Wjetša konkretnosć

Dienstag, 29. Oktober 2019 geschrieben von:
Bytostne temy nastupajo Serbow maja jednanje přichodneho braniborskeho knježerstwa sobu postajeć. Koalicionarojo na dotal docpěte nawjazuja a přiwozmu nowe aspekty. Tajki je na přikład připowědźena koncepcija wjacerěčnosće za delnjoserbšćinu a pólšćinu wot žłobika hač k abiturje. Byrnjež třiceći lět trało, prjedy hač su so politikarjo k tajkej wažnej kročeli předrěli, je to optimistiske znamjo. Wuprajenje, zo chcedźa prawje bórze serbske šulske postajenje wobzamknyć, je wězo z prašakom zwjazane. Wšako su so jednanja ze serbskej stronu bjez wuspěcha přez cyłu minjenu legislaturnu periodu dlijili. Dokelž swědča podate přede­wzaća k serbskim wobłukam, inkluziwnje jasnje zwyšeny podźěl za financowanje Załožby za serbski lud, wo wjetšej konkretnosći hač we wotpowědnych dokumentach minjenych knježerstwow, zdawa so koaliciske zrěčenje konstruktiwny zakład za wobkedźbowanje serbskich za­jimow być. Axel Arlt

To a tamne (29.10.19)

Dienstag, 29. Oktober 2019 geschrieben von:

Britiski husler je swoju drohotnu, 310 lět staru wiolinu w ćahu zabył. Hladajo na stratu něhdźe 290 000 eurow droheho instrumenta je wón dospołnje zludany, rozprawja hudźbnik Stephen Morris. Jedna so wo wiolinu Davida Tecchlera z časa baroka. Jeho instrumenty najlěpši hudźbnicy wužiwaja. Morris, kiž w Londonje bydli, je hižo wuměłcow, kaž su to Andrea Bocelli, David Bowie a Steve Wonder, na koncertach přewodźał. Dyrbjał-li něchtó husle w běłym kófru namakać, njech so pola njeho přizjewi, Stephen Morris prosy.

Njeznaty šofer awta je w poruhrskim Hagenje parkowacy Opel wobškodźił a njewšědne poselstwo zawostajił: Na popisanej serwjeće při woknje awta steješe: „Sorry, dyrbjach so wuwinyć a nimam pjenjezy.“ Wopor, 43lětna mějićelka Opela, přepoda pismo policiji, kotraž nětko za swědkami pyta.

Globalne lěto biblije

Montag, 28. Oktober 2019 geschrieben von:

Washington (B/SN). Zastupjerjo křesćanskich organizacijow z wjace hač 34 krajow zahajichu minjeny měsac we Washingtonskim Bibliskim muzeju kam­panju „2020 po Chrysće – Globalne lěto biblije“. Je to prěnja iniciatiwa toho razu, kotruž zamołwja Swětowa ewangelska alianca w zhromadnym dźěle z organi­zacijemi kaž z Misionskim towarstwom Wycliff a swětowym zjednoćenstwom CVJM. Kampanja chce mjez druhim k tomu pohonjeć, zo so křesćenjo we wšěch wobłukach žiwjenja ze słowom Božim bóle rozestajeja a wo nim rozmysluja.

Ćežka kooperacija

Brexit znowa přestorčeny

Montag, 28. Oktober 2019 geschrieben von:

Brüssel (dpa/SN). Čłonske staty Europskeje unije su so dojednali, termin brexita hač do 31. januara 2020 podlěšić, kažprezident Rady EU Donald Tusk w Brüsselu zdźěli. Datum pak ma fleksibelny być. Su-li wotpowědne wuměnjenja date, móhła Wulka Britaniska tež prjedy EU wopušćić. Tohorunja dźensa chcyše bri­tiski premierminister Boris Johnson w Londonje wo nowowólbach 12. decembra wothłosować dać. Dotal pak w parlamenće za to žanu wjetšinu nima.

Lěsne wohenje dale cychnuja

San Francisco (dpa/SN). Zahubne lěsne wohenje w Kaliforniskej so dale rozšěrjeja. Wjacore dny cychnowace płomjenja su mjeztym dźesatki statokow zničili a dźesaćitysacy wobydlerjow wuhnali. Najhórši je woheń tuchwilu w Sonoma County, winowej kónčinje 120 kilometrow južnje San Francisca. Tam so tuchwilu na sto kwadratnych kilometrach pali. 185 000 wobydlerjow je namołwjenych swoje domy wopušćić.

Šefa EZB rozžohnowali

Strony maja zrěčenju přihłosować

Montag, 28. Oktober 2019 geschrieben von:

Podstupim (dpa/SN). Po wotzamknjenju koaliciskeho zrěčenja tak mjenowaneje keniaskeje koalicije mjez SPD, CDU a Zelenymi w Braniborskej dyrbja nětko po­trjechene strony přihłosować. To ma so přichodne tydźenje stać. CDU a Zeleni chcedźa so swojich čłonow woprašeć, hač zrěčenju přihłosuja. SPD planuje 16. nowembra wurjadny stronski zjězd. Štyri dny pozdźišo, 20. nowembra, chcedźa ministerskeho prezidenta Dietmara Woidkeho (SPD) znowa do zastojnstwa wuzwolić.

Amtěrowacy financny minister Bra­niborskeje Christian Görke (Lěwica) wujednane koaliciske zrěčenje kritizuje: „W nim su wšěm wšitko přilubili“, rjekny wón w inforadiju RBB. „Nětko chcedźa tutón zwjazk z pjenjezami hromadźe dźeržeć“, wón šwika. Görke stronam wumjetuje, zo chcedźa cyłu miliardu eurow kredita brać. Wón je sej wěsty, zo su wšitke wažne projekty tež bjez kredita za­płaćomne. Wšako ma kraj nalutowanki dweju­ miliardow eurow.

Dźěći profesionelnje kubłane

Montag, 28. Oktober 2019 geschrieben von:

Berlin (dpa/SN). W mjezynarodnym přirunanju wobswědčeja němskim pěstowarnjam a žłobikam wosebje wysoku facho­wu kompetencu. To wujewja pře­pytowanje Organizacije za hospodarske zhromadne dźěło a wuwiće (OECD), kotrež su minjeny pjatk w Berlinje předstajili. Po tym je 97 procentow pěstowarkow a 95 procentow žłobikarkow za dźěło z dźěćimi wosebje wukubłanych. To je najwjetši podźěl přirunujo z druhimi přepytowanymi krajemi. OECD bě so 18 000 nawodow a fachowcow w Chile, Danskej, Němskej, Islandskej, Israelu, Japanskej, Južnej Koreji, Norwegskej a Turkowskej woprašała. To běchu kraje, kotrež su na tajkim přepytowanju zajimowane byli. Naprašniki běchu tak zdźěłane, zo běchu wuslědki najebać kulturne rozdźěle přirunajomne, OECD zdźěla.

Přemóžaca wjetšina kubłarkow a kubłarjow w Němskej je ze swojim powo­łanjom spokojom (93 proc.). Nastupajo připóznaće w towaršnosći a wotpowědne płaćenje widźa so w Němskej porno druhim krajam skerje na niskej runinje.

Lěwica w Durinskej najsylniša

Montag, 28. Oktober 2019 geschrieben von:

Po wólbach Erfurtskeho krajneho sejma liča z wobćežnymi jednanjemi

Erfurt (dpa/SN). Bodo Ramelow je wusahowacy dobyćer wčerawšich wólbow Durinskeho krajneho sejma: Lěwica ministerskeho prezidenta sta so wčera prěni króć scyła w jednym ze zwjazkowych krajow Němskeje z najsylnišej politiskej mocu, štož je wobkedźbowarjam runjewon historiski podawk. Přiwšěm je dotalna koalicija Lěwicy a SPD wotwolena. CDU, kotraž bě wot lěta 1990 při kóždych wólbach najsylniša politiska móc, je runje tak historisce swój najšpatniši wuslědk žnjała. Wona přińdźe na třeće městno za AfD, kiž móžeše swój wuslědk podwojić. Jednanja wo nowu koaliciju drje budu wobćežne.

Steinmeier za sprawny disput

Montag, 28. Oktober 2019 geschrieben von:
Berlin (dpa/SN). Zwjazkowy prezident Frank-Walter Steinmeier je so za bjezkopromisnje sprawne a respektne rozestajenje w towaršnosći wuprajił. „Štož zawěsće njetrjebamy – a dajće mi to aktualneje přičiny dla jasnje rjec – su agresiwne haćenja rozmołwow, zatrašenja a nadpady“, rjekny Steinmeier minjeny pjatk w Berlinje. „Měnju nadpady na pozdatnje njepři­jomnych politikarjow, kaž je so to w Göttingenje a Hamburgu stało, abo na dwělomnych profesorow w uniwersitnych žur­lach“, wón doda. Nichtó njetrjeba mjelčeć, hdyž so jemu něšto njelubi. „Tola druhim słowo zakazać chcyć, dokelž swójskemu wobrazej wo swěće njewotpowěduja, njeje akceptabelne“, Steinmeier podšmórny. Minjeny tydźeń běchu sta demonstrantow přednošk sobuzałožerja AfD Bernda Luckeho, kiž bě so jako profesor za hospodarstwo na Hamburgsku uniwersitu wróćił, masiwnje mylili. Póndźelu běchu lěwicarscy aktiwisća na Göttingenskej literarnej nazymje čitanju bywšeho nutřkowneho ministra Thomasa de Maizièra (CDU) zadźěwali. Steinmeier: „K demokratiji słuša na rozestajenjach so wobdźělić, ale jim njezadźěwać.“

To a tamne (28.10.19)

Montag, 28. Oktober 2019 geschrieben von:

Wumyslena stawiznička dweju dźěsći rozbitych škleńčanych duri dla je w Bayerskej wulkozasadźenje policije zawinowała. Wosom a dźesać lět starej holca a hólc staj nanej napowědałoj, zo bě jeju čorny zdrasćeny a zakukleny muž w by­dlenju w Moosthenningu nadpadnył. Při tym bě zadobywar hłowu dźesaćlětneho do duri dyrił. Policija na to z wja­corymi awtami za mužom pytaše. Wo­spjetne woprašowanje dźěsći pak wunjese, so bě so hólčec při šćěkanju ze sotru zakopnył a durje rozbił.

Z rekordnej ličbu wopytowarjow su so Essenske wiki hrow skónčili. Na wšě 209 000 ludźi bě minjene dny wiki za njeelektroniske hry wopytało, telko kaž hišće nihdy. Zarjadowarjam je to dopokaz, zo su tradicionalne hry tež w elektroniskim času prašane.

Kanclerski zarjad wotmołwił

Freitag, 25. Oktober 2019 geschrieben von:
Berlin/Budyšin (SN/CoR). Ze zarjada zwjazkoweje kanclerki je Serbski sejm na swoju próstwu připrajenje dóstał, zo ma Němska předwidźane, ILO-konwen­ciju 169 ratifikować (SN rozprawjachu). Serbski sejm widźi we wotmołwje zdobom „pozitiwnu wolu“ w zwisku z wuprošenym připóznaćom Serbow jako indige­ny lud w zmysle ILO-konwencije, a to, „zo pokaza na podpěru ludowych skupin a mjeńšin jako dźěl kulturneje a historiskeje identity“. Dalše stejišćo knježerstwoweho rěčnika pak zbudźa w Serbskim sejmje iritacije, dokelž tam rěka: „Dojednanje měri so na staty, na čejichž teritoriju bydla zwjetša koloni­zacije dla tak pomjenowane indigene wobydlerske skupiny. (...) W Němskej bydlace narodne mjeńšiny njesłušeja k domoródnym abo w kmjenach žiwym ludam w zmysle dojednanja.“ „Runje kolo­nizaciske stawizny pak serbski lud ma. To nochcemy jako wobkrućenje wotpo­kazanja napřećo serbskemu ludej akceptować“, wujasnja rěčnik sejmo­weho wuběrka wustawa/prawo Hajko Kozel. Serbski sejm chce so nětko z wotpowědnymi zastupjerjemi rozmołwjeć.

Serbska debata

Neuheiten LND