Waršawa (dpa/SN). Wiceprezident USA Mike Pence je přiběrajcy wuske poćahi Zjednoćenych statow Ameriki k swojemu pólskemu partnerej w NATO wuzběhnył a zdobom Němsku kritizował. „Pólska je jedyn z našich najwažnišich zwjazkarjow a je so z wažnym akterom w globalnych naležnosćach stała“, rjekny Pence wčera we Waršawje, po tym zo bě jeho statny prezident Andrzej Duda přijał. Pence chwaleše Pólsku, kiž bě so zawjazała dwaj procentaj swojeho nutřkokrajneho bruttoprodukta za brónjenje wudać, a kritizowaše Němsku, kotraž tón zaměr njespjelnja. Mike Pence Polakam w tym zwisku přilubi, zo smědźa hižo bórze bjez wizuma do USA pućować, štož je wjelelětne přeće Polakow.
Prezident USA Donald Trump Němsku stajnje zaso kritizuje. Město toho zo by wjace pjenjez za wójsko wudała, přepokazuje Němska miliardy eurow za płun do Ruskeje a so na to spušća, zo ju USA w padźe wójny zakituja, Trump šwika. Poćahi mjez USA a Němskej su so pod Trumpom dramatisce wochłódnili.
Drježdźany (dpa/SN). Po tym zo je sakska FDP hižo druhi króć za sobu při wólbach krajneho sejma na pjećprocentowskej hranicy zwrěšćiła, je předsydstwo liberalnych wčera swój wotstup připowědźiło. Znowa wuzwolić chcedźa je 2. nowembra, zdźěli generalny sekretar strony Torsten Herbst powěsćerni dpa w Drježdźanach. Krajny předsyda Holger Zastrow swoje zastojnstwo złoži. Předsydstwo přewozmje tak zamołwitosć za wuslědk wólbow krajneho sejma, kaž Herbst oficialnje informuje.
FDP bě njedźelu zaćah do krajneho sejma swobodneho stata znowa zapasła, dóstawši 4,5 procentow hłosow. Při wólbach 2014 bě bywša knježerstwowa strona z runje 3,8 procentami z krajneho sejma zlećała.
W lěće 1999 bě sakska FDP po historiskej wólbnej poražce z 1,1 procentom nimale rozpadnyła. Tehdy 30lětny Holger Zastrow stronu přewza a wjedźeše ju pjeć lět pozdźišo wróćo do krajneho sejma. W lěće 2009 docpě FDP z dźesać procentami rekordny wuslědk a sta so z partnerom CDU w prěnjej čorno-žołtej koaliciji w Sakskej.
Japanscy turisća su w Europje najwoblubowaniši dowolnicy. To je wuslědk naprašowanja slědźenskeho instituta YouGov mjez nimale 30 000 ludźimi w 26 krajach Europy. Wšudźe mějachu skromni a zdwórliwi Japanjenjo najlěpše wuslědki, w Finskej samo 26 procentow. Porno tomu njejsu Němcy we wukraju tak rady widźani. W Španiskej runje šěsć procentow wo nich rodźi. Najnjewoblubowaniši su Rusojo a Britojo.
Chětro smjerdźaty nadawk spjelnić mějachu policisća na awtodróhowym parkowanišću njedaloko Aachena. Z małotransportera dyrbjachu 151 kilogramow skaženeje ryby zrumować. Hižo při kontroli awta bě zastojnikam grawoćiwy smjerd dych wotrazył. 61lětny šofer bě rybu njechłódźenu z Brüssela přiwjezł, zo by ju w Němskej předawał. Jemu hrozy nětko bolostna pokuta.
Podstupim (dpa/SN). Najebać widźomne straty je SPD při wólbach krajneho sejma w Braniborskej swoju wodźacu poziciju zakitować móhła a so z najsylnišej politiskej stronu stała. Strona ministerskeho prezidenta Dietmara Woidki docpě po dotalnym wuslědku 26,2 procentaj wotedatych druhich hłosow před AfD, kotraž ma 23,5 procentow. CDU zdoby sej 15,6 proc., Zeleni 10,8 a Lěwica 10,7 proc. FDP je ze 4,1 procentom na pjećprocentowskej hranicy zwrěšćiła.
Komisariska předsydka zwjazkoweje SPD Manuela Schwesig žada sej wot CDU wjace kedźbnosće za wuchod. „Wčerawše wólby su pokazali, zo staj dobraj ministerskaj prezidentaj swój kraj přećiwo AfD zakitowałoj. „Štož nětko we wuchodnej Němskej trjebamy, je wjace kedźbnosće Zwjazka, dokelž sami najlěpje wěmy, što je na městnje wažne“, rjekny Manuela Schwesig dźensa w rańšim magacinje telewizije ARD.
Berlin (B/SN). Wot 12. do 20. awgusta přebywaše delegacija Němskeje biskopskeje konferency pod nawodom Drježdźansko-Mišnjanskeho biskopa Heinricha Timmereversa w USA, zo bychu sej tamniše koncepty powołanskeho personala spřistupnili. Heinrich Timmerevers, kiž je tež sobustaw komisije za duchowne powołanja a cyrkwinske słužby Němskeje biskopskeje konferency, po nawróće rjekny: „Sym zahorjeny, kak je cyrkej w USA w swojim wobmjezowanju skandalow znjewužiwanja dla nowy započatk w powołanskej pastoralce zdokonjała. Jasne wizije, mnohostronske powołanske mjez sobu splećene pastoralki kaž tež změnjene wobsahi wukubłanja w seminarje su mje hłuboko jimali.“
Skulptura smě wostać
Budyšin (SN/MkWj). Z wjacorymi zarjadowanjemi swjećeše Budyska ewangelska Michałska wosada kónc tydźenja 400. róčnicu swojeho wobstaća. Wjeršk swjatočnosćow běchu swjedźenske kemše wčera popołdnju w Budyskej Michałskej cyrkwi ze sakskim krajnym biskopom dr. Carstenom Rentzingom. Tón serbskim ewangelskim wěriwym wobswědči, zo su ze swojim skutkowanjom wažny faktor w cyrkwinskim žiwjenju Budyšina a wšeje wokoliny.
Kemše w połnje wobsadźenej Michałske cyrkwi běchu dwurěčne. Celebranća běštaj nimo biskopa Rentzinga serbski superintendent Jan Malink a farar Andreas Höhne. Na kóncu Božeje słužby zanjesechu wěriwi spěw „Knjezowy jandźel“ w serbskej a němskej rěči zhromadnje.
Rom (dpa/SN). Kapitan němskeje wuchowanskeje łódźe „Eleonore“ je nuzowy staw wukazał a je najebać zakaz do směra na Italsku po puću. Je ilegalne jězbu do přistawa zakazać, hdyž je žiwjenje wohrožene, praji rěčnik pomocneje organizacije Mission Lifeline Axel Steier dźensa powěsćerni dpa. Minjenu nóc bě wichor na morju zachadźał, dalši so bliži. Łódź je po puću do sicilskeho Pozzallo. Na łódźi je wjace hač sto ćěkanow, kotrychž běchu tydźenja wuchowali.
Hurrikan wulke škody načinił
Miami (dpa/SN). Ze spěšnosćemi nimale 300 km/h je hurrikan „Dorian“ na sewjernych Bahamaskich kupach zachadźał. Prěnje telewizijne wobrazy kupow juhowuchodnje stata USA Floridy pokazuja wulke zapusćenja, spowalane štomy, wobškodźene twarjenja a hoberske zapławjenja. „Dorian“ drje nětko do směra na Floridu dale poćehnje. W staće South Carolina su 800 000 ludźi namołwjeli, kónčinu wopušćić.
Pence pola Dudy
Choćebuz/Janšojce (dpa/SN). W Janšojskej brunicowej jamje njesmědźa wot wčerawšeho najprjedy raz žane wuhlo wjace wudobywać. Choćebuske wyše zarjadniske sudnistwo je minjeny pjatk wukazało dźěła w jamje přetorhnyć, dokelž njeběchu energijowemu zastaraćelej LEAG jako mějićelej jamy přizwolili dobu za zdźěłanje pruwowanja wobswětoweje znjesliwosće podlěšić. LEAG bě wo to prosyła, pruwowanski čas hač do nowembra podlěšić. Zarjadniske sudnistwo wopodstatni swój rozsud z tym, zo njeje koncern LEAG žane přičiny mjenować móhł, kotrež bychu změnu dotalneho wusuda woprawnili. LEAG měješe hač do kónca awgusta chwile, pruwowanje wobswětoweje znjesliwosće předpołožić.
Wuchadźišćo rozsuda bě skóržba Němskeje wobswětoweje pomocy zhromadnje ze Zelenej ligu přećiwo hłownemu zawodnemu planej brunicoweje jamy za lěto 2019. Wobswětoškitarjo so boja, zo móhli klumpy dnowneje wody wokoło jamy wosebje škitane kónčiny kaž bahna wohrozyć. Ze skóržbu chcedźa tomu zadźěwać, zo LEAG jamu na sewjer rozšěri, a chcedźa krajinu we wokolinje před wusušenjom škitać.