Sakska hotuje so na swinjacu mrětwu
Drježdźany (dpa/SN). Sakska hotuje so z wotmachom na móžne wudyrjenje afriskeje swinjaceje mrětwy z wulkim a wobšěrnym zwučowanjom w padźe zwěrjaceje epidemije. „Přezwučujemy wšitke móžne scenarije, kaž by mrětwa woprawdźe wudyriła“, zdźěli rěčnica Drježdźanskeho ministerstwa za škit přetrjebarjow. Wot wčerawšeho hač do štwórtka zwučuja zarjadnistwa, komuny, hońtwjerjo a ratarjo na wšelkich městnach w swobodnym staće tak mjenowany chutny pad. Hižo wot nalěća wulkozwučowanje akribisce přihotuja. Dokelž je mrětwa dźeń a bliša, je zwučowanje jara trěbne.
Najprjedy wuhlo, potom atom
Köln (dpa/SN). Ministerski prezident Sewjerorynsko-Westfalskeje Armin Laschet kritizuje w zwisku z kóncom zmilinjenja brunicy wopačne ćežišća němskeje energijoweje politiki. „Hdyž stej wuhlikowy dioksid a swětowa klima najwjetšej problemaj, wo kotrejž mamy so starać, da bě slěd postupowanja wopačny“, rjekny Laschet wčera Berlinskim rozhłosownikam. Němska dyrbjała najprjedy zmilinjenje brunicy skónčić, město toho zo jadrowe milinarnje wotpinje, politikar CDU wuzběhny.
Zdobom Armin Laschet kritizowaše, zo su ludźo kóždemužkuli wudobywanju energije napřećo skeptisce nastajeni. „Mjez Němcami knježi mentalita, zo poprawom ničo nochcedźa.“ Nimo wuhla a atomoweje mocy woni ruski płun wotpokazuja, dokelž přińdźe wot Putina, tež ameriski płun nochcedźa, dokelž jón přez fracking wudobywaja. Wětrniki su tohorunja mjeztym njewoblubowane. Hladajo na přichodne zastaranje z energiju w Němskej Laschet měnješe: „Druhdy sej mysliš: Kak ma to wšo poprawom hić?“
Dale a wjace wjelkow w kraju
Najnowši monitoring předstajeny – zwjazk hajnikow ličby kritizuje
Bonn (dpa/SN). W Němskej je 105 wjelčich črjódow. To je wuhódnoćenje wjelčeho monitoringa 2018/2019 wunjesło, zdźělatej Zwjazkowy zarjad za přirodoškit a Dokumentaciski a poradźowanski běrow Zwjazka k temje wjelki w Bonnje. Po tym so jich wobstatk dale na teritorij koncentruje, kotryž saha wot sakskeje Łužicy do sewjerozapadneho směra po Braniborskej, Saksko-Anhaltskej a Mecklenburgsko-Předpomorskej hač do Delnjeje Sakskeje.
Wjelča črjóda wobsteji zwjetša z třoch do jědnaće zwěrjatow, to rěka ze staršeju a potomnikow minjeneju dweju lět. Najwjace tajkich cyłkow je w Braniborskej (41). Slědujetej Sakska (22) a Delnja Sakska (21). Po monitoringu je nimo 105 wjelčich črjódow hišće 25 zwěsćenych wjelčich porow a 13 zadomjenych jednotliwych wjelkow. W monitoringu 2017/2018 běchu po wšej Němskej 77 črjódow, 40 porow a tři jednotliwe wjelki zwěsćili.
Wo wěrnosć njerodźa
Wotličenja problematiske
To a tamne (03.12.19)
Šoferka, kotraž bě njedźelu ze swojim awtom do šachta awtoweho lifta Drježdźanskeho parkowanskeho domu zrazyła, steješe pod wliwom drogow a njewobsedźeše ani jězbnu dowolnosć. Při tesće je policija amfetaminy dopokazała. 33lětna bě zawrjene durje lifta přerazyła a šěsć metrow do hłubiny padnyła. Kaž dźiw pak so wona jeno snadnje zrani. Wěcna škoda na lifće a wosobowym awće wšak wučinja dohromady 70 000 eurow.
Na wosuški a hodowne chłóšćenki su so paduši na adwentnych wikach w Drježdźanach-nowym měsće měrili. Kaž policija zdźěla, běchu so njeznaći w nocy na njedźelu do jednoho z natwarjenych předawanskich stanow zadobyli a so tam posłužowali. Mjez druhim pokradnychu 50 wosuškow. Spakosćene twory su wjacore sta eurow hódne.
Wočakuje wobćežne reformy
Osnabrück (dpa/SN). Katolska cyrkej Němskeje steji před wobšěrnym nutřkocyrkwinskim diskusijnym a reformowym procesom, při kotrymž maja lajkojo a klerikalni zasadne prašenja rozjimać. Osnabrückski biskop Franz-Josef Bode widźi swoju cyrkej w zasadnym konflikće mjez reformerami a konserwatiwnymi. „Synodalny puć je napinacy a trjeba swój čas“, rjekny wón powěsćerni dpa. Dwě lěće trajacy proces běchu wčera w tachantskich cyrkwjach Němskeje zahajili. Při tym su jeno za to zhotowjene swěčki zapalili. Hižo na swojej nalětnjej konferency w Lingenje běchu so biskopja na diskusijny proces z lajskej organizaciju, Centralnym komitejom katolikow Němskeje, dojednali. W štyrjoch forumach chcedźa nětko wo wjacorych ćežišćach diskutować. Su to prašenje mocy w cyrkwi, žiwjenske formy měšnikow, splažnosć abo zastojnstwa a słužby žonow w cyrkwi. Biskop Bode warnuje před přewulkimi wočakowanjemi na woběmaj stronomaj. „Njeje derje proces wuměny zahajić, hdyž wuslědk hižo znajemy.
Ratarjo pola kanclerki
Berlin (dpa/SN). Hladajo na trajace protesty ratarjow w Němskej je so zwjazkowa kanclerka Angela Merkel (CDU) dźensa ze zastupnikami něhdźe 40 ratarskich zwjazkow a organizacijow zetkała. Na zeńdźenju w kanclerskim zarjedźe dźěše mjez druhim wo nowe předpisy na dobro překasancow a dnowneje wody. Ratarjo žadaja sej wjace prawow sobuskutkowanja a warnuja před přewulkimi hospodarskimi brěmjenjemi.
Premier Malty chce wotstupić
Valletta (dpa/SN). Ministerski prezident kupy Malta Joseph Muscat je w krizy morjenja žurnalistki Daphny Caruana Galizia swój wotstup za kónc januara připowědźił. To zwurazni wón wčera w telewizijnej narěči. Muscat sćehnje tak konsekwency ze skandala morjenja knježerstwu napřećo kritisce nastajeneje žurnalistki před lětomaj. W awće schowana bomba bě 53lětnu žonu w oktobru 2017 moriła. Jako hłowneho zamołwiteho wuslědźichu nětko předewzaćela, kiž měješe dobre styki ke knježerstwu. Demonstranća w stolicy Valletta žadaja sej hnydomny wotstup premiera.
Trump njepřińdźe na słyšenje
Hłosy na dobro koalicije sylniše
Berlin (dpa/SN). Po překwapjacym dobyću Saskije Esken a Norberta Waltera Borjansa w boju wo nowe nawodnistwo zwjazkoweje SPD su dźeń a wótriše hłosy, kotrež wuprajeja so za zachowanje wulkeje koalicije SPD a CDU/CSU. Ze stron unije jewja so słabe signale, wo nowych projektach k dalewjedźenju čorno-čerwjeneho knježerstwoweho jednać chcyć. Přichodnaj předsydaj socialdemokratow staj hišće raz potwjerdźiłoj, zo mataj jednanja z uniju wo wobsahach zhromadneho knježenja za nuznje trěbne, zo njeby knježerstwo zwrěšćiło. Borjans a Esken běštaj wothłosowanje čłonow SPD wo nowym nawodnistwje strony z 53,06 procentami dobyłoj. Wuslědk bě překwapjacy, wšako běchu wodźacy politikarjo SPD přećiwnu dwójku Olaf Scholz/Klara Geywitz podpěrali. Wonaj pak běštaj z 45,33 procentami podležałoj.
Po wólbach nawodnistwa SPD je městopředsyda CDU Volker Bouffier wotpokazał, koaliciske zrěčenje předźěłać. „Mamy płaćiwe koaliciske zrěčenje. Njetrjebamy wo nim znowa jednać.“
Sakska koalicija wutworjena
W zrěčenju mjez CDU, Zelenymi a SPD tež zajimy Serbow zakótwjene
Drježdźany (dpa/SN). Tři měsacy po wólbach krajneho sejma w Sakskej su CDU, Zeleni a SPD swoje koaliciske zrěčenje předstajili. Ministerski prezident Michael Kretschmer (CDU) mjenowaše přichodny knježerstwowy zwjazk „saksku koaliciju. Je to koalicija, kotraž chce stabilnje a w mjezsobnej dowěrje přichodne pjeć lět na dobro tohole kraja dźěłać.“ To rjekny Kretschmer wčera, jako předstaji koaliciske zrěčenje w Drježdźanskim krajnym sejmje.
