Dalše wopory wohenja dla

Donnerstag, 10. September 2020 geschrieben von:

San Francisco (dpa/SN). Zahubne lěsne wohenje w Kaliforniskej su sej tři dalše smjertne wopory žadali. Wohnjowi wobornicy namakachu w powostankach wotpaleneho statoka we wobwodźe Butte County tři spalene ćěła, kotrež njemóžachu dotal hišće identifikować. Ličba smjertnych woporow w kónčinje North Complex Fire 300 kilometrow sewjernje San Francisca je tak na jědnaće rozrostła. Płomjenja su po informacijach wohnjoweje wobory 2 000 twarjenjow wobškodźili abo dospołnje zničili.

Chinscy studenća wupokazani

Washington (dpa/SN). Knježerstwo USA je wot junija wjace hač tysac chinskim studentam „narodnych wěstotnych přičin“ dla zakazało do kraja přińć. Zakład toho je wukaz prezidenta Donalda ­Trumpa z kónca meje. Wón chcył tomu zadźěwać, zo chinske wójsko studentow w USA za industrijnu a slědźensku spionažu zasadźa. Rěčnica ameriskeho wonkowneho ministerstwa na to skedźbni, zo jedna so jenož wo jara mału skupinu studowacych. „Legitimni studenća“ z Chiny su dale ­witani.

Dźeń a mjenje družin

Što nětko z ćěkancami?

Donnerstag, 10. September 2020 geschrieben von:

Drježdźany (dpa/SN). Sakska statna ministerka za europske naležnosće Katja Meier (Zeleni) je zwjazkowe knježerstwo namołwjała, ćěkancam na grjekskej kupje Lesbos pomhać. „Grjekska trjeba nětko nu­znje pomoc tamnych čłonskich statow EU“, rjekny Meier dźensa na kromje konferency ministrow za Europu w Posaarskej. Zwjazkowe knježerstwo dyrbjało po zahubnym wohenju w lěhwje ćěkancow Moria spěšnje technisku a humanitarnu pomoc poskićić a potrjechenym zmóžnić do Němskeje přińć.

Sakska ministerka za integraciju Petra Köpping (SPD) praji, zo dyrbjał Zwjazk nětko nuznje swój kontingent ćěkancow rozšěrić abo krajam składnosć dać, swójski program přiwzaća ćěkancow zwoprawdźić. „Jako swobodny stat bychmy k tomu kmani byli, tež sakske komuny kaž Lipsk bychu zwólniwe byli“, zwurazni Köpping w Drježdźanach. Lěhwo Moria z 12 600 ćěkancami bě so w nocy na srjedu nimale dospołnje wotpaliło.

Swinjaca mrětwa Němsku docpěła

Donnerstag, 10. September 2020 geschrieben von:

Podstupim (dpa/SN). Afriska swinjaca mrětwa je prěni króć w Němskej dopokazana. Chorosć běchu pola zahinjeneho dźiwjeho swinjeća blisko pólskeje mjezy we wokrjesu Sprjewja-Nysa zwěsćili, kaž zwjazkowa ratarska ministerka Julia Klöckner (CDU) dźensa w Berlinje zdźěli. „Podhlad je so bohužel jako prawy wopokazał.“ Do toho bě Friedricha Löfflerowy institut na kupje Riems w Baltiskim morju wobkrućił, zo jedna so woprawdźe wo afrisku swinjacu mrětwu. „Mrětwa njeje za čłowjeka strašna“, Klöckner rjekny, „za dźiwje kaž tež za domjace swinje porno tomu je smjertna.“

Krajne a komunalne krizowe centrumy swoje plany w padźe wudyrjenja mrětwy mjeztym aktiwizuja a naprawy přihotuja. Wudyrjenje mrětwy móhło masiwne hospodarske sćěhi za plahowarjow swini měć. Tak móhł eksport swinjaceho mjasa do krajow zwonka Europskeje unije, na přikład do Azije, wotpadnyć. Za eksport do Chiny je wobkrućenje trěbne, zo njeje Němska wot swinjaceje mrětwy potrjechena.

„To njeje dróha, to je lud“

Donnerstag, 10. September 2020 geschrieben von:

Lawreatka literarneho Nobeloweho myta namołwja do rozmołwow

Minsk (dpa/SN). Hladajo na dale trajace protesty w Běłoruskej je lawreatka Literarneho Nobeloweho myta Swjetlana Aleksijewič amtěrowaceho prezidenta Aleksandera Lukašenka namołwjała z wobydlerjemi so rozmołwjeć. „Lukašenko praji, zo njebudźe z dróhu rěčeć. Ale dróha – to su statysacy ludźi, kotřiž kóždu njedźelu a kóždy dźeń na dróhu du“, wuswětla 72lětna spisowaćelka we wčera wozjewjenej zdźělence běłoruskeho PEN-centruma w Minsku. „To njeje dróha, to je lud.“

To a tamne (10.09.20)

Donnerstag, 10. September 2020 geschrieben von:

Dospołnje wopiłoj stej so dwě starušce w spěšniku ICE z Berlina, zo skónčnje na chódbje ležeštej. Sanitetarjo a policisća wzachu jeju w Hannoveru z ćaha. Test wunjese pola 72lětneje Mnichowčanki štyri promile, jeje 75lětna přewodnica z Gütersloha měješe přeco hišće tři. Dokelž nochcyštej na žadyn pad do chorownje, dyrbještej do dweju celow policaj­skeje straže. Po šěsć hodźinach spara je so jimaj zaso widźomnje lěpje šło. Přičina žlokańcy njeje přiwšěm znata.

Ćelo z kupanskeho basenka wuswobodźili su wohnjowi wobornicy w městačku Tann njedaloko hessenskeho Fulda. Skoćo bě zakryće poola za krutu podłohu měło a so přełamało. Wobydlerjo domu słyšachu njezwučene zwuki a alarmowachu wohnjowych wobornikow. Tući wulki dźěl wody wuklumpachu a ćelo wućahnychu, kotrež bě z pastwy ćeknyło.

Čěski dostojnik Serbow wopytał

Mittwoch, 09. September 2020 geschrieben von:
Praski arcybiskop kardinal Dominik Duka (3. měšnik wotlěwa) je tele dny Serbow we Łu­žicy wopytał. Wčera wobdźěli so dostojnik na prěnim putnikowanju Serbow za čas koronapandemije, na Marije naroda w Róžeńće (na foće). Wčera dopołdnja wopyta 77lětny ze swojim přewodom Domowinu. Nimo předsydy třěšneho zwjazka Dawida Statnika witaše najwyšeho katolskeho duchowneho Čěskeje w Budyskim Serbskim domje­ tež předsyda Towarstwa Cyrila a Metoda Jurij Špitank. W rozmołwje wuzběhny kardinal mnohe zhromadnosće Čechow a Serbow. Duka zapisa so tohorunja do hóstneje knihi Domowiny. Na třidnjowskim wopyće Łužicy poby kardinal nimo toho w Ra­dworju, Ralbicach a Nuknicy, hdźež rozłožichu jemu twar kapałki. Foto: Rafael Ledźbor

Nowa hornja hranica wukazana

Mittwoch, 09. September 2020 geschrieben von:

London (dpa/SN). Reagujo na přiběrace ličby koronainfekcijow njesmě so w Jendźelskej wjace hač šěsć wosobow zetkawać. Nowa hornja hranica płaći wot přichodneje póndźele, a to za zetkawanja w domjacnosćach a w zjawnosći, kaž wjacore britiske medije rozprawjeja. Dotal wučinješe hranica 30 ludźi. Z wukaza wuwzate su domjacnosće z wjace hač šěsć wosobami, powołanske dźěło a wukubłanje, tež kwasy, pohrjeby a wšelake sportowe družiny.

Nadźijeja so informacijow

Minsk (dpa/SN). Po zajeću Marije Kolesnikoweje w Běłoruskej dotal njewědźa, hdźe politikarka opozicije je. Tuchwilu šěrja tam informacije, po kotrychž je ­wona na juhu kraja w jatbje. Oficialne wobkrućenja pak nimaja, jeje mustwo zdźěli. Tež prawiznicy politikarki nje­wědźa, hdźe Marija Kolesnikowa wokomiknje přebywa. „Apelujemy na zamołwitych w Běłoruskej, nam to zdźělić“, ­rěka w zdźělence aktiwistow.

Wohnjowi wobornicy so zranili

Ćěkancy a migranća wopušćeja lěhwo ćěkancow Moria na grjekskej kupje Lesbos, kotrež bě so minjenu nóc nimale dospołnje wotpaliło. Wčera wječor běchu tam wjacore, drje wotpohladnje zamiškrjene wohenje wudyrili. Lěhwo – najwjetše po wšej ­Europje – bě z něhdźe 12 600 ćěkancami dospołnje přepjelnjene. Wone ma městno za runje 2 800 ludźi. Minjeny tydźeń su je pod ­karantenu stajili, po tym zo běchu 35 padow korony zwěsćili. Na to bě tam k njeměram dóšło. Foto: dpa/Elias Marcou

Warnuja před kóncom płunowoda

Mittwoch, 09. September 2020 geschrieben von:
Berlin (dpa/SN). Němske hospodarstwom před tym warnuje, nimale dokónčeny projekt płunowoda Nord Stream 2 přetorhnyć. Wuchodnemu wuběrkej němskeho hospodarstwa je „dospołnje jasne“, zo maja so atentat na kritikarja ruskeho knježerstwa Alekseja Nawalneho wujasnić a zamołwići za to chłostać. „Nimamy pak za woprawnjene z hospodarskimi sankcijemi reagować, kotrež dospołnje njewobdźělene europske předewzaća a ruske wobydlerstwo trjechja“, rjekny předsyda wuběrka Oliver Harms powěsćerni dpa. „Tajke projekty njemóžeš wotpowědujo runje knježacej politiskej naledźe wotpinyć abo zapinyć.“

Kubłaja fachowcow za wottwar

Mittwoch, 09. September 2020 geschrieben von:
Lubmin/Lubnjow (dpa/SN). Wosebite wukubłanje fachowcow za spotorhanje jadrowych a wuhlowych milinarnjow planuje Industrijna a wikowanska komora w Neubrandenburgu. Zajimcy za „fachowca za wottwar milinarnjow“ móža so wot 12. oktobra přizjewić. Kubłanski kurs traje dźewjeć měsacow. K tomu słušeja teorija a praktikumy pola wjacorych firmow w předpomorskim Lubminje, hdźež hižo wjele lět něhdy najwjetšu ­atomowu milinarnju NDR torhaja, kaž tež we łužiskim Lubnjowje. Wobdźělnikow chcedźa wukmanić, zo jadrowe a wuhlowe milinarnje w Němskej wěcywustojnje wottwarja a zrumuja.

Anzeige