To a tamne (13.02.24)
W sewjernej Posaarskej wčera ćeknjeny kenguru je zaso pola swojeje wobsedźerki we Wadernje. Kaž policija dźensa zdźěli, je wona zwěrjo wuspěšnje přiwabiła. 40lětna šoferka awta bě wčera kenguru na dróze wobkedźbowała. Dokelž je žona z toho wuchadźała, zo jej to nichtó njewěri, wona zwěrjo jako dopokaz fotografowaše.
Awto 27lětneho je so w Drježdźanskim měšćanskim dźělu Laubegast do Łobja sunyło. Kaž wohnjowa wobora wčera zdźěli, je šofer zawčerawšim wječor swoje awto při přibrjohu wotstajił a so do picerije podał. Krótko po tym přidružichu so pasanća do hosćenca a powědachu, zo su awto we Łobju wuhladali. 27lětny je jenož hišće přihladował, kak so awto podnuri. Zawołana wohnjowa wobora je bjez wuspěcha za jězdźidłom we Łobju pytała.
Pobrachowacy dorost je problem
Na lětušej hłownej zhromadźiznje Towarstwa Cyrila a Metoda (TCM) minjeny pjatk w Baćonju rozprawjachu kooperacije a sekcije wo swojej dźěławosći. Zdobom schwalichu čłonojo TCM nowe wustawki.
Baćon (SN/BŠe). Towarstwo Cyrila a Metoda so zaměrnje dale za křesćanske žiwjenje w Hornjej Łužicy angažuje. Wo tym móžachu so čłonojo TCM minjeny pjatk w Baćonju přeswědčić, jako słyšachu rozprawy jědnaće sekcijow a kooperacijow zańdźeneho lěta.
Eks-mandźelska swědk w procesu
Budyšin (dpa/SN). W procesu přećiwo podhladnemu, kotryž je prawdźepodobnje loni 4. awgusta ewangelsku cyrkej we Wulkich Rědorjecach (Großröhrsdorf) zapalił, je Zhorjelske krajne sudnistwo w Budyšinje zańdźeny tydźeń něhdyšu mandźelsku 41lětneho muža jako swědk na jednanje prosyło.
Wona wupraji, zo běše dźeń po wohenju list namakała, w kotrymž hrožeše podhladny, zo chce zhromadne dźěći wotwjesć a zo chce bydlenje, staršiski dom a měšćansku cyrkej, w kotrejž buštaj něhdy wěrowanaj a jedne z jeju dźěći wukřćene, zničić. Něšto dnjow do toho hižo běše žona wobruče swojeho, kaž tež awta swojeho žiwjenskeho partnera, rozkałnjene nadešła. Z decembra 2022 sem staj mandźelskaj sudnisce dźělenaj. Po dźělenju je něhdyši partner „dźeń a agresiwniši był“, tak žona rozprawješe. Mjez druhim je so najebać zakaza „dźěćom bližił“, je zatrašał. Nimo toho tež hrožeše, zo so samoho mori.
K zazběhej procesa je hłowny podhladny swój njeskutk zaprěł. Zdobom pak přida, zo je w nocy wohenja blisko cyrkwje přebywał.
Dowol na hračkach?
Lipsk/Drježdźany (dpa/SN). Na lětanišćomaj Drježdźan a Lipsk/Halle je dźensa wulki dźěl lětow wotprajeny. Přičina toho su warnowanske stawki sobudźěłaćerjow. Dowolowe plany tysacow pasažěrow steja na hračkach. W Sakskej su so minjeny kónc tydźenja zymske prózdniny zahajili. Dźěłarnistwo ver.di bě sobudźěłaćerjow k 48hodźinskim stawkam namołwjało. W nocy na jutře ma wobchad po planje zaso móžny być.
W tworni zaso dźěłaja
Grünheide (dpa/SN). W tworni elektroawtow Tesla w Grünheide sobudźěłaćerjo nětko zaso jězdźidła produkuja. Kaž twornja dźensa zdźěli, su přistajeni w nócnej słužbje produkciju zahajili. Kónc januara dyrbjachu přechodnje přestać dźěłać, dokelž je wjele dźělow awtow pobrachowało. Wina na tym běchu nadpady Huthi-rebelow w Čerwjenym morju. Transportne puće su nětko dlěše, dokelž pytaja łódźe za druhimi čarami. Twornja ma tuchwilu 12 500 přistajenych.
Přećiwo planowanej fabrice
Wjace hač 3 500 sobuskutkowacych w 60 wobrazach ćehnješe wčera ...
Wólby wotbłyšćuja měnjenje ludźi
Berlin (dpa/SN). W někotrych dźělach Berlina wčera wólby zwjazkoweho sejma wospjetowachu. Předewšěm strona FDP je po tym ćerpjeła, a jedne městno w sejmje zhubiła. Zwjazkowemu sejmej přisłuša w přichodźe hišće 735 zapósłancow, mjez nimi jenož hišće 91 z FDP, kaž nawodnica zwjazkowych wólbow w nocy na dźensa wozjewi. Za druhe strony njeje so ličba změniła.
Tež poměry wjetšiny w parlamenće so njezměnja. Procentualne změny pak su pokazka wolerjow a wotbłyšćuja měnjenje wolerjow. Opoziciskej stronje CDU a AfD stej wjace hłosow dóstałoj. Amplowej stronje SPD a FDP je mjenje wólbokmanych woliło. Zeleni su přibližnje samsnu ličbu hłosow wolerjow dóstali.
Po wuslědku wostanje SPD najsylniša strona z 22,2 procentaj hłosow (-1,2 procentaj), po tym sćěhuja Zeleni z 22,0 procentami (-0,3). CDU polěpši so na 17,2 procentaj (+ 1,3) a AfD na 9,4 procenty (+ 1,0). FDP wolichu 8,1 procent -0,9) ludźi. Lěwica je swój wuslědk 11,5 procentow (+0,1) zachowała.
Powšitkownje měrnje wostało
Policija bě so na pochod a přećiwne protesty w Drježdźanach přihotowała
Drježdźany (dpa/SN). Wjacore tysacy ludźi su wčera přećiwo pochodej prawicarskoekstremnych składnostnje róčnicy bombardowanja Drježdźan w Druhej swětowej wójnje protestowali. Po informacijach policije so nimale 5 000 ludźi na přećiwnym protesće wobdźěli. Při prawicarskoekstremistiskej demonstraciji policija nimale 1 000 wobdźělnikow naliči. Policija bě so hižo do toho na wobšěrne zasadźenje přihotowała. Čara prawicarskich ekstremistow bě dospołnje zawrjena. Přiwšěm spytachu přećiwni demonstranća čaru docpěć, čemuž zastojnicy zadźěwachu. „Zasadźenje bě za mnohich wobydlerjow města poćežowanje. Tole pak bě trěbne, zo móhli naš zakonski nadawk spjelnić“, wuswětli prezident policije Lutz Rodig.
Policija měješe zaměr, lěhwa protestowacych dźělić a při móžnych blokadach zakročić. Na móžne rozestajenja běchu zastojnicy přihotowane. Saksku policiju su zastojnicy z Durinskeje, Braniborskeje, Hamburga, Bayerskeje a Hessenskeje kaž tež zwjazkoweje policije podpěrali.
Powabna Łužica
Karnewal w sławnej galeriji
To a tamne (12.02.24)
Z metalowym gratom je Mnichowska wohnjowa wobora 8lětnu holcu z poschodoweho łoža wuswobodźiła. Kaž wohnjowa wobora minjeny štwórtk zdźěli, je sej dźěćo z Berlina, kotrež ze swójbu w Mnichowskim hotelu za čas dowola přebywaše, nohu mjez rěblom a łožowym kašćikom zatłusnyło. Sama njemóžeše so wuswobodźić, tak zo bě swójba wohnjowu woboru zazwoniła. Wohnjowi wobornicy móžachu holčce na zbožo pomhać.
Něhdźe 30 čłonow towarstwa „Rostockskich mórskich psow“ su sej zawčerawšim w kostimach do 3,8 stopnjow zymneje wody Baltiskeho morja zalězli. Towarstwo póstniske kupanje hižo dlěje hač 35 lět organizuje. Kupanska sezona „Rostockskich mórskich psow“ dźe wot septembra do apryla. Tež na Usedomje běchu so mnozy zymscy płuwarjo w pisanych kostimach na tradicionalnym spektaklu lodoweho kupanja wobdźělili. Zarjadowanje tam měješe lětsa swój 10. jubilej.
