Günther: Suchota dale traje

Dienstag, 28. Juli 2020 geschrieben von:

Sakski ratarski minister chce přirodnym wužadanjam znapřećiwić

Drježdźany (dpa/SN). Mjeztym hižo něko­tre lěta trajaca suchota ze swojimi raznymi sćěhami – wusušenymi polemi, znižacym so stawom dnowneje wody, mrějacymi lěsami a horcymi městami – je sakskemu wobswětowemu ministrej Wolframej Güntherej wosebite wuža­da­nje. „Nimam suchotu za starosć, ale za nadawk“, rjekny politikar Zelenych w roz­mołwje z powěsćernju dpa. Jemu dźe wo to­, we wšěch wobłukach ze wšěmi wobdźělenymi problemy rozrisać, dokelž­ su wone „nowa woprawdźitosć“. Wotpowědnje alarmowace su ličby: Po informacijach wjedrarjow pobrachuje w Sakskej wot nowembra 2017 hač do lońšeho decembra 335 litrow dešća na kwadratny meter. Sewjerna a wuchodna Sakska stej wosebje suchej. Přerězny staw dnowneje wody bě w swobodnym staće kónc minjeneho lěta 40 centimetrow niši hač w přerězku lět wot 1989 do 2019. Hižo spočatk 2020 běchu w 30 procentach wšitkich rěkow niłku wodu registrowali. „Mamy spochi mjenje dešća, dale a wjace wódnišćow wusakuje. Tu mamy strukturny problem“, Günther wuzběhny.

Chaos wostanje

Dienstag, 28. Juli 2020 geschrieben von:
Hač su winowatostne testy na korona­wirus za němskich dowolnikow zmysłapołne, kotrež so z tak mjenowanych rizikowych kónčin we wukraju nawróćeja, ma so hakle pokazać. Na prěni napohlad zdawa so naprawa trěbna, a politika demonstruje, zo je jednanjakmana. Kritikarjo skorža, zo tajke testy wukazaja, hdyž su wulke prózdniny w někotrych zwjaz­kowych krajach hižo zaso nimo. A scyła: Najwjace pozitiwnych padow korony njepřińdźe z dalokich krajow, do kotrychž so něm­scy dowolnicy tuchwilu lědma zabłudźeja, ale z Awstriskeje abo z kupy Mallorca. Wobě pak njejstej jako rizikowej kónčinje zastopnjowanej. Mjeztym wěmy, zo mamy tajku rizikowu kónčinu tež w Němskej: wokrjes Dingolfing-Landau w susodnej Bayerskej, hdźež bě wirus w ratarskim zawodźe wudyrił. Wobydlerjam wokrjesa je zakazane, do někotrych zwjazkowych krajow jěć ... Chaos nas drje hišće chwilu přewodźa. Marko Wjeńka

Prěnja němsko-delnjoněmska tafla

Dienstag, 28. Juli 2020 geschrieben von:
W sewjerobraniborskim Sewekowje su minjeny pjatk prěnju němsko-delnjoněmsku wjesnu taflu wotkryli. Iniciatiwa za to wuchadźeše z tamnišeho Towarstwa za del­njoněmčinu w Braniborskej, kotrež běchu lěta 2014 z pomocu Domowinskeje župy Delnja Łužica załožili. Sewekow je dźěl města Wittstock nad rěku Dosse. Ke gra­tu­lan­tam słušeše Měto Nowak, zastupnik braniborskeho ministerstwa za kultu­ru. Wón pokaza tež na němsko-serbsku dwurěčnosć a na dwurěčne tafle. Wot měrca 2020 su w Braniborskej tež němsko-delnjoněmske wjesne tafle móžne. Foto: Měto Nowak

To a tamne (28.07.20)

Dienstag, 28. Juli 2020 geschrieben von:

Wusnjeny paduch je policistam dźěło wolóžił – dyrbjachu jeho jenož hišće wubudźić. 39lětny zadobywar je sej w Göttingenskim bydlenju wusnył, do kotrehož bě so namócnje zadobył. 29lětny woby­dler jeho při nawróće sobotu rano spjaceho wuhlada, zamkny bydlenje a zawo­ła policiju. Čehodla bě sej muž při pytanju za rubiznu wusnył a hač bě wopity, policija bohužel njepřeradźi.

Hnydom dwójce je šofer transportera wčera w Sankt Egidienje w Zwickauskim wokrjesu spytał pjany z awtom jěć. Mandźelskemu porikej bě chabłacy 59lětny při tankowni napadnył. Žona móžeše jemu­ klučiki wotewzać, doniž policija njepřijědźe. Ta naměri w jeho kreji 3,3 promile alkohola. Něšto hodźin pozdźišo su zastojnikow wospjet wołali, dokelž chcyše muž dale jěć. Nowy test wunjese přeco hišće 1,6 promilow.

Wučerjow nabožiny powołał

Montag, 27. Juli 2020 geschrieben von:

Drježdźany (B/SN). Na swjatočnej Božej mši w Drježdźanskej katedrali je biskop Heinrich Timmerevers 10. julija šěsć žónskim a šěsć mužam cyrkwinsku dowol­nosć wučenja Missio Cannonica spož­čił. Woni smědźa nětko we wobłuku biskopstwa Drježdźany-Mišno jako wučerki abo wučerjo nabožiny skutkować. W swojim prědowanju pokaza biskop na to­, zo je wěra kaž wulke twarnišćo. Wučacy nabožiny maja nadawk, pomhać dorostowacym při orientaciji a jich přewodźeć w pytanju za křesćanskej wěru.

Diakonija bilancowała

Konsulataj wopušćenej

Montag, 27. Juli 2020 geschrieben von:

Washington/Chengdu (dpa/SN). Po za­wrjenju konsulata w Houstonje su chinscy diplomaća zastupnistwo w texaskej metropoli wopušćili. Krótko po tym su USA objekt přewzali. Tamniše knježerstwo bě objekt zawrěło, wumjetujo Chinje spionažu. Jako wjećbu za to je China ameriski konsulat w měsće Chengdu zawrěła. Tež tam su mjeztym posledni diplomaća dom wopušćili. Na to chinscy policisća objekt wobsadźichu.

Lindner za winowatostny test

Berlin (dpa/SN). Předsyda FDP Christian Lindner sej žada, zo měli wšitcy, kotřiž so z dowola do Němskeje wróća, winowatostny test na koronawirus přewjesć dać a jón sami zapłaćić. „Štóž so do­browólnje do rizikowych kónčin poda, dyrbjał tež akceptować, zo ma test sam zapłaćić“, rjekny Lindner wčera w sćelaku ZDF. To je jemu „prašenje swójskeje zamołwitosće“. Ministra za strowotnistwo Jensa Spahna (CDU) je Lindner namołwił strategiju zdźěłać, kak měli z dowolowymi nawrótnikami wobchadźeć.

Wjace natyknjenych

Po wšej Ruskej swjećachu wčera dźeń mórskeje floty. Ludźo mějachu składnosć, zepěranišća mariny wopytać a paradam mórske­je a wojerskeje techniki přihladować, kaž tule w Sewastopolu na kupje Krim. Prezident Wladimir Putin je w tym zwisku při­powědźił, zo chcył marinu tež přichodnje z modernymi brónjemi wuhotować. Foto: dpa/Konstantin Michalčewskij

Mobilny stan za test korony

Montag, 27. Juli 2020 geschrieben von:

Mnichow (dpa/SN). Po masowej infekciji 174 ratarskich pomocnikow w plaho­warni zeleniny w bayerskim Mammingu je tam knježerstwo dźensa staciju za test korony natwarić dało. Wobydlerjo gmejny maja składnosć, so w mobilnym stanje darmotnje na koronawirus testować dać. To je bayerska ministerka za strowotnistwo Melanie Huml (CSU) připowědźiła. „Runje w tajkej situaciji je to jara wažny poskitk wobydlerjam.“

Kónc tydźenja bě krajnoradny zarjad Dingolfingu-Landauwje zdźělił, zo je so w mjeztym zawrjenym ratarskim zawodźe w gmejnje z 3 300 wobydlerjemi třećina tam dźěłacych ratarskich pomocnikow natyknyła. Pomocnicy z Madźarskeje, Rumunskeje, Bołharskeje a Ukrainy běchu na žnjach kórkow zasadźeni. Woni bydla w kontejnerach. Zawod je mjeztym z płotom wobdaty a w karatenje.

Razniše naprawy

Montag, 27. Juli 2020 geschrieben von:
Washington (dpa/SN). Po tydźenje trajacych protestach w Portlandźe w staće Oregon je knježerstwo USA razniše naprawy přećiwo namócnym skućićelam mjez demonstrantami připowědźiło. Po słowach ministra za škit domizny Chada Wolfa nochcedźa dlěje ćerpjeć, zo na­mócni kóždu nóc policistow nadběhuja. W Portlandźe je tež minjenu nóc k zražkam mjez demonstrantami a policiju dó­šło­. Po namócnej smjerći Afroameričana Geor­gea Floyda ludźo w USA mjeztym mě­sacaj přećiwo rasizmej a policajskej namocy protestuja. Při tym bu wčera w texaskim Austinje muž zatřěleny. Kaž policija zdźěli, bě wopor sam wobrónjeny a je so awtu bližił, z kotrehož su jeho zatřělili.

Nowy přiměr na wuchodźe Ukrainy

Montag, 27. Juli 2020 geschrieben von:

Kijew/Donjeck (dpa/SN). Po wjace hač 20 pospytach płaći wot dźensnišeho w krizowej kónčinje na wuchodźe Ukrainy přiměr. „Dospołny a wšo wopřijacy přiměr“ je wot połnocy skutkowny, zdźěli prezidialny zarjad w Kijewje. Ukrainske wójsko a zastupnicy proruskich wojowarjow z kónčin wokoło Donjecka a Lu­hanska běchu so na kónc wojowanjow dojednali. Dotal běchu wšitke dojednanja w tym nastupanju po krótkim času zaso zwrěšćili. Ruski prezident Wladimir Putin a ukrainski prezident Wolodimir Zelenskij chwaleštaj w telefonaće do­jed­nanje na přiměr. Zdobom žadataj sej wobaj­ wjace prócowanja kontaktneje skupiny, dotalne dojednanja přesadźić.

Wot nalěća 2014 wojuja jednotki ukrainskeho knježerstwa přećiwo wot Ruskeje podpěranym zběžkarjam. Po trochowanju UNO je w bojach dotal wjace hač 13 000 ludźi žiwjenje přisadźiło. Lěta 2015 z pomocu Němskeje a Francoskeje wujednany měrowy plan předwidźi wojowanja a wólby skónčić. Hišće lětsa planuja mjezynarodnu konferencu.

Anzeige