Napinanja Europy trěbne

Dienstag, 21. April 2015 geschrieben von:

Wšudźe pytaja za wupućemi, kak smjerći ćěkancow zadźěwać

Berlin (dpa/SN/K). Dźiwajo na njepřestajnu žołmu ćěkancow, wosebje z krizowych krajow Bliskeho wuchoda a předewšěm hladajo na tragiske łódźne nje­zboža z mortwymi po wjele stach, wicekancler Sigmar Gabriel (SPD) Europsku uniju namołwja, ze zhromadnym na­pinanjom tomule wuwiću znapřećiwić. „Šefojo statow a knježerstwow dyrbja štwórtk na swojim wurjadnym schadźowanju samsnu rozsudźenosć wopokazać kaž za zmištrowanje financneje krizy“, předsyda SPD zwurazni, „nětkole njeń­dźe wo škit wonkownych hranicow Europy­. Dźe wo to, wjele ludźom žiwjenje wuchować.“ Trěbna je wobšěrna opera­cija namórnistwa, z kotrejž wuchowa ćěkancow­ před zatepjenjom, sej Gabriel žada­. Tohorunja dyrbi so w krajach, zwotkelž ludźo přez morjo ćěkaja, ze­sylnić škit před nješwarnymi pašowarjemi a wikowarjemi z ludźimi. „Čłowjeska katastrofa na Srjedźnym morju je na­ležnosć cyłeje Europy, moralisce kaž tohorunja politisce.“

Proces zahajeny

Dienstag, 21. April 2015 geschrieben von:
Lüneburg (dpa/SN). Jedyn z poslednich wulkich procesow w zwisku ze złóstnistwami nacionalsocialistow zahaji so dźensa na Lüneburgskim krajnym sudnistwje. 93lětnemu něhdyšemu SSowcej Oskarej Gröningej wumjetuja pomoc při morjenju­ znajmjeńša 300 000 ludźi w něhdyšim kaceće Auschwitz. Mjez při­tomnym­i na sudniskej žurli běchu tež někotři přežiwjeni lěhwa z wjacorych krajow. Tež zajim medijow je jara wulki. Gröning bě w Auschwitzu pomhał, wot jatych zawostajene wačoki zrumować a přepytać. W nich namakane pjenjezy přepokazachu SS. Gröning je pječa zwól­niwy­ so wuprajić.

To a tamne (21.04.15)

Dienstag, 21. April 2015 geschrieben von:

Nimale tři hodźiny je ćeknjeny byk železniski wobchad mjez Sindelfingenom a Böblingenom njedaloko Stuttgarta lemił. Skoćo bě z pastwy twochnyło a běhaše po měsće. Agresiwnje da so wone do pěškow a policistow, kotřiž chcychu je popadnyć. Nichtó so na zbožo njezrani. Skónčnje zaběža so byk na kolije. Skótnem­u lěkarjej so poradźi jeho pohłušić. Za wottransport byka na pastwu pak trjebachu kran a nakładne awto.

Za sławnej mórskej potworu Nessie w Šotiskej móžeš nětko tež wirtuelnje pytać. Předewzaće Google je ze swojimi kamerami při jězoru Loch Ness było. Wot dźensnišeho móža jón ludźo přez słužbu Street View přepytać. Runje dźensa před 81 lětami, 21. apryla 1934, bě no­wina Daily­ Mail snadź najsławniše foto Nessie wozjewiła. Zamołwići wočakuja nětko tež wja­ce wopytowarjow při jězoru.

Łužica (21.04.15)

Dienstag, 21. April 2015 geschrieben von:

Wirtuelnje po muzeju

Choćebuz (dpa/SN/ch). Tójšto eksponatow z wobstatka něhdźe 50 braniborskich muzejow a archiwow hodźa so mjeztym internetnje wotwołać. Dźěłowy kruh Braniborska digitalna je poskitk dźensa dopołdnja w Podstupimje prěni króć předstajił. „Tak smědźa tež mjeńše muzeje swoje zběrki njewotwisnje wot aktualnych wustajeńcow wirtuelnje w interneće předstajić“, rozłoži nawoda projekta Ulf Preuß. Wuměłstwo pokazuje so na platformje www.museum-digital/brandenburg.de. Zastupjeny je tohorunja Serbski muzej w Choćebuzu ze zběrku serbskeje ludoweje kultury a pism­owstwa.

Kónc zwady njewotwidźomny

Knježerstwje Čěskeje a Pólskeje stej so dźensa w Praze k zhromadnemu wuradźowanju zešłoj. Do toho witaše čěski ministerski prezident Bohuslav Sobotka (prědku napraw­o) swoju pólsku koleginu w zastojnstwje Ewu Kopacz. Při konsultacijach wobjednaw­achu mjezynarodne problemy runje tak kaž dalše polěpšenje tradi­cionalnje dobrych poćahow mjez woběmaj krajomaj. Foto: dpa/Petr David Josek

Hollande chcyłzwadu rozrisać

Montag, 20. April 2015 geschrieben von:
Paris (dpa/SN). Francoski prezident Francois Hollande chcył zwadu z Moskwu wo dodawanje dweju wójnskeju łodźow Ruskej rozrisać. Na swjatočnosći k stotej róčnicy masakra na Armenjanach přichodny pjatk budźe wón w tutej naležnosći w Armenskej z ruskim prezidentom Wladimirom Putinom rěčeć, kaž wón francoskim nowinarjam rjekny. Ruska bě w Francoskej łódźi, kotrejž nosytej he­likoptery, skazała a zdźěla hižo zapłaćiła. Konflikta na wuchodźe Ukrainy dla pak njeje Francoska na ćišć NATO prěnju łódź kaž planowane loni w nowembru Ruskej přepodała. Wobě łódźi płaćitej hromadźe wjace hač miliardu eurow.

Mjezsobne wumjetowanja

Montag, 20. April 2015 geschrieben von:
Kijew (dpa/SN). W konflikće na wu­cho­dźe Ukrainy sej jednotki knježerstwa a proruscy separatisća mjez sobu wumjetujetej, zo zasadźatej w krizowej kónčinje­ Donbas ćežke brónje. Rěčnik armeje­ rozprawja wo nadpadach sepa­ra­tistow z mjetakami granatow. Zběžkarjo rěča po informacijach powěsćernje Interfax wo granatach kalibra 120 milimetrow ze stron armeje. Poprawom dyrbjeli wšitke ćežke brónje po Minšćanskim mě­row­y­m planje dawno z kónčiny cofnjene być. Najebać zrěčenje dochadźa tam nimale wšědnje k ranjenjam srjedź fe­bruara wujednaneho přiměra. Tež kónc tydźenja su sej zaso mjezsobnu winu na třěleńc­ach dawali. Po trochowanju UNO je tam dotal 6 000 ludźi zahinyło.

Opozicija dobyła

Montag, 20. April 2015 geschrieben von:
Helsinki (dpa/SN/K). Liberalna opoziciska strona je wčerawše parlamentne wólby w Finskej dobyła. Po nachwilnym kónčnym wuslědku docpě Strona centruma 21,1 procent wšěch hłosow, z čimž bu najsylniša móc. Druhe městno wobsadźi konserwatiwna strona dotalneho ministerskeho prezidenta Alexandera Stubba z 18,2 procentomaj před pra­wicarsko-populistiskej Stronu Finow ze 17,6 procentami. Stubb bě swoju po­ražku hnydom po prěnich prognozach přizna­ł. Z nowym premierom stanje so prawdźepodobnje předsyda Strony centruma­ Juha Sipilä. Jeho partnerojo w knježerstwje móhli socialdemokraća (16,5 procentow) abo prawicarscy po­pulisća być. Sipilä zhromadne dźěło z přećiwnikami EU njewuzamkuje.

Schulz: Politiku EU změnić

Montag, 20. April 2015 geschrieben von:

Dalša łódźna katastrofa z ćěkancami namołwja do jednanja

Luxemburg (dpa/SN/K). Ćěła łódźneje katastrofy tydźenja před libyskim při- brjohom z nimale 500 zahinjenymi ćěkancami njejsu wšitke hišće chowane, to dóńdźe w nocy na njedźelu hižo k dal­šemu, hišće hrózbnišemu njezbožu. Na Srjedźnym morju je so znowa rybarska łódź powróćiła, měrjaca so z ćěkancami přepjelnjena na italsku kupu Lampe­dusa. Po prěnich powěsćach bě na njej 700 ludźi, z kotrychž zamóchu na pomoc přichwatane łódźe 29 wuchować. Jedyn z wuchowanych je wšak italskemu statnemu rěčnistwu wupowědał, zo wjezeše łódź na wšěch 950 ćěkancow, z kotrychž běchu pašowarjo něhdźe 300 do skła­dźišćow kutera zawrěli.

Wulki nawal

Montag, 20. April 2015 geschrieben von:
Brandenburg (dpa/SN). Zwjazkowa zahrodna přehladka 2015 w kónčinje Habole­ je hnydom prěni kónc tydźenja wjele­ wopytowarjow přiwabiła. „Nawal je jara wulki. Runje tak smy sej to před­stajili“, praji rěčnica přehladki Amanda Hasenfusz wčera wječor medijam. Zwjazkowy prezident Joachim Gauck bě so­botu na swjedźenskim zarjadowanju w Brandenburgu hač do oktobra trajacu přehladku wotewrěł. Hinak hač dotal njeje wona na jeničke město koncentrowana, ale wopřijima podłu Habole Premnitz, Rathenow, Rhino­w/Stölln a Havelberg. Hižo do zahajenja běchu sej ludźo 75 000 zastupnych lisćikow w předpře­dani skazali. Orga­nizatorojo wočakuja hač do oktobra cyłkownje połdra mi­liona hosći.

Anzeige