Choćebuz (dpa/SN). Wopominajo dóńt židowskich swójbow z Choćebuza chcedźa tam jutře sydom nowych kopolakow połožić. Kamjenje, małe wopominanske taflički z mosaza na chódnikach, su dźesać króć dźesać centimetrow wulke a dopominaja na židowske wopory nacionalsocializma. Kłasć budźe je wunamakar projekta, Kölnski wuměłc Gunter Demnig, před bydlenjemi, w kotrychž su wopory do deportacije přebywali.
Kaž Choćebuske domizniske towarstwo zdźěla, maja w Choćebuzu dotal 83 kopolakow. Do wopominanskich kamjenjow su mjeno, datum poroda a datum deportacije zagrawěrowane a, je-li znaty, datum smjerće. Akcija je móžna z pomocu pjenježnych darow. Za kóždy jednotliwy kamjeń pytaja kmóta. Kładźenje jednoho tajkeho płaći 120 eurow.
Kopolaki leža w městach a gmejnach po wšej Němskej, mjez druhim w Berlinje, Mnichowje a Hammje. Tež w Budyšinje tajke maja. Po cyłej Europje leži 73 000 wopominanskich kamjenjow w 23 krajach. Stajnje zaso dochadźa k nadpadam prawicarjow, kotrež kopolaki z barbu wonječesćeja.
Kćějaty bóz bě prawdźepodobnje na tym wina, zo dyrbješe wohnjowa wobora w Hamburgu přijěć. Žona bě nuzowe čisło woliła a rjekła, zo chětro za wohenjom smjerdźi. Jako wobornicy přijědźechu, njewuhladachu ani kur ani woheń. Po dokładnym přepytowanju wšak napadny jim blisko domu kćějaty bozowc, kotryž sylnje wonješe. Žona bě jeho wóń po wšěm zdaću z wohenjom zaměniła.
Sprawnosć wupłaćiła je so mandźelskimaj: Po wopyće w Mnichowskej cyrkwi Našeje knjenje dósta por z Kamjenicy namakansku mzdu 700 eurow. 35lětny turist z Južneje Koreje bě móšeń z wjace hač 20 000 eurami w katedrali ležo wostajił. Mandźelskaj ze Sakskeje pjenjezy namakaštaj a wotedaštaj je policiji. Wot zastojnikow informowany turist so sprawnymaj Kamjeničanomaj na to ze 700 eurami podźakowa.
Sibiu (dpa/SN). W rumunskim měsće Sibiu je so dźensa připołdnju wjerškowe zetkanje krajow EU zahajiło. Dwaj tydźenjej do wólbow Europskeho parlamenta, po krizach minjenych lět a po dołhej debaće brexita dla chcedźa tónraz signal jednoty a rozmacha wusyłać. Za to chcedźa zhromadnu „Sibiusku deklaraciju“ schwalić, w kotrejž wuznawaja so k zakładnym hódnotam demokratije a prawostatnosće a k sylnišej róli Europy w swětowej politice. Nimo toho chcedźa „strategisku agendu“ za přichodne pjeć lět zdźěłać.
Mjenje pjenjez hač zašłe lěta
Berlin (dpa/SDN). Zwjazkowe knježerstwo dyrbi so na to nastajić, zo dawkowe dochody přichodnje wjace tak nježórla kaž dotal. Zwjazkowy financny minister Olaf Scholz (SPD) chcyše dźensa popołdnju wuslědki najnowšeho trochowanja fachowcow nastupajo dochody stata předstajić. Hižo do toho bu znate, zo smě knježerstwo drje dale z přiběracymi dochodami ličić, budźe pak wo wjele mjenje hač zašłe lěta.
Steinmeier w Słowjenskej
Moskwa (dpa/SN). Ruska ma dźělne wupowědźenje mjezynarodneho atomoweho zrěčenja přez Iran za wuraz protesta přećiwo USA. Prezident Wladimir Putin je wospjet před njepřemyslenym krokom warnował, ke kotremuž běchu so we Washingtonje nastupajo Iran rozsudźili. To praji rěčnik Krjemla Dmitrij Pjeskow wčera w Moskwje. „Nětko widźimy prěnje konsekwency.“ Ruska pak chcyła dale na tym dźěłać, zo so dojednanja zrěčenja dodźerža.
Iranski prezident Hassan Ruhani je wčera dźělne wupowědźenje swojeho kraja z mjezynarodneho Wienskeho atomoweho zrěčenja z lěta 2015 připowědźił. Te měješe Iranej z krutymi mjezynarodnymi kontrolemi produkciju atomowych bróni znjemóžnić. Za to zaručichu tamni partnerojo zrěčenja, předewšěm USA, zo sankcije přećiwo Iranej zběhnu a hospodarske poćahi normalizuja. USA pak běchu zrěčenje loni spočatk meje jednostronsce wupowědźili.