Naćisk předleži

Donnerstag, 19. September 2019 geschrieben von:
Berlin (dpa/SN). Kwota za elektroawta je mjez druhim wobsah naćiska klimoškitneho programa 2030, kotryž klimowy kabinet wobdźěłuje. Cyłkownje 138 stron wopřijacy dokument njeje hišće wobzamknjeny. Dźensa wječor pak zetka so nawodnistwo koalicije, zo by wo tym wuradźowało. Jutře zeńdźe so potom klimowy kabinet wuběrka zwjazkoweho knježerstwa, hdźež měli rozsudy wu­tworić. Nimo elektroawtow su tež wolijowe tepjenja tema. Wot lěta 2030 njeměli hižo nihdźe žane nowe zatwarić.

To a tamne (19.09.19)

Donnerstag, 19. September 2019 geschrieben von:

Hubjeneho zadźerženja dla staj dwaj turistaj w italskim měsće Venedig wysoku pokutu dóstałoj. Tam staj mužej z Čěskeje nahej do kanala skočiłoj a so wochłódniłoj. Zdobom spytaštaj pasantow na so skedźbnić. Kóždy z nich dyrbješe za přeń­dźenje chłostanje we wysokosći 3 000 eurow zapłaćić. W italskich historiskich městach dźiwaja zastojnicy na porjad. Hakle w juliju dyrbještej muž a žona z Berlina 1 000 eurow zapłaćić, dokelž stej sej na znatym Rialto-mosće kofej wariłoj.

W padźe pokradnjeneho złoteho hajzla w jendźelskim Cheltenhamje bu dalši muž zajaty, kotremuž wumjetuja, zo je pomhał 5,4 miliony eurow hódnu drohoćinku rubić. Po přesłyšowanju pak bu zaso pušćeny. Do toho su zastojnicy hižo 66lětneho muža zajeli. Złoty nuznik wuměłca­ Maurizioa Cattelana wostanje dale zhubjeny.

Kraj mytuje spěchowanje serbstwa

Mittwoch, 18. September 2019 geschrieben von:

Prěnje mytowanske wubědźowanje „Serbski přichod: Łužica – Sorbische/wendische Zukunft: Lausitz“ w Braniborskej je knježerstwowa społnomócnjena za naležnosće Serbow statna sekretarka dr. Ulrike Gutheil (SPD) wčera w Choćebuzu startowała. Přinoški maja so hač do 31. oktobra zapodać.

Choćebuz (HA/SN). Statna sekretarka w ministerstwje za wědomosć, slědźenje a kulturu je so wčera ze zastupjerjemi­ Domowiny, Załožby za serbski lud a serbskich institucijow w Choćebuskim Serbskim domje zetkała a jim nowe wubědźowanje předstajiła. W jeho wobłuku pytaja za přinoškami a projektami, kotrež buchu wot 1. junija 2014 zwoprawdźene, respektiwnje so hišće zeskutkownja. Přinoški hodźa so w štyrjoch kategorijach zapodać: pěstowanje a dalewuwiće serbskeje rěče; pěstowanje a wožiwjenje kultury a rjemjesła našeho ludu kaž tež pěstowanje nałožkow w běhu lěta na zakładźe němskeho zapiska imaterielneho kulturneho namrěwstwa; pěstować a dale wuwić němsko-serbsku zhromadnosć a wuwědomić zhromadne serbsko-němske stawizny kaž tež serbske přinoški k strukturnej změnje we Łužicy.

Wjetšinu njedocpěłoj

Mittwoch, 18. September 2019 geschrieben von:

Jerusalem (dpa/SN). Hladajo na wólby parlamenta w Israelu njejstaj dotalny šef knježerstwa Benjamin Netanjahu ani jeho přećiwnik Benny Gantz wjetšinu hłosow wolerjow dóstałoj. Wobaj staj ze swojimaj zwjazkomaj stajnje jenož 32 mandatow docpěłoj. Z tym nima nichtó wjetšinu cyłkownje 120 sydłow w parlamenće. Israelski prezident Reuven Rivlin ma nětko rozsudźić, komu nadawk da, knježerstwo wutworić. Za to naprašuje so wón we wšitkich frakcijach parlamenta.

Wuradźuja wo reakciji

Riad (dpa/SN). Po nadpadźe na wažne wolijowe rafinerije w Sawdi-Arabskej chce so wonkowny minister USA Mike Pompeo dźensa w měsće Dschidda ze sawdi-arabskim nawodnistwom a princom Mohammedom bin Salmanom zetkać. Zhromadnje chcedźa wo reakciji na nadpady wuradźować. Huthi rebelojo z Jemena su mjeztym přiznali, zo su za to zamołwite. Pompeo měješe dotal Iran za skućićela.

Přećiwo wyšej podruži

Wulka bjezradnosć mjez sobujěducymi ćahow knježeše wčera wječor na dwórnišću w Hannoveru. Njewjedro bě na sewjeru Němskeje zachadźało a mnoho železniskich čarow bě powróćenych štomow dla njewužiwajomnych. Tuž informowachu so ludźo wo móžnosćach tola hišće swój cil docpěć. Němska železnica pak je tež ćahi k dispoziciji stajiła, hdźež móžachu pasažěrojo přenocować. Foto: dpa/Peter Steffen

Weber spřećiwja so Johnsonej

Mittwoch, 18. September 2019 geschrieben von:

Straßbourg (dpa/SN). Europski politikar CSU Manfred Weber so britiskemu premierministrej Borisej Johnsonej w zwadźe brexita dla masiwnje spřećiwja. „Njeje žanoho postupa, to je absolutnje jasne“, rjekny frakciski šef Europskeje ludoweje strony wčera w parlamenće EU w Straßbourgu. Johnson bě do zetkanja ze šefom komisije EU Jeanom-Claudom Junckerom póndźelu w Brüsselu twjerdźił, zo je na puću k změnjenemu zrě­čenju wo wustupje Wulkeje Britaniskeje z EU zasadnych polěpšenjow. Porno tomu w Brüsselu přeco hišće na britiske namjety čakaja, Weber potwjerdźi.

Tón zdobom kritizowaše, zo je Johnson planowanu nowinarsku konferencu napřećiwneje demonstracije dla wotprajił. Štóž kaž Johnson swoje pozicije prowokantnje zastupuje, dyrbi spřećiwjenje wudźeržeć, rjekny městopředsyda CSU.

Britiski parlament bě zakoń wobzamknył, kiž njerjadowany wustup kraja z EU zakazuje. Najebać to chce Johnson Wulku Britanisku 31. oktobra z EU wjesć, ze zrěčenjom abo w nuzy tež bjez njeho.

Zhromadnosć w kraju sylnić

Mittwoch, 18. September 2019 geschrieben von:

Prěnje sonděrowanske rozmołwy CDU, SPD a Zelenych w Sakskej

Drježdźany (dpa/SN). CDU, Zeleni a SPD w Sakskej chcedźa w padźe zhromadneho knježerstwa towaršnostnu zhromadnosć skrućić. Tole su wodźacy zastupnicy stron k zahajenju sonděrowanskich rozmołwow w Drježdźanach potwjerdźili. „Chcu rady přećelny swobodny stat, kotryž doprědka kroči, wobydlerjow zapřija, kiž towaršnostnu zhromadnosć sylni a hospodarsku móc kraja dale wutwarja“, rjekny ministerski prezident Michael Kretschmer (CDU). Unija chcyła z partnerami na samsnej runinje jednać a zajimuje so za jich ideje a předstawy.

„Politika dyrbi wjeselo činić. Wšitcy smy politisce angažowani, dokelž chcemy něšto nastorčić, nochcemy zakazować ale zmóžnić“, Kretschmer rjekny. Wón reagowaše tak na kritiku jara konserwatiwneho křidła CDU, kotryž koaliciju ze Zelenymi wotpokazuje a so město toho za mjeńšinowe knježerstwo zasadźuje. Kretschmer namjetowaše, wuslědki rozmołwow ze Zelenymi wočaknyć.

To a tamne (18.09.19)

Mittwoch, 18. September 2019 geschrieben von:

Přismudźene całty su wčera lětanišćo Lipsk/Halle nachwilnje zlemili. Sylneho kura w pjekarni dla su wohnjowe sensory w 9 hodź. reagowali a wohnjowu woboru alarmowali. Na to su potrjecheny terminal ewakuowali, rěčnik lětanišća zdźěli. W pjekarni wšak so jenož całty a tykanc smudźachu. Dale so ničo stało njeje. „Wohnjowy alarm je wohnjowy alarm“, rěčnik praji. Po hodźinje móžachu zaso pasažěrow wobstarać. Wjacore lěty so zapozdźichu.

Z ćahom sam po puću był je štyrilětny hólc w Saksko-Anhaltskej. Do toho bě wón swojimaj staršimaj twochnył a sam do ćaha zalězł. Mały hólc žonje w ćahu mjez Wittenbergom a Halle napadny. Wona wza hólca k sebi a přepoda jeho na dwórnišću w Halle policiji. Zastojnicy informowachu staršeju, kotrajž přeco hišće podarmo za nim pytaštaj.

Thunberg wuznamjenjena

Dienstag, 17. September 2019 geschrieben von:

Washington (dpa/SN). Šwedsku aktiwistku za škit klimy Gretu Thunberg a protestne hibanje Fridays for Future su we Washingtonje z najwažnišim mytom pomocneje organizacije Amnesty International „Pósłanča swědomja“ wuznamjenili. Myto je za „wšěch njebojaznych młodostnych, kotřiž wo swój přichod wojuja“, rjekny 16lětna Thunberg při wuznamjenjenju. Młodostna protestuje hižo dlěje hač lěto za lěpši škit klimy.

Trump tuka na Iran

Washington (dpa/SN). Prezident USA Donald Trump na to tuka, zo je Iran zamołwity za nadpady na najwjetšu wolijowu rafineriju Sawdi-Arabskeje. „Cyle za tym wupada“, rjekny Trump w Běłym Domje we Washingtonje. Wón zdobom potwjerdźi, zo nochcedźa USA wójnu z Iranom.­ Při wšěm su USA na wjetši konflikt přihotowani, wón rjekny. Nětko dyrbjeli zamołwići zwěsćić, štó je nadpad skućił. Iran kóždežkuli wobdźělenje prěje. Sawdi-Arabska pad dale přepytuje.

Israel woli parlament

Po prěnjej sonděrowanskej rozmołwje mjez CDU, SPD a Zelenymi su sakski ministerski prezident Michael Kretschmer (CDU, 3. wotlěwa), načolnej kandidataj Zelenych Wolfram Günther (nalěwo) a Katja Meier (2. wotlěwa) a Martin Dulig (SPD, naprawo), hospodarski minister kraja, wčera na nowinarskej konferency w Drježdźanach zjawnosć informowali. Foto: dpa/Robert Michael

Serbska debata

Neuheiten LND