje mjeztym wobkrućili. Rěčnik Krjemla Dmitrij Pjeskow zdźěli powěsćerni Interfax, zo je Ruska wo rozmołwu prosyła. Tak dołho dyrbjała Turkowska z nowej wojerskej ofensiwu čakać.

Anzeige