Trumpej hrozy sćazanje

Montag, 25. März 2024 geschrieben von:
New York (dpa/SN). W sudniskim jednanju přećiwo Donaldej Trumpej wočakowachu dźensa wažnej rozsudaj: Bywši prezident měješe hač do dźensnišeho pjenježnu pokutu nimale 500 milionow dolarow jako kawciju zapłaćić. Tohorunja dźensa móhło sudnistwo w New Yorku nowy termin za chłostanske jednanje přećiwo Trumpej postajić, dokelž bě w zwisku z płaćenjom pjenjez mjelčenja hrajerce pornografiskich filmow pjenjezy wopak wotličił. W zwisku z wysokej kawciju móhło so stać, zo sudnistwo imobilije Trumpa sćaza. Tón so tomu ze swojimi prawiznikami wobara.

Baerbock na Bliskim wuchodźe

Montag, 25. März 2024 geschrieben von:

Kairo (dpa/SN). Wonkowna ministerka Annalena Baerbock (Zeleni) sej wot Israela a Hamas žada, zo so na časowje wobmjezowany přiměr dojednatej. „Jenož hnydomny humanitarny přiměr, kiž wjedźe k trajacemu měrej, nadźiju na měr dale wobchowa, za Palestinjanow kaž tež za Israelčanow“, rjekny politikarka Zelenych do swojeho wotlěta. Dźensa wočakowaše ju w egyptowskej stolicy Kairu wonkowny minister Samih Shukri. Po tym chcyše Baerbock dale do Israela lećeć. Wječor chcyše so wona z palestinskim prezidentom Mahmudom Abbasom a wonkownym ministrom Riadom Malkim w Ramallahu zetkać.

Baerbock žada sej wot Hamas, zo brónje hnydom złoži. Přiwšěm je sej Baerbock wěsta, zo njeje ryzy wojerske postupowanje přećiwo islamistiskej organizaciji wuspěšne. Runočasnje steji Němska kruće poboku Israela, wona rjekny.

Při jednanjach dźe wo přiměr na dobro palestinskich ciwilistow a wo pušćenje zastajencow, kotrychž bě Hamas 7. oktobra 2023 zawlekła.

Zaso wjace zajacow w Němskej

Montag, 25. März 2024 geschrieben von:

Populacija dołhowuchačow rozrostła – žiwjenski rum wohroženy

Berlin (dpa/SN). Wohrožene zajacy na polach su so w Němskej zaso widźomnje rozmnožili. W nalěću 2023 skakaše přerěznje 19 zajacow na kwadratny kilometer po polach, łukach a zahonach. „To je wjelelětny rekord“, zdźěli rěčnik Němskeho hońtwjerskeho zwjazka (DJV) Torsten Reinwald powěsćerni dpa. Je to najwyša ličba zajacow po zahajenju cyłoněm­skeho ličenja 2001. Předewšěm suche ­nalěćo 2023 je zajacam optimalne wuměnjenja za wothladanje dorosta skićiło. Nalěćo je najwažniša doba za dorost zajacow. Lěta 2022 běchu hajnicy po wšej Němskej hišće přerěznje 16 zwěrjatow na kwadratny kilometer zličili.

Woblubowany poskitk

Montag, 25. März 2024 geschrieben von:
Zašłu sobotu wotewrjena dožiwjenska wjeska „Karls“ w Döbelnje přićahowaše kónc tydźenja hižo mnoho ludźi a nje­změje zawěsće tež přichodnje ćeže hladajo na ličbu wopytowarjow. Bjez dźiwa! Hač stary abo młody – kóždy hori so za tutym wólnočasnym parkom, kotryž je na přikład znaty přez stejišćo Koserow na kupje Usedom. Z mjeztym pjatnatym městnom mamy tajki park tež skónčnje tu w bliskosći! Wón skići nimo kulinariskich a nakupowanskich tež dožiwjenske poskitki, mjez druhim husańcowu čaru abo kołbasowu ćiskawu. Dnjowa karta kwužiwanju atrakcijow wot dweju lět (abo 90 cm wulkosće) płaći w Sakskej 15 eurow, lětna karta 39,90 eurow. Dla wariěrowacych poskitkow na wšelakich stejnišćach je móžno, zo je tiket za druhe města tuńši abo tež dróši. Wosobinsce mam wulět do dožiwjenskeje wjeski na kóždy pad za wopyta hódny a hač sej naposledk tiket kupiš abo jednotliwje za atrakcije zapłaćiš, je ći wšako samo přewostajene. Anja Nowakowa

Pohanjo zymuz města wućěrili

Montag, 25. März 2024 geschrieben von:
Po starym pohanskim wašnju je skupinka w Budyšinje dźeń nalětnjeje runonócnosće woswjećiła. Srjedu su so před Serbskim gymnazijom zhromadźili, hdźež z drjewa a sucheje trawy spaslenu hadlenu do horšće wzachu. Wjesele harujcy ćehnjechu k Sprjewi. Tam sławjachu Jarowita a druhich słowjanskich bohow. Wjeršk bě, zo palacu hadlenu do Sprjewje ćisnychu. Nałožk wuhnawanja smjerće je tu z lěta 1522 znaty. Foto: priwatne

To a tamne (25.03.24)

Montag, 25. März 2024 geschrieben von:

Ze spektakularnej pućowanskej šćežku po swětoznatych skałach Blue Mountains zapadnje Sydneyja chcedźa dalšich turistow do tuteje kónčiny Awstralskeje nawabić. Nowy „Grand Cliff Top Walk“ je 19 kilometrow dołhi a je dźesać milionow awstralskich dolarow (šěsć milionow eurow) płaćił. Šćežka skići wopy­towarjam „nowu a na dyrdomdejach ­bohatu składnosć, so z přirodu zwjazać“, zamołwići za turizm zdźěleja.

Kradnjene cholowy woblečeny je so paduch do wobchoda w Bayerskim Coburgu nawróćił, w kotrymž bě cholowy hodźiny do toho spakosćił. Předawar muža spóznawši, jeho zadźerža a zawoła policiju. Hodźinu do toho bě 31lětny dwoje cholowy w kabinje wuspytał ale so z jenož z jednymi zaso nawróćił. Jeansowe cholowy za 140 eurow tykny wón do tity a so z nimi z wobchoda zminy.

Nowe jednanja wo přistup k EU

Freitag, 22. März 2024 geschrieben von:

Brüssel (dpa/SN). Europska unija je wobzamknyła, zahajić z Bosniskej-Hercegowinej jednanja wo přistup kraja k EU. Tole je prezident Rady EU Charles Michel po rozmołwach ze statnymi a knježerstwowymi šefami čłonskich krajow EU zdźělił. Prěnju konferencu wo přistupje chcedźa pak hakle organizować, hdyž je Bosniska-Hercegowina wuměnjenja spjelniła. K tomu słuša bój přećiwo korupciji a organizowanemu złóstnistwu w kraju.

Raketowy škit Němskeje twarić

Berlin (dpa/SN). Generalny inspektor zwjazkoweje wobory Carsten Breuer žada sej spěšny natwar rakety wotwobaraceje syće přećiwo móžnemu wohroženju ze stron Ruskeje. „Mamy pjeć do wosom lět chwile. W tymle času dyrbimy wotwobaranje raketow natwarić. To je bjez alternatiwy“, rjekny Breuer nowinarjam. Ruska móhła za pjeć do wosom lěta kmana być, wójnu přećiwo krajam NATO zahajić. „Hač do toho dyrbjała Němska přihotowana być, tajki nadpad wotwobarać.“

Unesco: Pitnu wodu škitać

Tramwajka Lipšćanskich wobchadnych zawodow přiwjeze wopytowarjow k lětušim Lipšćanskim knižnym wikam. Poprawom wobchadne zawody wot dźensnišeho ranja stawkuja. Jeničce linija 16, kotraž wjedźe tež na wiki, dale po 20 mjeńšinach jězdźi. Na lětušim zetkanju knižneje branše w Lipsku prezentuje so 2 000 wustajerjow ze 40 krajow. Foto: pa/dpa/Jan Woitas

Ruske rakety na wšu Ukrainu

Freitag, 22. März 2024 geschrieben von:

Saporiššija (dpa/SN). Při najćešich ruskich raketowych nadpadach minjenych měsacow na milinowe zastaranje Ukrainy su dźensa mjez druhim milinowód atomoweje milinarnje Saporiššija trjechili, zdźěla nawodnistwo wot ruskeho wójska wobsadźeneje milinarnje. Wěstota milinarnje je přiwšěm zaručena.

Powětrowy alarm knježeše minjenu nóc we wjacorych dźělach Ukrainy. Ruska bě po informacijach ukrainskeho wójska swoje rakety w strategiskich bombowcach typa TU-95 nad Kaspiskim morjom startowała. Pozdźišo zasadźichu tež balistiske rakety. Při tym měrjachu so Rusojo na Lwiw na zapadźe kraja runje tak kaž na Donjeck na wuchodźe, Charkiw a Sumy na sewjeru a Odessu a Mykolajiw na juhu. Oficialne ličby woporow a zranjenych rano hišće njepředležachu.

Konop wotnětka dowoleny

Freitag, 22. März 2024 geschrieben von:
Berlin (dpa/SN). Zwjazkowa rada, zastupnistwo wšitkich 16 zwjazkowych krajow, je dźensa w Berlinje dźělnemu legalizowanju cannabisa přihłosowała. Po tym je wot 1. apryla wobsydstwo a plahowanje tuteje drogi pod wěstymi wuměnjenjemi dowolene. Zwjazkowy sejm bě tomu hižo přihłosował. W Zwjazkowej radźe pak hrožeše předewzaće hišće zwrěšćić. Sakski ministerski prezident Michael Kretschmer (CDU) bě připowědźił, zo njebudźe legalizowanju přihłosować. Ministerski prezident Schleswigsko-Holsteinskeje Daniel Günther (CDU) ma tole za „njezmysł“. Policija a zwjazki lěkarjow běchu tohorunja přećiwo legalizowanju.

Serbska debata

Neuheiten LND