Powołanske kubłanje zhusćić
Naćisk kultusoweho ministerstwa reaguje na změny dźěłoweho swěta
Drježdźany (dpa/SN). Sakska chce poskitki powołanskeho wukubłanja zhusćić a při tym tež wjesne kónčiny sylnić, kaž z naćiska kultusoweho ministerstwa wuchadźa. „Dyrbimy hladać, na kotrych městnach wukubłanje dołhodobnje a w dobrej kwaliće zaměstnimy. Dźe wo wěstotu planowanja za wšitkich wobdźělenych“, rjekny kultusowy minister Christian Piwarz (CDU) powěsćerni dpa. „Dźěłowy swět so razantnje měnja. Nowe powołanske wukubłanja k tomu přińdu, dalše njejsu hižo tak prašane.“ Najebać to chcył stat zastaranje nastupajo powołanske wukubłanje dale zaručić, minister rjekny.
Wótry wołojnik (20.05.20)
To a tamne (20.05.20)
Nic jenož přespěšnje, ale tež hišće wopojeny je sobudźěłaćer pochowanskeho předewzaća ze swojim słužbny wozom na awtodróze A 24 pola Hamburga po puću był. W běłym awće steješe kašć z ćěłom. Šofer jědźeše 120 město dowolenych 80 km/h, jako wón ciwilne jězdźidło policije přesćahny. Test drogow wujewi, zo je 36lětny do jězby canabis brał. Dale jěć wón njesmědźeše. Awto z kašćom a ćěłom dyrbješe druhi šofer wotewzać.
Młody muž, kiž bě so w Awstralskej do muzeja zadobył a so z nopom dinosawriera fotografował, je z Němskeje. 25lětny dyrbi so nětko před regionalnym sudnistwom zamołwić, policija stata New South Wales zdźěla. Wón bě so před dźesać dnjemi do awstralskeho muzeja zadobył a so tam „přechodźował“. Při tym so stajnje zaso z mobilnym telefonom sam fotografowaše. Policija je jeho kónc tydźenja zajała, po tym zo běchu wobrazy awtomatiskeje kamery wuhódnoćili. Přepytowanski sudnik jeho pod wuměnjenjom pušći, zo so 1. junija zaso přizjewi.
Čušlenje BND njezakonske
Karlsruhe (dpa/SN). Masowe zběranje datow bjez wosebiteje přičiny we wukraju přez Zwjazkowu tajnu słužbu (BND) rani w swojej tuchwilnej formje zakładne prawa. To je Zwjazkowe wustawowe sudnistwo w Karlsruhe dźensa zwěsćiło. Sudnicy wotpowědowachu skóržbje organizacije za čłowjeske prawa Reporterojo bjez mjezow a wjacorych žurnalistow. Zakoń wo dźěle BND we wukraju dyrbja hač do kónca lěta 2021 předźěłać.
Trump hrozy zarjadej WHO
Washington (dpa/SN). W konflikće z Chinu koronapandemije dla je prezident USA Donald Trump hrozył, zo ze swětoweje strowotniskeje organizacije (WHO) wustupi. Njedyrbjała-li so WHO w běhu 30 dnjow k „zasadnym polěpšenjam“ zawjazać, wón płaćenje přinoškow na dobro WHO přetorhnje a chce dalše čłonstwo w organizaciji pruwować, rěka w spisu Trumpa nawodźe WHO Adhanomej Ghebreyesusej. Trump zarjadej WHO wumjetuje, zo je sobu wina na rozpřestrěću koronawirusa a zo je „marioneta Chiny“.
Warnuje před druhej žołmu
We wjacorych městach Němskeje su wčera zaso přećiwo ...
Jana Pawoła II. hódnoćił
Rom (dpa/SN). Bamž Franciskus je po tydźenje trajacym zawrjenju koronakrizy dla katedralu swj. Pětra w Romje z Božej mšu k 100. narodninam Jana Pawoła II. zaso wotewrěł. Franciskus wuzběhny pólskeho bamža při toho rowje jako „muža Božeho“ a sprawnosće, kiž bě swojemu ludej stajnje bliski. Karol Wojtyła, kiž je wot 1978 hač do swojeje smjerće w lěće 2005 swětowu katolsku cyrkej nawjedował, by wčera sto lět stary był.
Jan Pawoł „bě wšitkim bliski, wulkim a małym“, rjekny Franciskus. „Wón chcyše socialnu sprawnosć, sprawnosć mjez ludami, sprawnosć, kotraž wójny zahnawa.“ Na Božej mši z bamžom bě něhdźe 30 duchownych přitomnych. Pětrowe naměsto a katedrala swj. Pětra běštej wot 10. měrca koronapandemije dla zawrjenej. Wot wčerawšeho smědźa ludźo baziliku zaso wopytać, ale po krutych předpisach.
Kretschmer so zakituje
Čěska a Słowakska dale zawrjenej
Praha/Bratislava (dpa/SN). Čěska republika je koronakrizy dla wukazany nuzowy staw w nocy na póndźelu zběhnyła. Přiwšěm je ludźom z Němskeje a druhich krajow dale zakazane do kraja zapućować, kaž rěčnik nutřkowneho ministerstwa na naprašowanje powěsćernje dpa potwjerdźi. Čěske strowotniske ministerstwo bě minjeny kónc tydźenja wotpowědny wukaz „Za škit před předrěćom covid-19“ wozjewiło. Wuwzaća su za wukrajnikow, kotřiž w Čěskej bydla. Woni dyrbja na mjezy negatiwny test korony předpołožić abo so 14 dnjow do karanteny podać. Čěska měješe hač do soboty 8 406 wobkrućenych natyknjenjow z koronawirusom a 295 smjertnych padow.
Tež Słowakska dale na swojich raznych rjadowanjach nastupajo zapućowanje a kontrole na mjezach wobstawa, kaž knježerstwo w Bratislavje zdźěli. „Nadźijamy so dalšeho wolóženja pola nas w Słowakskej. Ze škitnymi naprawami na mjezy pak dyrbimy kedźbliwi być“, z Bratislavy rěka. Słowakska ma dotal 1 494 natyknjenych a 28 na koronu zemrětych.
Zhromadnje so zadołžić
Kanclerka Merkel a prezident Macron z planom za čas po koronakrizy
Berlin (dpa/SN). Po předstajenju němsko-francoskeje iniciatiwy za pomocny program Europskeje unije, přewinyć sćěhi koronakrizy, je němska zwjazkowa kanclerka Angela Merkel (CDU) dźensa z ministerskimi prezidentami tak mjenowaneje Visegrádskeje štyrki wuradźowała. K skupinje słušeja Čěska, Pólska, Madźarska a Słowakska.
To a tamne (19.05.20)
Pod sylnym wliwom drogow stał je 35lětny muž, jako bě ze swojim awtom na awtodróze 57 pola Dormagena do směra na Köln po puću. Jědźeše tajku seklojtu čaru, zo dyrbjachu druzy šoferojo zas a zaso borzdźić. Nadobo wón zasta, wulěze napoł nahi z awta a přeprěči awtodróhu. Nawróćiwši so muž zaso wotjědźe. Wosrjedź Kölna policija jeho skónčnje zadźerža a sobu wza.
Wopačneho policista su při wobchadnej kontroli w Bayerskej lepili. Zastojnicy běchu 42lětneho ze Sakskeje zadźerželi, dokelž bě jeho awto w chětro špatnym stawje. W awće namakachu samopasleny słužbny wupokaz, trašawku, municiju, nóž a policajsku čapku ze sakskim woponom. Hač bě čapka originalna, policija njewě. Wupokaz „sakskeje wěstotneje straže“ to na žadyn pad njebě. Nimo toho njebě awto scyła přizjewjene.
