Wótry wołojnik (30.07.20)

Donnerstag, 30. Juli 2020 geschrieben von:
Dowolowa romantika ŠNAK

To a tamne (30.07.20)

Donnerstag, 30. Juli 2020 geschrieben von:

Zastanišćo železnicy přewidźał bě lo­komotiwnik intercity-ćaha pola Bonna a je prosće dale jěł. Pasažěrojo, kotřiž chcychu tam wulězć, móžachu IC hakle na přichodnym dwórnišću w Koblenzu wopušćić. Dokelž na železniskej čarje mjez Kölnom a Bonnom runje twarja, měješe ćah město hłowneho dwórnišća tuž w Bonnje-Beuelu zastać. To pak bě loko­motiwnik přewidźał. Železnica je so za misnjenje mjeztym zamołwiła.

Pozdatneje miny w pincy domu we Wurzenje dla dyrbjachu wjaceswójbny dom ewakuować. 31lětny wobydler bě po někotrych lětach prěni króć zaso do pincy pohladał a tam pozdatnu rozbuchlinu wuhladał. Po tym zo běchu cyły dom rumowali, přijědźe wosebita słužba k wotstronjenju bojowych srědkow, zo by swoje dźěło wukonjała. Spěšnje pak móžeše wšitkich změrować: Pozdatna mina njebě ničo hinaše hač stara po­mazkowa tyza.

Pytaja dale za Maddie

Mittwoch, 29. Juli 2020 geschrieben von:

Hannover (dpa/SN). W padźe zhubjeneje Maddie McCann je policija dźensa rano jednu z małozahrodkow w Hannoveru dale přepytała. Při tym zasadźichu tež mały bager. Dźěła steja po informacijach statneho rěčnistwa w zwisku z lěta 2007 z dowoloweho objekta w Portugalskej zhubjenej tehdy třilětnej. Podhladny je 43lětny Němc, kiž sedźi tuchwilu w Kielskim jastwje. Wón bydleše 2007 w Hannoveru.

Statne rěčnistwo přepytuje

Düsseldorf (dpa/SN). Po sypnjenju domskeho w Düsseldorfje z jednym mortwym dźěłaćerjom je statne rěčnistwo přepytowanja zahajiła. Při tym chcedźa zwěsćić, hač bě něchtó sypnjenje zawi­nował. Dotal njewědźa, hač wšitke twarske dowolnosće předležachu. Twarjenje je so póndźelu sypnyło. Něšto pozdźišo dźěłaćerja pod rozwalinami mortweho namakachu. Za dalšim zhubjenym dźěłaćerjom intensiwnje pytaja.

Schröder: Trump ma šansy

Chětro napjate je połoženje tuchwilu w přepjelnjenych lěhwach ćěkancow na juhu Italskeje. Jeničce w juliju je tam 5 300 nowych migrantow dojěło. W lěhwach, kotrež steja koronapandemije dla pod karantenu, dochadźa stajnje zaso k njeměram. Z lěhwa w přistawje města Porto Empedocle (hlej wobraz) je so póndźelu 520 tuneziskich migrantow wudobyło. Foto: dpa

Wjace pjenjez za dźěći

Mittwoch, 29. Juli 2020 geschrieben von:

Berlin (dpa/SN). Dźěćacy pjenjez wot přichod­neho lěta wo 15 eurow zwyša, kaž zwjazkowe knježerstwo dźensa wobzamkny. Je to centralny dźěl zakonja wo wo­lóženju swójbow. Po tym ma so tež bjezdawkowy dźěćacy podźěl wo 500 na cyłkownje 8 388 eurow powjetšić. Hižo w koaliciskim zrěčenju 2018 běchu zwyšenje dźěćaceho pjenjeza wo cyłkownje 25 eurow zakótwili. Po prěnim zwyšenju wo dźesać eurow spočatk 2019 jón wot 1. januara wo dalše 15 eurow zwyša.

Wobzamknyli su dźensa tež nowo­rjadowanje za wulkorězarnje, kaž bě to zwjazkowy dźěłowy minister Hubertus Heil (SPD) připowědźił. Tak smědźa rězar­nje přichodnje jenož hišće ze swójskimi dźěłowymi mocami skót rězać a ro­zebrać. Zasadźenje špatnje płaćenych pož­čenych dźěłowych mocow chcedźa zakazać a kontrole w zawodach zesylnić.

Italska podlěši wuwzaćny staw

Mittwoch, 29. Juli 2020 geschrieben von:
Rom (dpa/SN). Italske knježerstwo chce koronapandemije dla wukazany wu­wzać­­ny staw hač do 15. oktobra podlěšić. Wón płaći tam hižo šěsć měsacow a by so poprawom 31. julija skónčił. Mini­sterski prezident Giuseppe Conte rje­kny wčera w Romje, zo je podlěšenje „nje­wobeńdźomne“. Politikarjo prawicarskeje opozicije a někotři prawniscy fachowcy so tomu spřećiwjeja. Woni maja zakładne prawa ludźi za wohrožene a wumjetuja knježerstwu, zo z dekretami knježi a parlament wuzamkuje. Nuzowy staw w Italskej poprawom jenož po přirodnych katastrofach wukazaja.

Pruwuja šansy wotbrónjenja

Mittwoch, 29. Juli 2020 geschrieben von:

Wien (dpa/SN). USA a Ruska su nowu fazu­ swojich rozmołwow wo kontroli jadro­weho brónjenja zahajili. W dźěłowych skupinach su so knježerstwowi fachow­cy wobeju stron wčera we Wienje zetkali, zo bychu šansy wotbrónjenja pruwowali.

Po informacijach ruskeho wonkow­neho ministerstwa w Moskwje chcedźa so fachowcy hač do jutřišeho z wojer­skimi doktrinami, potencialemi wohroženja, z transparencu a mjezsobnymi kontrolemi rozestajeć.

Zrěčenje „New start“, poslednje hišće wobstejace wo kontroli bróni wobeju krajow, kotrejž wobsedźitej zhromadnje 90 procentow wšěch jadrowych bróni, ma hišće něhdźe lěto płaćić. Wone wob­mje­zuje ruske a ameriske składźišća ato­mo­wych bróni na stajnje 800 nošnych systemow a 1 550 zasadźomnych roz­buchadłow. USA chcedźa nowe zrěčenje wo kontroli brónjenja na Chinu rozšěrić. Ta pak so raznje spjećuje, wo swojim přirunujomnje małym, ale spochi rosćacym składźe atomowych bróni rěčeć.

„Smy wosrjedź pandemije“

Mittwoch, 29. Juli 2020 geschrieben von:

Zamołwići starosća so raznje přiběracych padow koronawirusa dla

Berlin (dpa/SN). Přiběraceje ličby nowych padow korony w Němskej dla so Roberta Kochowy institut (RKI) boji, zo móhł so dotalny pozitiwny trend w Němskej do na­přećiwneho wobroćić. Minjene sydom dnjow běchu 3 611 nowych infek­cijow zliči­li, rjekny prezident instituta Lothar Wieler wčera w Berlinje. Nowe natyk­njenja z wirusom zbudźeja „wulke starosće“. Hłowna přičina přiběracych padow je po słowach Wielera zwjeršnosć při dodźerženju prawidłow. Hač jedna so hižo wo móžnu druhu žołmu, dotal hišće njewědźa, móhło pak być.

Minjeny čas bě so poradźiło ličbu nowych infekcijow na 300 do 500 wšědnje wobmjezować, kaž prezident instituta wu­zběhny. Mjeztym je połoženje hinaše: Minjeny pjatk bě jich 815 padow wjac, njedźelu 700 a wčera 600.

To a tamne (29.07.20)

Mittwoch, 29. Juli 2020 geschrieben von:

Swój lóšt na burger a pomfritki změja třo Awstralčenjo nětko chětro droho zapła­ćić. Policija je jich lepiła, jako běchu za čas koronapandemije najebać razny zakaz, dom wopušćić, w zwjazkowym staće Victoria k hosćencej McDonald‘s po puću. Napołožili su młodostnym nětko pokutu 5 000 awstralskich dolarow. Při kontroli awta dyrbješe policija zwěsćić, zo so přećeljo priwatnje zetkachu, byrnjež kóždy něhdźe druhdźe bydlił.

Hoberski kruh w žitnišću w hornjobayerskim Pählu dźeń a wjace ludźi přiwabja. Štó bě kruh z akuratnymi for­ma­mi a symetrijemi stworił, dotal njewědźa. Ratar, kiž polo wobhospodarja, je so­ mjeztym z tym wotnamakał, zo drje tam lětsa ničo žnjeć njebudźe. Na samsnym polu nańdźechu lěta 2007 hižo raz tajku wuměłsku twórbu, kotruž maja někotři za produkt zwonkazemskich.

Bywši oficěr do Berlina

Dienstag, 28. Juli 2020 geschrieben von:

Washington (dpa/SN). Prezident USA Donald Trump chce bywšeho oficěra wójska, połkownika Douglasa Macgre­gora, za naslědnika Richarda Grenella jako­ wulkopósłanca do Berlina pósłać. To wuchadźa ze zdźělenki Běłeho domu. Namjety za zastojnstwo wulkopósłanca ma senat schwalić, wotpowědny termin pak dotal znaty njeje. Macgregor bě Němsku w zašłosći, runje tak kaž Trump, přesnadnych wudawkow za brónjenje dla zas a zaso kritizował.

Wjace infekcijow w Awstriskej

Wien (dpa/SN). Ličba infekcijow z koronawirusom w turistiskim srjedźišću St. Wolfgang w hornjej Awstriskej je wo 18 na nětko znajmjeńša 62 rozrostła. Kaž zamołwići rozprawjeja, su nimale wšitke tysac testow wuhódnoćili. Najwjetši dźěl natyknjenych su sobudźěłaćerjo ho­te­low a hosćencow. Wirus bě wudyrił, po tym zo běchu so młodźi sezonowi pomocnicy k swjedźenjam zetkawali.

Trump hrozy demonstrantam

Anzeige