Maas: Bjez atomowych bróni
New York (dpa/SN). Zwjazkowy wonkowny minister Heiko Maas (SPD) je w Bjezstrašnostnej radźe UNO namołwjał, zaměr swěta bjez jadrowych bróni z wočow njezhubić. Je načasu přetorhnjene jednanja wo wotbrónjenju zaso wožiwić, rjekny politikar SPD wčera w najwažnišim gremiju UNO. Wšitke pjeć čłonow rady – USA, Ruska, China, Francoska a Wulka Britaniska – maja atomowe brónje.
Škody wjetše, hač myslene
Berlin (dpa/SN). W lěsach Němskeje su suchota, wichory a bruki wjetše škody zawostajili, hač dotal myslene. Po nowych zwěsćenjach dyrbja 245 000 hektarow – płonina je tak wulka kaž Posaarska – město dotal zwěsćenych 180 000 hektarow znowa zwosadźeć, zwjazkowe ratarske ministerstwo zdźěla. Ličić mamy lětsa ze 160 milionami kubiknych metrow škodowaneho drjewa. Wosebje potrjechene su Sewjerorynsko-Westfalska, Saksko-Anhaltska, Hessenska a Durinska.
Wuradźuja wo nadpadźe
Cyrkwi so hladajo na wusud starosćitej
Karlsruhe (dpa/SN). Katolska a ewangelska cyrkej stej starosćiwje na rozsud Zwjazkoweho wustawoweho sudnistwa nastupajo pomoc k wumrěću reagowałoj. „Wusud zasahuje hłuboko do našeje kultury, kotraž je na pěstowanje a podpěru žiwjenja wusměrjena“, zdźělatej předsydaj Němskeje biskopskeje konferency, kardinal Reinhard Marx a předsyda rady Ewangelskeje cyrkwje w Němskej, krajny biskop Heinrich Bedford-Strohm, w zhromadnej deklaraciji. „Wobsteji strach, zo přizwolenje organizowanych poskitkow sebjemorjenja starych a chorych ludźi na subtilne wašnje pod ćišć sadźeja, tute poskitki tež wužiwać.“
Pytaja za póstnicarjemi wirusa dla
Mönchengladbach (dpa/SN). Po pjeć wobkrućenych padach schorjenjow na corona-wirus w Sewjerorynsko-Westfalskej pytaja zamołwići z wjetšimi akcijemi za dalšimi móžnymi natyknjenymi. W městačku Gangelt je 300 wopytowarjow póstniskeho zarjadowanja namołwjenych, so přizjewić. Wšitcy wopytowarjo a jich swójby dyrbja za 14 dnjow do domjaceje karanteny, zdźěli sewjerorynsko-westfalske strowotniske ministerstwo. W Mönchengladbachu pytaja za ludźimi, kotřiž mějachu kontakt k lěkarjej, kiž bě so z corona-wirusom natyknył. Z naprawami chcedźa tomu zadźěwać, zo so nowy wirus dale rozšěrja. Strowotniski minister Sewjerorynsko-Westfalskeje Karl-Josef Lauermann (CDU) bě pak hižo wčera wujasnił, zo njemóža zamołwići infekciske rjećazy wěsće zadźeržeć.
Zwjazkowy minister za strowotnistwo Jens Spahn z tym liči, zo so chorosć rozšěri. „Stejimy na spočatku epidemije corona-wirusa dla“, rjekny politikar CDU wčera w Berlinje. „Puć infekcije njemóžemy – a to je nowa kwalita – zdźěla wjace sćěhować. Dotalne strategije přećiwo wirusej měli pruwować.“
To a tamne (27.02.20)
Po puću k sterilizaciji ćeknył je muski pawian w awstralskim Sydneyju. Wón móžeše zhromadnje ze žónskimaj wopicomaj ćeknyć, po tym zo bě so jemu poradźiło zamk duri wočinić. Hakle po dwěmaj hodźinomaj jeho pomocnicy popadnychu. Mjeztym je pawian operowany a so wočerstwja. Žónce běštej jako emocionalna pomoc sobu. Wopicy su dźěl slědźenskeho projekta.
Zo jeho zakaz jězdźenja njestara, je 84lětny muž Augsburgskej policiji nazornje pokazał. Po tym zo bě sudnistwo jemu jězbnu dowolnosć sćazało, sydny so wón do awta a jědźeše na policajsku stražu. Tam žadaše sej swoju jězbnu dowolnosć. Zastojnicy drje jemu tam tež klučik awta wotewzachu, štož pak njepomhaše: Starc jědźeše z taksijom po rezerwowy klučik a z awtom skradźu wotjědźe, kotrež pola policije steješe. Zastojnicy tuž 84lětneho wopytachu a jemu tež druhi klučik wotewzachu.
Šofer w přepytowanskej jatbje
Volkmarsen (dpa/SN). Přećiwo šoferej, kiž bě róžowu póndźelu ze swojim wosobowym awtom w sewjerohessenskim Volkmarsenje do póstniskeho ćaha zajěł a 60 ludźi zranił, su přepytowansku jatbu wukazali. 29lětnemu wumjetuja pospytane morjenje, strašne zranjenje ćěła a strašne zasahnjenje do nadróžneho wobchada. Přiwšěm su jeho motiwy dale njejasne. Policija přepytuje „do wšěch směrow“. Mjez zranjenjemi je 20 dźěći.
Mortwi při namócnosćach
New Delhi (dpa/SN). Znajmjeńša 20 ludźi je při najhóršich namócnosćach minjenych lětdźesatkow w indiskej stolicy New Delhiju žiwjenje přisadźiło. Ně-hdźe 190 zranjenych su do chorownjow dowjezli, policija zdźěla. Wot spočatka tydźenja so wjacore skupiny z kamjenjemi a retlemi stajnje zaso do so dawaja. Při tym zapaleja tež mošeje, wobchody a awta. Pozadk namócnosćow je nowy zakoń wo zapućowanju, kotryž bě ministerski prezident Narendra Modi jako nacionalistiski hindu přesadźił. Mjeńšina muslimow w kraju čuje so diskriminowana.
Wola ministerskeho prezidenta
Zapósłanc CDU w Sakskim krajnym sejmje Marko Šiman je we wobłuku ...
W jamjezaso dźěłaja
Janšojce (dpa/SN). Wot spočatka wčerawšeje rańšeje změny w Janšojskej brunicowej jamje zaso wuhlo wudobywaja. Něhdźe 180 sobudźěłaćerjow je tam znowa dźěłać započało, po tym zo bě wudobywanje minjene měsacy přetorhnjene, rěčnik wobhospodarjerja LEAG Thoralf Schirmer zdźěli. Tak jama njedaloko Choćebuza zaso w normalnym rytmusu dźěła. Cyłkownje je tam wjace hač 600 ludźi w třoch změnach zasadźenych.
Dźěło w brunicowej jamje dyrbjachu 1. septembra 2019 přetorhnyć, dokelž njepředležeše pruwowanje wobswětoweje znjesliwosće. Nětko je krajny zarjad za hórnistwo, geologiju a surowizny po informacijach energijoweho předewzaća hłowny zawodny plan 2020 do 2023 schwalił. Do toho běchu wobšěrnje pruwowali, hač so brunicowa jama z rostlinami a zwěrinu kaž tež z biotopami znjese. Sudnistwo bě wudobywanje brunicy po skóržbje wobswětoškitarjow přetorhnyło.
Parki jara ćerpja
Corona-wirus so dale rozšěrja
Stuttgart/Düsseldorf (dpa/SN). Nowy corona-wirus su nětko prěni króć tež w Badensko-Württembergskej a Sewjerorynsko-Westfalskej zwěsćili. Strowotny staw pacienta w Sewjerorynsko-Westfalskej je po informacijach zamołwitych kritiski. Jeho su wčera do Düsselsdorfskeje uniwersitneje kliniki dowjezli. Wón měješe kontakt k wosobje, kotraž bě słužbnje dlěši čas w Chinje była.
Muž w Badensko-Württembergskej ma na gripu podobne symptomy. Wón bě so prawdźepodobnje na jězbje po Italskej z wirusom natyknył. Lěkarjo pytaja nětko za dalšimi kontaktnymi wosobami. Italska je europski kraj z dotal najwjace padami noweje chorosće.
W sewjerorynsko-westfalskim wokrjesu Heinsberg wostachu šule, pěstowarnje a krajnoradny zarjad dźensa zawrjene. Dopołdnja njeběchu hišće rozsudźili, hač tež zjawny bliskowobchad přetorhnu. Mjeztym su krizowy stab zestajeli, kotryž ma wuski zwisk k Düsseldorfskemu strowotniskemu ministerstwu. Strowotniski zarjad pyta za kontaktnymi wosobami.
Merz: CDU wróćo do srjedźizny
Třo kandidaća za předsydu strony wuprajeja so k swojim pozicijam
Berlin (dpa/SN). Kandidat za předsydu zwjazkoweje CDU Friedrich Merz chcył, „zo CDU swój spektrum zaso rozšěrja“. W rozmołwje w telewiziji ARD wón wčera wječor rjekny: „Steju za to, zo na zakładźe našeho zhromadneho politiskeho fundamenta tež liberalnych a konserwatiwnych wolerjow w Němskej, kotrychž smy minjene lěta widźomnje zhubili, wróćo zdobudźemy, zo tež młodych ludźi wróćo zdobudźemy.“
Merz spjećowaše so posudkej, zo chcył CDU na prawy bok přesunyć. Tak, kaž so strona tuchwilu prezentuje, je wona wočiwidnje „wolerjow do wšěch směrow zhubiła, čłonow připódla prajene tež. Tohodla chcu z jasnym wuprajenjom nastupić, zo wulki dźěl tych wolerjow wróćo zdobudźemy.“ To njeje skok na prawicarski bok, wón rjekny. „To je kročel do srjedźizny a wróćo na městno, hdźež swěrni wolerjo unije něhdy běchu a hdźež su so wot nas wotwobroćili.“
