Nuzowy staw na łódźi

Montag, 02. September 2019 geschrieben von:

Rom (dpa/SN). Kapitan němskeje wuchowanskeje łódźe „Eleonore“ je nuzowy staw wukazał a je najebać zakaz do směra na Italsku po puću. Je ilegalne jězbu do přistawa zakazać, hdyž je žiwjenje wohrožene, praji rěčnik pomocneje organizacije Mission Lifeline Axel Steier dźensa powěsćerni dpa. Minjenu nóc bě wichor na morju zachadźał, dalši so bliži. Łódź je po puću do sicilskeho Pozzallo. Na łódźi je wjace hač sto ćěkanow, kotrychž běchu tydźenja wuchowali.

Hurrikan wulke škody načinił

Miami (dpa/SN). Ze spěšnosćemi nimale 300 km/h je hurrikan „Dorian“ na sewjernych Bahamaskich kupach zachadźał. Prěnje telewizijne wobrazy kupow juhowuchodnje stata USA Floridy pokazuja wulke zapusćenja, spowalane štomy, wobškodźene twarjenja a hoberske zapławjenja. „Dorian“ drje nětko do směra na Floridu dale poćehnje. W staće South Carolina su 800 000 ludźi namołwjeli, kónčinu wopušćić.

Pence pola Dudy

Dźěło w Janšojskej jamje přetorhnjene

Montag, 02. September 2019 geschrieben von:

Choćebuz/Janšojce (dpa/SN). W Janšojskej brunicowej jamje njesmědźa wot wčerawšeho najprjedy raz žane wuhlo wjace wudobywać. Choćebuske wyše zarjadniske sudnistwo je minjeny pjatk wukazało dźěła w jamje přetorhnyć, dokelž njeběchu energijowemu zastaraćelej LEAG jako mějićelej jamy přizwolili dobu za zdźěłanje pruwowanja wobswětoweje znjesliwosće podlěšić. LEAG bě wo to prosyła, pruwowanski čas hač do nowembra podlěšić. Zarjadniske sudnistwo wopodstatni swój rozsud z tym, zo njeje koncern LEAG žane přičiny mjenować móhł, kotrež bychu změnu dotalneho wusuda woprawnili. LEAG měješe hač do kónca awgusta chwile, pruwowanje wobswětoweje znjesliwosće předpołožić.

Wuchadźišćo rozsuda bě skóržba Němskeje wobswětoweje pomocy zhromadnje ze Zelenej ligu přećiwo hłownemu zawodnemu planej brunicoweje jamy za lěto 2019. Wobswětoškitarjo so boja, zo móhli klumpy dnowneje wody wokoło jamy wosebje škitane kónčiny kaž bahna wohrozyć. Ze skóržbu chcedźa tomu zadźěwać, zo LEAG jamu na sewjer rozšěri, a chcedźa krajinu we wokolinje před wusušenjom škitać.

Z ludźimi rěčeć pomha

Montag, 02. September 2019 geschrieben von:
Štó dobudźe abo přěhraje, to njemóže žane dowólbne naprašowanje demoskopow dokładnje wuslědźić. Zo je CDU dale najsylniša móc, ma z tym činić, zo njeje so jeje načolny kandidat a dotalny ministerski prezident Michael Kretschmer žanoho puća wzdał so z wobydlerjemi rozmołwjeć a na nich słuchać. Wotewrjenej wuši za naležnosće ludźi na wsy a firmownikow stej Markej Šimanej sedmu wólbnu periodu wobradźiłoj. Wuspěch Budyskeho zapósłanca bě připóznaće wšeho dotal zdokonjaneho a zdobom dopokaz, zo móža so demografojo mylić. Runje tak běchu woni nastupajo Lěwicu wopak trochowali. Serbsku tematiku njejsu zamołwići dołhi čas za swoju naležnosć měli. Su cha­błali, hač so na tym orientuja, štož wot Domowiny słyša, abo hač pozicije swójskich serbskich čłonow chutnje bjeru. To je jenož jedyn (naš) mały dypk, čeho­dla we wjesnych kónčinach Lěwicy wjace njedowěrjeja. Na konkluzije dobyćerjow a přěhračkow sym tuž wćipny. Axel Arlt

Steinmeier Pólsku wo wodaće prosył

Montag, 02. September 2019 geschrieben von:

Waršawa/Wieluń (dpa/SN). Zwjazkowy prezident Frank-Walter Steinmeier je 80 lět po wudyrjenju Druheje swětoweje wójny Polakow wo wodaće za němsku zaničowansku wójnu z milionami morjenych prosył. „Tale wójna bě němske złóstnistwo“, rjekny Steinmeier wčera składnostnje róčnicy započatka wójny we Waršawje. „Prošu wo wodaće za historisku winu Němskeje. Wuznawam so k našej trajacej zamołwitosći.“

Podobne słowa je Steinmeier hižo rano­ na wopominanskim zarjadowanju we Wielunje njedaloko Opola zwuraznił. Wojersce dospołnje njewažne městačko běchu Němcy w rańšich hodźinach 1. septembra 1939 jako prěnje bombardowali a 1 200 ciwilistow morili.

Nadpad nacistiskeje Wehrmachty na Pólsku bě zazběh Druheje swětoweje wójny ze znajmjeńša 55 milionami mortwych. Dalše trochowanja naličeja samo 80 milionow. Dokładne ličby žane njepředleža. Jeničce w Pólskej žadaše sej teror němskich nacionalsocialistow šěsć milionow smjertnych woporow.

Ludźo dźeń a agresiwniši

Montag, 02. September 2019 geschrieben von:

Hamburg (dpa/SN). Wosamoćenosć, njewjazanosć a agresiwnosć budu po měnjenju Hamburgskeho slědźerja přichoda Horsta Opaschowskeho žiwjenje ludźi w Němskej přichodnje dźeń a bóle postajeć. Najebać splećenje přez medije so wosamoćenosć kaž epidemija rozšěrja. „Komunikaciska hustota a bjezkontaktnosć njejstej dźensa hižo přećiwkaj“, piše Opaschowski w swojej nowej knize „Wědźeć, što budźe“. Wón zwěsća, zo su „cuze swěty z pomocu masowych medijow a modernych komunikaciskich srědkow cyle bliske, ale runočasnje so susod kaž wobydler cuzeho swěta dale a bóle w dalinje zhubja“. Politikarjo měli reagować. Knježerstwo Wulkeje Britaniskeje je temu mjeztym jako nadawk jednomu ze swojich ministerstwow přirjadowało.

Młoda generacija nochcyła so hižo wjazać, ani we wosobinskich poćahach ani w socialnym angažemenće. W naprašowanjach młodźina měni, zo chwile nima. Hłownje wina su po słowach slě­dźerja nowe medije. Wone polěkuja wobužnosći,­ agresiwiće a namocy. Opaschowski­ namjetuje dobrowólnu „digitalnu­ dietu“ a zasah politiki.

To a tamne (02.09.19)

Montag, 02. September 2019 geschrieben von:

Hnydom prěnju šulsku hodźinu w powětře je awstralski lětanski šuler Max Sylvester ze swojej małej Cessnu wěsće přizemił, ale z nuzy, dokelž bě wučer w mašinje do womory padnył. Z pomocu lotsy so 30lětnemu šulerjej skónčnje poradźi, na wulkolětanišću zapadoawstralskeje metropole Perth přizemić. Wučerja dowjezechu do chorownje. W protokolu škričkoweje rozmołwy rěkaše na prašenja towera, hač móže šuler z lětadłom wobchadźeć: „To je moja prěnja hodźina.“

Sowu z kamina wuswobodźili su wobornicy we wuchodofriziskim Großefehnje. Ptak bě so prawdźepodobnje přez wuheń do kamina sunył a sedźeše za škleńčanymi durčkami kamina. Po krótkim času móžachu wohnjowi wobornicy sowu wuswobodźić, kotraž wosta na zbožo njezranjena. Wobydlerjo běchu ju sobotu popołdnju wuhladali.

Kotry wuznam přicpěwaće Serbam za dalše wuwiće w Sakskej?

Holger ­Zastrow FDPKatja Meier Zwjazk 90/ZeleniJörg Urban AfD

Škit prawow mjeńšiny Serbow dyrbi standardam Europskeje unije wotpowědować. Serbja płaća w kraju a we wobłuku EU jako awtochtony lud. Rozprawa statneho knježer­stwa k połoženju serbskeho ludu w swobodnym staće sej žada, zo dyrbi so wjetšina stajnje znowa z tymle prašenjom zaběrać. Wobhladujemy to jako trajne po­litiske twarni­šćo.

Fota: z wólbneho materiala kandidatow

Woheń w chemijowej fabrice

Freitag, 30. August 2019 geschrieben von:

Lovosice (dpa/SN). Wulkowoheń w čěskej chemijowej fabrice je wulku škodu zawostajił. W industrijnym měsće Lovosice paleše so wčera hala, w kotrejž běchu kumštne niće z polyamida składowane. Woheń bě dźensa rano pod kontrolu, njebě pak hišće dospołnje zhašany. Jedyn z dźěłaćerjow poćerpje zajědojćenje z kurom. Třoch zranjenych wohnjowych wobornikow­ dowjezechu do chorownje. Škodu­ trochuja na 1,5 milionow eurow.

Třoch aktiwistow zajeli

Hongkong (dpa/SN). Krótko po zakazu noweje masoweje demonstracije w Hongkongu su třoch prominentnych aktiwistow protestneho hibanja w chinskim wurjadnym zarjadniskim pasmje zajeli. Tež mjezynarodnje znaty wojowar za wobydlerske prawa Joshua Wong bu po puću na staciju podzemskeje železnicy zadźeržany a na policajsku stražu dowjezeny. Jeho sobuwojowarku Agnes Chow su tohorunja zajeli, byrnjež na druhim městnje. Wčera zajachu aktiwista Andyja Chana na Hongkongskim lětanišću.

Dawk za wosebje tunje lěty

W swětnišćowym centrumje „Hwězdne městačko“ pola Moskwy hotuja so dalši kosmonawća a astronawća na swoje zasadźenje w swětnišćowej staciji ISS. Hazza Al Mansouri ze Zjednoćenych arabskich emiratow, ruski kosmonawt Oleg Skripočka a astronawtka Jessica Meir z USA (wotlěwa) su so dźensa medijam předstajili. W Gagarinowym wukubłanskim centrumje kosmonawtow zwučuja woni w treningowym modulu swětnišćoweje stacije. Foto: dpa/Walerij Mjelnikow

Lěkarske zastaranje přez mjezu móžne

Freitag, 30. August 2019 geschrieben von:

Drježdźany (SN). Sakska ministerka za strowotnistwo Barbara Klepsch (CDU) a čěski strowotniski minister Adam Vojtěch staj zawčerawšim, srjedu, „Zhromadnu deklaraciju wo zhromadnym dźěle w mjezy přesahowacym strowotniskim zastaranju“ podpisałoj. To je prěnja kročel, zo móhli so čěscy staćenjo přichodnje w Sakskej strowotnisce zastarać dać. Kóšty za to přewozmu čěske chorobne kasy. Stejišćo wobsahuje nimo toho móžnosć, zhromadne dźěło na polu mediciny na wšu pomjeznu kónčinu mjez Čěskej a Sakskej rozšěrić.

Serbska debata

Neuheiten LND