Pólska wita plany USA, dalšich wojakow na wuchod přepołožić

Waršawa (dpa/SN). Pólski wonkowny minister Jacek Czaputowicz je wot USA planowane přepołoženje w Europje zaměstnjenych ameriskich jednotkow do směra na wuchod zakitował. „Prezenca ameriskich jednotkow w Pólskej hraje jara­ wažnu wottrašacu rólu, wažnišu hač samsna prezenca wojakow dale na za­padźe“, wuzběhny Czaputowicz w rozmołwje z powěsćernju dpa. Wot planowaneho wopyta prezidenta USA Donalda Trumpa w Pólskej za dwaj tydźenjej wočakuje wón jasne konkretizowanje mjenowanych planow.

USA chcyli ličbu ameriskich wojakow w Pólskej wot tuchwilu 4 500 na 5 500 rozšěrić. Donald Trump bě pak připo­wědźił, zo nochcył přidatnych wojakow słać, ale tysac z nich we wobłuku Europy přesadźić. Jako móžny kraj, zwotkel móhli wojacy přińć, mjenowaše wón Němsku. „Rozsudźić dyrbja Američenjo sami“, rjekny Czaputowicz, kiž potwjerdźi, zo maja wojacy USA tež w Němskej wulku zamołwitosć. Zdobom pak na to pokaza, zo je jich ličba tam wo wjele wjetša.

Za šule w serbskim sydlenskim rumje Sakskeje płaći wot šulskeho lěta 2013/2014 oficialny koncept 2plus. Jeho zaměr je: „Wšitcy šulerjo maja w šuli aktiwnu serbsko-němsku dwurěčnosć docpěć, njewotwisnje wot rěčneho wuchadneho niwowa.“ A woznamjenja kónc rozrjadowanja šulerjow do maćernorěčnych a njemaćernorěčnych A- a B-rjadownjow. Nowy sys­tem serbšćinu wšitkim – oficialnje – wotwěra. Praktisce pak dźělenje swětow postupuje, a wo tym njeswědči jenož płaćiwe postajenje wo šulerskim transporće Budyskeho wokrjesa na zakładźe dojednanja z lěta 2015. Štóž nima maćernorěčny niwow, kaž w aktualnym padźe dwójnikaj Wojerowskeje swójby, tež šansu nima­ jón docpěć. Za čo potajkim docyła 2plus? Pomału je načasu, koncept ze zaměrom aktiwneje dwurěčnosće za kóždeho chutnje brać – a to płaći za „němske“ zarjadnistwo runje tak kaž za serbsku towaršnosć. Cordula Ratajczakowa

Berlin (dpa/SN). Zwjazkowa wobora je wčera Ursulu von der Leyen (CDU) z wulkim wječornym trubjenjom ze zastojnstwa zakitowanskeje ministerki rozžo­hnowała. Najwyša ceremonija němskeho wojerstwa wobsteji tež ze wšelakich hudźbnych elementow. Na přeće von der Leyen hudźeše orchester Zwjazkoweje wobory wčera „Wind of Change“ skupiny Scorpions. Zakitowanske ministerstwo je mjeztym hižo šefina CDU Annegret Kramp-Karrenbauer přewzała. Ursula von der Leyen stanje so z nowej prezidentku komisije EU.

Lubij (CRM/SN). Składnostnje jubileja „Sto lět Bauhaus“ mějachu minjenu njedźelu w Lubiju na wurazne přeće sakskeho ministerskeho prezidenta Michaela Kretschmera (CDU) nimo prošenych hosći zbliska a zdaloka tež dalši zajimcy přistup k wědomostno-kulturnemu zarjadowanju „Das Bauhaus-Picknick“ na zahrodźe domu, kotryž słuša w Hornjej Łužicy k wuznamnym twaram w awant­gardistiskim wuměłskim stilu.

Dynamiske myslenje w nowym duchu měješe dźě tež w chěži w nowotarskim stilu knježić, kotruž bě sej wobsedźer nudloweje twornje Fritz Schminke 1933 wot architekta Hansa Scharouna natwarić dał. Lubijčenjo pomjenowachu swojorazny dom jako „Nudeldampfer“, kotryž jednoćeše za tamniši čas přewšo do­prědkarsku bydlensku kulturu za swój­bu ze štyrjomi dźěćimi. Na wěcywu­stojnym wodźenju po woběmaj etažomaj jara wo­te­wrjenje konstruowaneho domu mó­žachu sej zajimcy wobraz wo jón­krótnej stilowej ikonje klasiskeje moderny w Hornjej Łužicy stworić.