Washington (dpa/SN). Prezident USA Donald Trump a jeho žona Melania staj so z koronawirusom natyknyłoj. „Zahajimoj hnydom proces karanteny a wustrowjenja. Zhromadnje to zmištrujemoj“, pisaše Trump minjenu nóc na Twitteru. Krótko do toho bě wón wobkrućił, zo su jeho poradźowarku Hope Hicks pozitiwnje na wirus testowali. We wokolinje prezidenta běchu so minjeny čas wjacore koronainfekcije jewili. Hicks pak je často pola prezidenta a jeho mandźelskeje.
Poradźowarka bě po informacijach medijow minjenu wutoru zhromadnje z Trumpom w lětadle prezidenta Air Force One na telewizijnu debatu do Clevelanda lećała, hdźež je so Trump ze swojim demokratiskim wužadarjom Joewom Bidenom zetkał. Srjedu poda so Trump na wólbnobojowe zarjadowanje do Minnesoty. Wosobinski lěkar prezidenta USA Sean Conley wočakuje, zo tón swoje nadawki jako prezident najebać koronainfekciju dale „bjez přestawki“ spjelnja. Kaž lěkar medijam wobkrući, so Trumpej a Melaniji derje dźe.
Z nalutowankami maćerje, 2 000 eurow, je dwanaćelětny pachoł ze sewjerorynsko-westfalskeho wokrjesa Minden-Lübbecke z ćahom prěki a podłu po Němskej jězdźił, a to hač do Lipska. W lisće wón maćeri přeradźi, zo chce tam někoho wopytać. Policija móžeše mobilny telefon hólca w spěšniku ICE lokalizować. Zastojnicy w Lipsku hižo čakachu a přepodachu jeho maćeri, kotraž bě tohorunja přijěła. „Zhromadnje a jara zbožownaj“ so wobaj wječor pozdźe na dompuć nastajištaj.
Na njewšědne nócne zasadźenje su policiju w delnjosakskim Celle wołali. 60lětna prošeše jich w 3 hodź. wo pomoc, dokelž bě so z nawušnicu w zawku konopeja zapopadnyła. Hodźiny trajace pospyty wuswobodźenja po wšěm zdaću ničo njepomhachu. Zastojnicy móžachu skónčnje pomhać a su zawk wot žony „fachowsce“ dźělili.
Berlin (dpa/SN). Němske zwjazkowe knježerstwo je wšu Belgisku, Islandsku a dalše regiony zapadoeuropskich krajow jako rizikowe kónčiny zastopnjowało. Roberta Kochowy institut bě wčera wječor aktualizowanu rizikowu lisćinu předpołožił, po kotrejž stej z Waliziskej a Sewjernej Irskej prěni króć tež regionaj Wulkeje Britaniskeje potrjechenej. Prěni króć stejitej tež baltiskej stataj Estiska a Litawska na lisćinje. Nimo toho su regiony w Irskej, Chorwatskej, Słowjenskej, Madźarskej a Rumunskej k tomu přišli.
Nuzowy staw w Słowakskej
Bratislava (dpa/SN). Raznje rosćaceje ličby koronainfekcijow dla je słowakske knježerstwo wčera nuzowy staw wukazało, z čimž maja zamołwići daloko sahace prawa. Tak smědźa na přikład lěkarski personal z dowola wołać. Słowakska bě wot měrca hač do junija hižo raz nuzowy staw wukazała. Nowy wukaz wopřijima tež zakaz demonstracijow, zarjadowanjow a Božich słužbow. Katolska cyrkej wšak na to skedźbnja, zo smědźa jenož biskopja kemše zakazać, nic pak stat, byrnjež wón duchownych płaćił.
Rasistiska skupina wotkryta
Drježdźany (dpa/SN). Składnostnje 30. róčnicy znowazjednoćenja Němskeje 3. oktobra społnomócnjeny SPD za wuchodnu Němsku Martin Dulig namołwja, rozdźěle mjez wuchodom a zapadom akceptować. „Mam za fatalne wěrić, zo je jednota kraja hakle zwoprawdźena, hdyž njeje žanych rozdźělow wjace“, rjekny krajny předsyda sakskeje SPD a hospodarski minister kraja powěsćerni dpa. Zo je rozdźělnych žiwjenskich nazhonjenjow, biografijow a stejišćow k wšelakim wěcam, móže bjeze wšeho wobohaćace być. „Njech je žiwy rozdźěl“, Martin Dulig měni.
Rubjenu kokoš přisadźiła je liška w Röbelu w mecklenburgskej jězorinje. Wona bě so runje z kokošaceje farmy nawróćiła a měješe po zdaću problemy, z ćežkej kokošu w klamje dróhu přeprěčić, jako awto do njeje razy. Liška je kokoš ležo wostajiła a so zminy. Šofer awta wosta njezranjeny.
Swoju zhubjenu kreditnu kartku wonkowny minister Heiko Maas mjeztym zaso ma. Sobudźěłaćer kupnicy w Berlinje-Zehlendorfje so njemało dźiwaše, jako kartu politikarja SPD mjez regalemi ležacu wuhlada. Zo móžeše ju 54lětny bórze zaso w rukomaj dźeržeć, je zasłužba Berlinskeje policije. Wonkowne ministerstwo je so mjeztym Berlinskemu policajskemu prezidentej za spěšnu reakciju dźakowało. Maas bě kreditnu kartku hižo kónc julija zhubił, prjedy hač dyrbješe na koronu schorjeneho sobudźěłaćerja dla do karanteny.
Berlin (dpa/SN). Turkowska rani po posudźowanju němskeho wonkowneho ministerstwa demokratiske zakładne prawa. „Turkowska wustawa garantuje prawo zhromadźowanja, swobodu medijow a měnjenja. W praksy pak wone w dalokej měrje njepłaći“, rěka w dowěrliwym posudku nastupajo azylowe prawo, kiž powěsćerni dpa předleži. Turkowske ćišćane a telewizijne medije su „nimale dospołnje podwólne“. Posudk słuži zamołwitym při rozsudach nastupajo móžne wotsunjenje migrantow do domizny.
Mjenje bjezdźěłnych
Nürnberg (dpa/SN). Ličba bjezdźěłnych w Němskej je w septembru najebać koronakrizu wo 108 000 na nětko 2,847 milionow woteběrała. To je 613 000 wjace hač před lětom, kaž zwjazkowa dźěłowa agentura zdźěli. Bjezdźěłnostna kwota wučinja nětko 6,2 procentaj. Tež w Sakskej ličba bjezdźěłnych woteběra. W septembru bě 132 800 ludźi bjez dźěła, 5 000 mjenje hač měsac do toho. Kwota bjezdźěłnosće zniži so na 6,3 procenty.
Dalše wojowanja w Kawkazu