Zhorjelc (dpa/SN). Zwjazkowa kanclerka Angela Merkel je wčera twornju koncerna Siemens w Zhorjelcu wopytała. Zhromadnje ze sakskim ministerskim prezidentom Michaelom Kretschmerom (wobaj CDU) a nawodu koncerna Joeom Kaeserom je sej wona wjacore stacije zawoda z 800 přistajenymi wobhladała. Je to hłowny centrum Siemensa za produkciju parnych turbinow. Bjezposrědnje do wopyta Merkel bě Siemens ze Sakskej a Fraunhoferskej towaršnosću paket přichoda za Zhorjelc podpisał. Tón předwidźi załoženje inowaciskeho campusa w zawodźe. Po zrěčenju planuja inwesticije něhdźe 30 milionow eurow a sto nowych dźěłowych městnow. Siemens chce zhromadnje z Fraunhoferskej towaršnosću labor za slědźenje z wodźikom natwarić, w kotrymž chcedźa wudobywanje, składowanje a wužiwanje wodźika přepytować.
Ličenje kołpjow su wčera na Themsy we Wulkej Britaniskej zahajili. Na wjacorych wotrězkach ptački registruja a zdodom hladaja, kak so jim dźe. Pjeć dnjow trajacy spektakl w Londonje zahaja a njedaloko Oxforda skónča. „Swan Upping“ je britiska tradicija, kotraž pochadźa z 12. lětstotka. Tehdy běchu słužownicy kralowskeho palasta za kołpjemi pytali, dokelž běchu ptački kruty wobstatk kralowskeho jědźneho plana.
Škrěkanje dweju papagajow je w Hessenskej zasadźenje policije zawiniło. Pasantka bě w Heppenheimje žałostne wołanje wo pomoc słyšała a na to policiju wołała, měnjo, zo tam někoho zadaja. Zastojnicy móžachu pad spěšnje wujasnić. W přitomnosći policistow wšak běštej papagajej skludnej. Jedyn sydny so policistce samo na ramjo, hdźež so hwěžki na uniformje błyšćachu.
Gioia Tauro (B/SN). Kardinal Pietro Parolin, statny sekretar we Vatikanje, je italsku mafiju w Kalabriskej na swjedźenju Božeho ćěła wótrje kritizował. „Kriminelne a mafiozne aktiwity, wusko zwjazane z korupciju, so křesćanskemu poselstwu njesměrnje spřećiwjeja.“ Ludźo w južnej Italskej maja z toho hospodarske a socialne problemy. Tež cyrkej ma wulku zamołwitosć, zo by situaciju polěpšiła, rjekny Parolin. Hakle loni bě bamž Franciskus składnostnje zbóžnoprajenja měšnika, kotrehož je koruptna mafija w Sicilskej zatřěliła, tajke mafiozne knježace struktury raznje zasudźił.
Přećiwo eksportej bróni
Berlin (B/SN). Wulke cyrkwje znowa kritizuja dowolnosće eksporta bróni krajam, kotrež su wobdźělene na wójnje z Jemenom. Praksa dowolnosće je w najwjetšej měrje problematiska, praji ewangelski předsyda Zhromadneje konferency cyrkej a wuwiće, prelat Martin Dutzmann. Němska je w prěnim połlěće eksport bróni w rozměrje miliardy eurow dowoliła do krajow, kiž wójnu z Jemenom podpěruja.
Pixi-knižki z bibliskej temu
Gütersloh (dpa/SN). W Němskej je po nowym přepytowanju přewjele małych chorownjow. To wuskutkuje so negatiwnje na zastaranje pacientow, rěka w dźensa wozjewjenej studiji Bertelsmannoweje załožby. Małe chorownje nimaja častodosć trěbne wuhotowanje a nazhonjenje, žiwjenje wohrožace nuzowe pady, kaž infarkt wutroby, lěkować. Koncentracija lěkarjow a personala we wulkich chorownjach by k lěpšemu zastaranju wjedła.
Zeleni: Zrěčenja wozjewić
Berlin (dpa/SN). Politikar Zelenych Stephan Kühn chcył zwjazkoweho ministra za wobchad Andreasa Scheuera (CSU) sudnisce nuzować, zrěčenja w zwisku z mjeztym zwrěsćenym popłatkom za wosobowe awta předpołožić. Měsacy dołho so Scheuer tomu spjećuje, zrěčenja z předewzaćomaj Kapsch a Eventim wozjewić, rjekny ze Sakskeje pochadźacy rěčnik Zelenych nowinarjam. Kühn je skóržbu zapodał, zo by „taktiku wahanja“ Scheuera skónčnje skónčił.
Mortwi na přechodźe w Čěskej
Zhorjelc/Drježdźany (dpa/SN). Zwjazkowu kanclerku Angelu Merkel (CDU) wočakowachu dźensa popołdnju w Sakskej. Zhromadnje z ministerskim prezidentom Michaelom Kretschmerom (CDU) chcyše wona twornju koncerna Siemens w Zhorjelcu wopytać. Šef předsydstwa Joe Kaeser chcyše ju tam wo tym informować, kak so předewzaće na wužadanja přichoda nastaji a kak chcyło planowanu strukturnu změnu w zwisku ze skónčenjom zmilinjenja brunicy hač do lěta 2038 podpěrować a pohonjować.
Tež Sakska bě w jednanjach wuhloweje komisije namjety předpołožiła, kak móhli so dźěłowe městna a žiwjenska kwalita w regionje zawěsćić. Ideje sahaja wot kolijowych a nadróžnych projektow přez zasydlenje zarjadnišćow a institucijow hač ke kulturnym a turistiskim projektam. Za to chcedźa hač do 40 miliardow eurow přewostajić.
Wječor wočakowachu Merkel jako čestneho hosća na zetkanju žónskich syćow krajneho knježerstwa w Drježdźanskim Albertinumje.
„Jednanska strategija k skrućenju prawow Serbowkow a Serbow“ rěkaše tema poslednjeje serbopolitiskeje debaty nachilaceje wólbneje doby w Sakskim krajnym sejmje. Wo pozicijach zapodawarki wotpowědneho namjeta, frakcije Lěwicy, su Serbske Nowiny 4. julija rozprawjeli. Wotbłyšćujemy dźensa přinoški dalšich zapósłancow nimo AfD, kotraž njebě so słowa jimała.
Wjace hač tysac kilometrow z awtom po puću byli su štyrjo młodostni w starobje mjez dźesać a 14 lětami w Awstralskej. Policija móžeše skupinu ćeknjenych skónčnje w zwjazkowym staće New South Wales dosahnyć. Dźěći běchu w domjacym Rockhamptonje z awtom jednoho z nanow wotjěli a samo rozžohnowanski list zawostajili. Na dyrdomdejsku jězbu wzachu pjenjezy a material za wudźenje sobu. Motiw młodostnych za wulět njeje hišće doskónčnje znaty.
Awto na awtodróze ćišćeć dyrbjał je šofer na A 4 mjez Hornim Wujězdom a wotpočnišćom Hornja Łužica, po tym zo bě jemu sobotu dopołdnja bencin wušoł. Sta šoferow dyrbješe so na jednočarowej dróze awtodróhoweho twarnišća za 43lětnym „nastupić“. Při tym nasta dźesać kilometrow dołhe haćenje, kotrež so hakle po dobrej hodźinje zaso rozpušći.
Ankara (dpa/SN). Prěnje ruske raketywotwobaranske systemy su po puću do Turkowskeje, zdźěli dźensa zakitowanske ministerstwo w Ankarje. Konflikt mjez USA a Turkowskej so tak dale přiwótřa. Knježerstwo USA je so masiwnje přećiwo zasadźenju ruskeho raketoweho systema w powětrowym rumje NATO wuprajiło a ze sankcijemi hrozyło. Hižo loni běchu sankcije zajeća ameriskeho duchowneho w Turkowskej dla hospodarstwu kraja jara zeškodźeli.
Njewjedra zachadźeli
Trier (dpa/SN). Njewjedro ze sylnym dešćom a krupami je wčera wječor wohnjowych wobornikow w porynsko-pfalcskim Trieru zaběrało. Tam zličichu w nocy na wšě 220 zasadźenjow. Na zbožo so nichtó zranił njeje. Njewjedro pak je so masiwnje na wobchad, wosebje železniski wuskutkowało. Tež w Delnjej Sakskej mějachu wobornicy njewjedra dla ruce połnej dźěła, při čimž běštej měsće Papenburg a Haren wosebje potrjechenej.
Zhromadnje telefonowałoj