Kanclerski zarjad wotmołwił

Freitag, 25. Oktober 2019 geschrieben von:
Berlin/Budyšin (SN/CoR). Ze zarjada zwjazkoweje kanclerki je Serbski sejm na swoju próstwu připrajenje dóstał, zo ma Němska předwidźane, ILO-konwen­ciju 169 ratifikować (SN rozprawjachu). Serbski sejm widźi we wotmołwje zdobom „pozitiwnu wolu“ w zwisku z wuprošenym připóznaćom Serbow jako indige­ny lud w zmysle ILO-konwencije, a to, „zo pokaza na podpěru ludowych skupin a mjeńšin jako dźěl kulturneje a historiskeje identity“. Dalše stejišćo knježerstwoweho rěčnika pak zbudźa w Serbskim sejmje iritacije, dokelž tam rěka: „Dojednanje měri so na staty, na čejichž teritoriju bydla zwjetša koloni­zacije dla tak pomjenowane indigene wobydlerske skupiny. (...) W Němskej bydlace narodne mjeńšiny njesłušeja k domoródnym abo w kmjenach žiwym ludam w zmysle dojednanja.“ „Runje kolo­nizaciske stawizny pak serbski lud ma. To nochcemy jako wobkrućenje wotpo­kazanja napřećo serbskemu ludej akceptować“, wujasnja rěčnik sejmo­weho wuběrka wustawa/prawo Hajko Kozel. Serbski sejm chce so nětko z wotpowědnymi zastupjerjemi rozmołwjeć.

Koaliciske zrěčenje wujednane

Freitag, 25. Oktober 2019 geschrieben von:

Podstupim (dpa/SN). Přichodne braniborske krajne knježerstwo CDU, SPD a Zelenych je dźensa w Podstupimje swoje koaliciske zrěčenje rozłožiło. Na zrě­čenje běchu so tři strony wčera wječor dojednali. Čłonojo CDU a Zelenych maja jemu přihłosować. SPD chce to na zjězdźe srjedź nowembra wot delegatow činić­ dać. Znowawuzwolenje ministerskeho prezidenta Dietmara Woidki (SPD) je kónc nowembra planowane. Přezjedni sej mjez druhim su, zo nimaja w kraju žane nowe brunicowe jamy nastać.

Wjace pjenjez hladarjam

Berlin (dpa/SN). Hladarjow starych w Němskej chcedźa přichodnje lěpje zapłaćić. To je zwjazkowy sejm wčera wobzamknył. Zakoń je zakład powšitkownje zawjazowaceho tarifoweho zrěčenja mjez dźěłodawarjemi a dźěłarnistwom ver.di. Alternatiwnje móhli wyše mzdy hladarjow tež wukazać. Ze stron priwatnych wobhospodarjerjow hladarnjow je­wi­ so masiwna kritika na tym, kak wulka koalicija postupuje. W starownjach a hladarnjach dźěła 1,1 milion ludźi.

Nowowólby 12. decembra

Wjetšiny w Durinskej chětro njewěste

Freitag, 25. Oktober 2019 geschrieben von:

Erfurt (dpa/SN). Politiske strony w Durinskej su dźensa swój bój za wólby noweho krajneho sejma zajutřišim, njedźelu, wotzamknyli. Na zarjadowanju w Gerje chcyše popołdnju načolny kandidat SPD Wolfgang Tiefensee rěčeć, w Erfurće činješe to ministerski prezident Bodo Ramelow jako načolny kandidat Lěwicy. Tam wočakowachu tež bywšeho frakciskeho šefa Lěwicy w zwjazkowym sejmje Gregora Gysija. FDP je swojich přiwisnikow tohorunja do Erfurta přeprosyła. K nim chcyštaj načolny kandidat Thomas Kemmerich a stronski předsyda Christian Lindner porěčeć.

Po najnowšich woprašowanjach móže so Lěwica najwjace hłosow nadźijeć. Slědźen­ski institut Insa wěšći stronje 28 procentow, CDU by ze 26 procentami druhe městno zabrała, AfD móže so 21 procentow nadźijeć, socialdemokraća dźewjeć a Zeleni sydom procentow. Li­beralni móhli z pjeć procentami runje hišće­ do krajneho sejma zaćahnyć.

Snadny wothłós na namjet žnjała

Freitag, 25. Oktober 2019 geschrieben von:

Brüssel (dpa/SN). Zakitowanska ministerka Annegret Kramp-Karrenbauer (CDU) je ze swojim namjetom nastupajo mjezynarodnu škitnu jednotku za Syrisku mjez partnerskimi krajemi w NATO chětro zdźeržliwe reakcije žnjała. Zaki­to­wanski minister USA Mark Esper jeje iniciatiwu wčera na wjerškowym zetkanju NATO w Brüsselu zasadnje witaše. Zdobom wšak připowědźi, zo nochcył žane wojerske jednotki přinošować. Europscy zwjazkarjo drje zwuraznichu na zetkanju zakitowanskich ministrow swoje připó­znaće, zo z namjetom němskeje ministerki scyła někajka iniciatiwa předleži, zjawnje pak njeje dotal žadyn kraj namjet Kramp-Karrenbauer podpěrał.

Přiwšěm schwali Europski parlament wčera rezoluciju, z kotrejž so za mysličku mjezynarodnje škitaneho pasma na sewjeru Syriskeje wuprajeja. Annegret Kramp-Karrenbauer sama, kotraž bě po na­stupje prěni króć na wjeršku NATO, rěčeše wo „pozbudźacych prěnich rozmołwach“, ale rjekny tež, zo „budźe to hišće dołhi proces, chětro kamjenjaty puć“.

„Swoboda słowa a měnjenja na hračkach steji“

Freitag, 25. Oktober 2019 geschrieben von:

Praha (gr/SN). „Wohrožena swoboda sło­wa­ a demokratije“ bě hesło zetkanja čłonow němskeho a čěskeho PEN-kluba składnostnje 30. róčnicy tak mjenowaneje somoćaneje rewolucije wutoru w Praskej kencliji PENa. W Čěskej, hdźež steja medije po měnjenju Europskeho zwjazka žurnalistow pod politiskim ćišćom, žněještaj w tym zwisku wosebje prezident Miloš Zeman a premier Andrej Babiš kritiku. W Němskej płaći strona AfD jako rozšěrjerka politiki, podpěraceje neonacistiske tendency někotrych towaršnostnych skupin a wuskutkowaceje terorizm přećiwo narodnym kaž tež nabožnym mjeńšinam. Literaća běchu sej přezjedni, zo we woběmaj krajomaj zasady demokratije a swoboda měnjenja na hračkach steja. Tónle facit chcedźa woni zhromadnje z namjetami, kak wone zakładne hódnoty zakitować, we formje pisomneho stejišća jednaćelstwomaj wotpowědneju PEN-klubow sposrědkować.

To a tamne (25.10.19)

Freitag, 25. Oktober 2019 geschrieben von:

21 kupjelow, dwanaće spanskich stwow, tři gurmejowe kuchnje, dwě winowej pincy a hoberski pool: Po wjace hač dwěmaj lětomaj na imobilijowych wikach ma luksusowa wila w kaliforniskim Bel Air noweho wobsedźerja. „Billionaire“ mjenowany megaobjekt su za 94 milionow dolarow předali. Objekt běchu lěta 2017 w hórkach pola Los Angelesa natwarili. Za štyriposchodowy dom z 3 530 kwadratnymi metrami bydlenskeje płoniny chcychu 250 milionow dolarow měć. Žadyn kupc pak njebě so našoł.

Do jastwa zadobył je so 18lětny w delnjosakskim Vechta. Chcyše jeno ze swojej zajatej přećelku rěčeć a ju tak wróćo zdobyć. Krótko do toho bě so wona telefonisce wot njeho dźěliła. Młodostny bě štyri metry wysoku murju přewinył a po lěsycach woknow hač k celi přećelki zalězł. Přistajeni jastwa pak jeho zadźeržachu.

Dalše nadrobnosće wozjewjene

Donnerstag, 24. Oktober 2019 geschrieben von:

London (dpa/SN). Po hrózbnej namakance 39 ćěłow na nakładnym awće njeda­loko Londona wujewja so dźeń a wjace nadrobnosćow. Po informacijach britiskich medijow je policija mjeztym dwě bydleni w Sewjernej Irskej přepytała, zwotkelž zajaty šofer awta pochadźa. Fachowcy mjeztym z toho wuchadźeja, zo su ludźo w nakładnym awće zmjerznyli, dokelž jedna so wo chłódźenski kontejner. Móžno tež je, zo jedna so pola mortwych wo do kraja pašowanych migrantow.

Słyšenje wótře mylili

Washington (dpa/SN). Wjace hač 20 repu­blikanskich zapósłancow USA je přesłyšowanje wysokorjadneje sobu­dźěłaćerki zakitowanskeho ministerstwa w tak mjenowanej ukrainskej aferje we Wa­shingtonje wótře myliło. Parlamentownicy zadobychu so do sydarnje, hdźež so wuběrk za tajne słužby za za­wrjenymi durjemi Lauru Cooper prašeše. Słyšenje we wobłuku přećiwo prezi­dentej Donaldej Trumpej měrjaceho so procesa k wotsadźenju ze zastojnstwa bě pjeć hodźin přetohnjene.

Nawodźa krajow so schadźuja

Za swój namjet wabiła

Donnerstag, 24. Oktober 2019 geschrieben von:
Brüssel (dpa/SN). Zwjazkowa ministerka za zakitowanje Annegret Kramp-Karrenbauer (CDU) je na dźensnišim wjeršku NATO w Brüsselu mjez swojimi kolegami za zwjazkarjemi pytała, kotřiž bychu jeje namjet nastupajo mjezynarodnu škitnu jednotku w sewjernej Syriskej podpě­rali. Na dwudnjowskim zetkanju chcyše předsydka CDU swoje předstawy rozłožić, kaž wona připowědźi. Hladajo na turkowsku wojersku ofensiwu na sewjeru Syriskeje přećiwo tamnišej kurdiskej mili­cy YPG bě Kramp-Karrenbauer namjetowała, škitne pasmo na mjezy k Turkowskej zarja­dować, kotrež dyrbjała mjezyna­rodna wojerska jednotka škitać. Njebě pak swój namjet z koaliciskim partnerom SPD a z wonkownym ministrom Heikom Maasom (SPD) wotrěčała.

Njelutuja z kritiku

Donnerstag, 24. Oktober 2019 geschrieben von:
Berlin (dpa/SN). Plan zakitowanskeje ministerki Annegret Kramp-Karrenbauer (CDU) nastupajo Syrisku žněje w rjadach opozicije kaž tež w SPD zdźěla raznu kriti­ku. Tuchwilu je „hišće tójšto pra­šenjow“, rjekny zastupnik SPD w zakitowanskim wuběrku zwjazkoweho sejma Fritz Felgentreu, po tym zo bě ministerka wuběrkej swoje předstawy rozłožiła. Wo wjele raznišo reagowaše opozicija. „Telko diletantizma njenamakaš ani w gmejnskich skupinach małych městačkow. To njeje niwow ministerki“, rjekny politikarka FDP Marie-Agnes Strack-Zimmermann. Zakitowanski fachowc Lěwicy Alexander Neu rěčeše wo „mortwym po­ro­dźe“. Zapósłanc Zelenych Tobias Lindner njewěri, zo namjetej ministerki woprawdźe skutki slěduja.

Ruska zaruča syriskim Kurdam wěstotu

Donnerstag, 24. Oktober 2019 geschrieben von:

Moskwa (dpa/SN). Ruska je měrliwym syriskim Kurdam zaručiła, zo smědźa w 30 kilometrow šěrokim wěstotnym pasmje na sewjeru kraja podłu mjezy k Turkowskej wostać. Njeje trjeba, zo dyrbja měrliwi wobydlerjo swoje bydlenja wopušćić. To je ruski zakitowanski minister Sergej Šojgu po informacijach nowinarjow we wčerawšej widejowej konferency ze syriskimi demokratiskimi mocami (SDF) rjekł, kotrež kurdisku milicu YPG dominuja. Garant za wěstotu su ruska wojerska policija a syriscy pomjezni wojacy, praji Šojgu w rozmołwje z komanderom SDF Maslumom Abdijom.

Sergej Šojgu zdobom připowědźi, zo chcyli ruscy wojacy swoje patrulje roz­šěrić a ličbu syriskich jednotkow na sy­risko-turkowskej mjezy powjetšić. General Maslum dźakowaše so po informa­cijach medijow Ruskej a jeje prezidentej Wladimirej Putinej za garantiju wěstoty kurdiskeho ludu a za kročele, kotrež su přiměr w potrjechenej kónčinje zmóž­nili. Komander w tym zwisku wobkrući, zo „su Rusojo a Syričenjo mjeztym ze­pěranišća wobsadźili. Podpěrujemy jich po swojich móžnosćach.“

Anzeige