Rekord infekcijow w Pólskej

Mittwoch, 28. Oktober 2020 geschrieben von:
Waršawa (dpa/SN). W Pólskej je ličba wšědnych nowych infekcijow z koronawirusom prěni króć mjezu 16 000 překročiła. W běhu 24 hodźin su 16 300 nowych padow zličili, najwjetši dźěl w kónčinje wokoło stolicy Waršawy. Tole zdźěli strowotniske ministerstwo kraja. Samsny čas je 132 ludźi w zwisku z wirusom zemrěło. Dotalny rekord nowych infek­ci­jow běchu minjeny pjatk ze 13 632 padami nastajili. Wot spočatka pandemije je w Pólskej 4 615 smjertnych padow w zwisku z wirusom. Roberta Kochowy institut je Pólsku mjeztym jako rizikowu kónčinu zastopnjował. Wot minjeneje so­boty su w kraju wšitke hosćency a bary na dwaj tydźenjej zawrjene. Zarjadowanja z wjace hač pjeć ludźimi su zakazane.

Pólske žony planuja stawk

Mittwoch, 28. Oktober 2020 geschrieben von:
Waršawa (dpa/SN). W zwadźe wo dalše přiwótřenje prawa na wotehnaće w Pólskej je pólske žónske hibanje za dźensa po wšěm kraju k cyłodnjowskemu stawkej namołwjało. „Bjerjemy dowol, zawrějemy firmu abo cyle jednorje – njeńdźemy na dźěło“, rěka w namołwje orga­nizacije „Staropólski žónski stawk“. Nawodnica Marta Lempart rěčeše w tym zwisku wo generalnym stawku. Po rozsudźe wustawoweho sudnistwa, wotehnaće tež potom zakazać, hdyž je dźěćo w maćernym žiwoće ćežko zbrašene, w Pólskej hižo dny dołho protestuja. Wčera je zakaza dla tež w pólskim sejmje k emocionalnym rozestajenjam dóšło, jako zastupnik knježaceje strony PiS opoziciji wumjetowaše, zo wužiwa symbole nacijow.

Přesadźuja myta Honeckera

Mittwoch, 28. Oktober 2020 geschrieben von:

Kirchheim unter Teck (dpa/SN). Po skónčenju prawniskeje zwady ze Zwjazkom smě awkciski dom w badensko-württembergskim Kirchheimje unter Teck wulku ličbu rjadow a statnych darow ze zawostajenstwa Ericha Honeckera přesadźować. Zwjazkowy zarjad za imobilijowe nadawki w Bonnje bě awkciju najprjedy raz z hnydomnym sudniskim rozsudom zakazać dał, awkcionar Andreas Thies zdźěli. Přesadźowanje je nětko spočatk decembra planowane.

Po informacijach rěčnika zwjazko­weho zarjada Thorstena Grütznera bě insti­tucija hakle krótko do planowaneho termina wo přesadźowanju zhoniła. Dokelž njemóžachu wuzamknyć, zo jedna so pola eksponatow wo bywše ludowe swójstwo, su próstwu wo zakaz na sudnistwje zapodali. Po wobšěrnym pruwowanju su próstwu nětko zaso cofnyli.

Něhdźe sto rjadow a statnych darow něhdyšeho šefa statneje rady NDR Ericha Honeckera smědźa nětko přesadźować. Po informacijach medijow bě so hižo w juliju zajimc přizjewił, kiž chcyše kompletnu zběrku za milion eurow kupić, mjez nim ryzy złoty rjad „Rjek NDR“.

To a tamne (28.10.20)

Mittwoch, 28. Oktober 2020 geschrieben von:

„Wjace hač 5,5 promilow“ alkohola zwěsćiła je policija w kreji 42lětneho šofera wosoboweho awta w mecklenburgskim Negasće. Muž bě so ze swojim wozom milinoweho sćežora šmórnył a bě na to ćeknył. Zastojnicy jeho dosahnychu a nochcychu wěrić, štož alkomat pokazowaše. Dalši test wunjese samsny wuslědk – nastroj wšak wjace pokazać njemóže. Jězbnu dowolnosć muž njeměješe.

Ze 40 metrow wysokosće z helikoptera do morja skočił je Brita, zo by swětowy rekord nastajił. Jako bjez parašuta z ně­hdźe 120 km/h na wodu zrazy, padny krótki čas womory, tak zo dyrbjachu jeho nurjacy wuchować. Pomocnicy rěčachu wo chětro njelepej akciji. Přitomny zastupnik Guinnessoweje knihi rekordow přeješe skakarjej spěšne polěpšenje, nochcyše pak rjec, hač pospyt jako swětowy rekord do knihi zapisaja.

Altmaier: Ličby njepředstajomne

Dienstag, 27. Oktober 2020 geschrieben von:

Berlin (dpa/SN). Zwjazkowy minister za ho­spodarstwo Peter Altmaier (CDU) liči­ kónc tydźenja z 20 000 nowymi koronainfekcijemi. Altmaier rjekny na dźensnišim němsko-francoskim hospodarskim zjězdźe, zo by tole wuwiću minjenych dnjow wotpowědowało. „To je ličba, kotruž njejsmy sej před třomi tydźenjemi hišće předstajić móhli.“ W Němskej su dźensa rano 11 409 nowych infekcijow w běhu 24 hodźin zličili.

Roth šwika Erdoğana

Berlin (dpa/SN). Wiceprezidentka zwjazkoweho sejma Claudia Roth je turkowske­ho prezidenta Recepa Tayyipa Erdo­ğana po toho nadběhach na francoskeho prezidenta Emmanuela Macrona raznje kritizowała. Ze swojim ranjenjemi „překroča Erdoğan wšitke mjezy přistojnosće, respekta a zamołwitosće statnika“, rjekny Roth powěsćerni dpa. Erdoğan bě Macrona wosobinsce nadběhował a na toho duchownej strowoće dwělował. Do toho bě Macron karikatury profeta Mohammeda jako swobodu měnjenja zakitował.

Woheń na juhu Kaliforniskeje

Při rozbuchnjenju bomby w koranowej šuli w Peshawaru, měsće na sewjerozapadźe Pakistana, je dźensa rano znajmjeńša sydom šulerjow žiwjenje přisadźiło. Wjace hač sto šulerjow so zrani. Dotal njeznaty skućićel bě něhdźe šěsć kilogramow rozbuchliny w kubłanišću zaměstnił. Tójšto zranjenych hólcow w starobje mjez wosom a 20 lětami su w kritiskim stawje. Foto: dpa/Fayaz Aziz

Češa dyrbja w nocy doma wostać

Dienstag, 27. Oktober 2020 geschrieben von:

Praha (dpa/SN). Hladajo na dramatisce přiběrace ličby koronainfekcijow je čěske knježerstwo wukazało, zo dyrbja ludźo w nocy doma wostać. Wot jutřišeho njesmědźa wobydlerjo mjez 21 a 5 hodź. swoje domy hižo wopušćić, zdźěli minister za strowotnistwo Roman Prymula wčera w Praze. Wuwzaća płaća za puć na dźě­ło, nakupowanje a sportowanje.

Najebać razne wobmjezowanja swobodneho hibanja wostanu ličby nowych infekcijow z koronawirusom w Čěskej dale na dramatisce wysokim niwowje. Njedźelu běchu 7 301 nowych hamtsce wobkrućenych infekcijow registrowali. To bě najwyša ličba po wudyrjenju pandemije. Ličba smjertnych padow w zwisku z koronawirusom je na 2 200 rozrostła. Čěska republika ma nimale 10,7 milionow wobydlerjow. Kwota infekcijow na 100 000 wobydlerjow je w Čěskej mjeztym najwyša po wšej Europje.

Namócne protesty w Italskej

Dienstag, 27. Oktober 2020 geschrieben von:

Mailand (dpa/SN). Při protestach pře­ćiwo naprawam knježerstwa k wobmjezowanju koronapandemije w Italskej je we wjacorych městach k namocy a ro­zestajenjam mjez demonstrantami a policiju dóšło. Sta ludźi bě wčera wječor w Mailandźe a Turinje na dróhu šło. Po­li­cija zasadźi mjez druhim sylzopłun pře­ći­­wo demonstrowacym, kotřiž ka­mjenje a bleše na zastojnikow mjetachu.

Po wšej Italskej dyrbja wot wčerawšeho hosćency a bary wot 18 hodź. zawrjene wostać. Tež kina, dźiwadła, fitnesowe hale, sněhakowarske kónčiny a koncertne žurle njesmědźa wjace wočinjene być. Wulki dźěl gymnazialnych šulerjow wuwučuja najprjedy raz internetnje.

Sławny dirigent Riccardo Muti je knježer­stwo namołwjał, rozsud dźiwadła a koncertne žurle zawrěć, skorigować. W lisće knježerstwu ministerskeho pre­zidenta Giuseppe Conteho 79lětny Muti piše, zo trjeba towaršnosć „duchownu cyrobu“, hewak stanje so wona „wohidna“. Knježerstwu wumjetowaše wón „pobra­chowacu čućiwosć“.

Za jednotne naprawy wirusa dla

Dienstag, 27. Oktober 2020 geschrieben von:

Zwjazkowa kanclerka Merkel rěči wo dynamiskim a dramatiskim wuwiću

Berlin (dpa/SN). Hladajo na po wšej Němskej dale přiběraceje ličby infekcijow z koronawirusom maja zamołwići za móžne, postupowanje přećiwo wirusej w Němskej hižo bórze centralnje rjadować. Hamburgski prěni měšćanosta Peter Tschentscher (SPD) rjekny we wčerawšim rańšim magacinje sćelaka ARD, zo su naprawy dotal regionalnje wšelako wukazane. „Nětko pak mamy połoženje, zo ličby infekcijow wšudźe přiběraja. Tuž dyrbimy na cyłoněmske rjadowanje hladać a přemyslić, hač njejsu dalše naprawy trěbne.“ Wuwiće infekcijow budźe tež hłowna tema na jutřišej konferency ministerskich prezidentow.

Vatikan nochce z lajkami rěčeć

Dienstag, 27. Oktober 2020 geschrieben von:

Bonn (dpa/SN). Vatikan je hišće raz po­twjerdźił, zo cyrkwinskich lajkow, kotřiž klerusej njepřisłušeja, bjeze wšeho jako rozmołwnych partnerow njepřipóznawa. Prefekt klerusoweje kongregacije, kar­dinal Beniamino Stella je Němskej biskopskej konferency zdźělił, zo chcedźa najprjedy raz z němskimi biskopami wo wjele diskutowanych instrukcijach k organizaciji wosadow rěčeć, nic pak z laj­kami. Předsyda biskopskeje konferency Georg Bätzing ma přiwšěm tež roz­mołwu z prezidijom synodalneho puća za přiměrjenu, rěčnik konferency w Bonnje zdźěli. Bätzing bě Vatikanej hižo w awgusće namjetował, do planowaneje rozmołwje tež zastupnikow synodalneho puća zapřijeć, zo bychu tež lajkojo wobdźěleni byli. Synodalny puć je spočatk lěta zahajany proces k reformje katolskeje cyrkwje w Němskej.

Instrukcija z Vatikana bě mjez kato­likami Němskeje wjele mjerzanja zbu­dźiła. Kongregacija klerusa we Vatikanje lajkam zakazuje, wosady sobu nawje­dować. Nimo toho Vatikan zjednoćenje wjacorych wosadow zakazuje, štož pak je w Němskej dawno powšitkowna praksa.

Serbska debata

Neuheiten LND