Naprawy zaměrnje zwoprawdźić

Dienstag, 19. März 2019 geschrieben von:

Na Běłowodźanskim forumje wo strukturnej změnje wuradźowali

Běła Woda (AK/SN). Dlěje hač tři hodźiny bě wón připosłuchał. Heinz Ebert z Běłeje Wody zwurazni po forumje sociokulturneho centruma Telux k strukturnej změnje w Běłej Wodźe jasne słowa: „Wuhlowa komisija pokazuje jenož puće a ma poručenja. Politika dyrbjała to za wobydlerjow sylnišo skonkretizować.“ Strukturna změna je cyłotowaršnostny nadawk. Je derje, zo njesteja jenož pje­njezy w srjedźišću. „Trjebamy přede­wšěm našich ludźi we Łužicy. Trjebamy dowěru a sprawnosć. To je za přichod najwažniše“, 87lětny potwjerdźi.

Putin za lěpše poćahi k Ukrainje

Dienstag, 19. März 2019 geschrieben von:

Moskwa (dpa/SN). Ruski prezident Wladimir Putin nadźija so lěpšich poćahow k susodnej Ukrainje, budu-li tam prezidentske wólby za dobrej dwaj tydźenjej nimo. „Nadźijam so, zo so žołma antiruskeho wustupowanja we wólbnym boju bórze pominje a zo so znajmjeńša někajke zakłady wuwića mjezystatnych poćahow wutworja“, rjekny šef Krjemla wčera na wopyće čornomórskeje połkupy Krim powěsćerni Interfax.

Po słowach Putina njeje mjez wo­běmaj ludomaj njepřećelskosće. „Knježi pak njezrozumjenje za tuchwilne knježerstwo, z kotrymž móžemy lědma zhromadnje ‚wusmuž warić‘, zo móhli pozitiwny wuslědk we wuwiću swojich poćahow docpěć.“ Ručež je so strowy rozum přesadźił, chce Ruska poćahi na najwyšej runinje k swojemu susodej wutworić, Putin rjekny. Kijew je po přiswojenju Krimy přez Rusku před pjeć lětami a Moskowskeje podpěry separatistow na wuchodźe Ukrainy dla we wójnskim stawje z Ruskej.

Na Ukrainje wola kónc měsaca noweho prezidenta. Tuchwilny, Petro Porošenko, Ruskej wumjetuje, zo chce wólby mylić.

To a tamne (19.03.19)

Dienstag, 19. März 2019 geschrieben von:

Kruwu z juchoweje jamy wuswobodźili su wohnjowi wobornicy w hessenskim Fürthu. „Kruwje so derje dźe. Móžachmy ju njezranjenu wuchować“, wjeseleše so wohnjowy wobornik. Skoćo njemóžeše sej hižo same z njepřijomneho połoženja wulězć. Wobornicy pak móžachu na zbožo pomhać. Z pomocu wosebiteho gratu a krana woni kruwu skónčnje z jamy wućahnychu. Skótny lěkar so hišće na městnje wo nju staraše.

Bohatych žnjow wina lońšeje nazymy dla maja winicarjo w Němskej dale a wjetši problem, škleńčane bleše wobstarać. Wulke mnóstwo wina pak njeje jenička přičina zastaranskich problemow, zdźěla Němski winowy institut w Bodenheimje pola Mainza. Naprašowanje za škleń­čanymi blešemi spochi přiběra, dokelž so napojowe koncerny plastowych blešow wzdawaja a radšo škleńčane bjeru.

Sakska z druheje strony

Montag, 18. März 2019 geschrieben von:

Drježdźany (B/SN). Kaž hižo lěta do toho bě Drježdźansko-Mišnjanske biskopstwo ze swójskim stejnišćom na kóždolětnych kwasnych wikach w sakskich wulkoměstach zastupjene. „Kwasne wiki skića nam móžnosć, so jako cyrkej w towaršnosći pokazać, pytać nowe puće k čłowjekam a z nimi rěčeć“, wuswětla sobudźěłaćerka biskopstwa a poradźowanje za mandźelstwa, swójby a žiwjenja Claudia Leide. „Je to puć, kotryž z wulkim wjeselom a dźakownosću kročimy.“

Dieceza Drježdźany-Mišno ma z tajkim stejnišćom zaměr, zo wopytowarjo do rozmołwy přińdu z ludźimi, „kotrychž hewak jenož w telewiziji widźiš abo w radiju słyšiš“, potwjerdźa biskop Heinrich Timmerevers. „A dźe tež wo to, Saksku z druheje strony pokazać.“

Tež njekřćeni witani

Berlin (B/SN). Berlinski arcybiskop Heiner Koch přeproša tež njekřćene poriki, zo bychu so žohnować dali. „Pójće cyle jednorje do cyrkwje a zaswěćće sej zhromadnje swěčku, abo dajće so na Božej mši žohnować.“ Štóž wuprosy sej žohnowanje za swoju lubosć, při­znawa, zo njemóže na přikład dźeń Walentina tajke žohnowanje wuskutkować, měni arcy­biskop Koch.

Proces morjenja dla zahajeny

Montag, 18. März 2019 geschrieben von:

Drježdźany (dpa/SN). Sydom měsacow po smjertnym nadpadźe z nožom w Kamjenicy je so dźensa na Drježdźanskim krajnym sudnistwje proces přećiwo jednomu z podhladneju zahajił. Ze Syriskeje pochadźacy wobskorženy dyrbi so morjenja dla zamołwić. Wón je 35lětny wopor w awgusće 2018 zhromadnje z dalšim podhladnym, kiž přeco hišće ćěka, pječa zakłół. Njeskutk bě w Kamjenicy přećiwo wukrajnikam měrjace so protesty a namócnosće zbudźił.

Brexit: Zaso wothłosować

London (dpa/SN). Britiske knježerstwo chcyše so dźensa k dalšemu wothłosowanju wo z Brüsselom wujednanym zrěčenju wo wustupje kraja z Europskeje unije wuprajić. Premierministerka Theresa May bě připowědźiła, najpozdźišo hač do srjedy wo zrěčenju w parlamenće wothłosować dać. Při tym dźe wo to, hač chcyła Wulka Britaniska Brüssel wo to prosyć, termin brexita přestorčić, zo móhli nadrobnosće zrjadować. W Brüsselu wšak na to kritisce zhladuja.

Knježerstwo zmylki přiznało

Do wobkuzłaceje pisaneje instalacije je Choćebuski wuměłc Jörn Hanitzsch minjeny pjatk a sobotu wječor Choćebuske Stare wiki přetworił. Za to bě wón 600 metrow swěcoweje hadźicy składł, z čehož nasta 14 wosebitych skulpturow, přeprošacych wuchodźowarjow k wobhladanju: Swjatki chce Hanitzsch podobnu nócnu akciju w zwěrjencu přewjesć. Foto: Michael Helbig

Nowe šansy za Viadrinu

Montag, 18. März 2019 geschrieben von:

Myto Leibniza profesorej uniwersity w Frankfurće nad Wódru spožčene

Frankfurt n. W. (RD/SN). Socialny wědomostnik prof. dr. Andreas Reckwitz přija minjeny tydźeń Myto Gottfrieda Wil­helma Leibniza, kotrež spožča Němske slědźenske zjednoćenstwo (DFG). Wón je mjez lětušimi dźesać lawreatami jenički wědomostnik jedneje z wuchodoněmskich wysokich šulow. Nimo toho je z nim prěni króć wědomostnik Europskeje uniwersity Viadrina w Frankfurće nad Wódru tute wulce hódne a wysoko dotěrowane myto dóstał.

Prezident DFG prof. dr. Peter Strohschneider rěčeše při spožčenju myta w Berlinsko-braniborskej akademiji wědomosćow w Berlinje wo „sławjacym připóznaću, zwjazanym z přilubjenjom njewšědneho wědomostneho swobodneho ruma“. Tutón swobodny rum maja wu­znamjenjeni z pjenježnym mytom po 2,5 milionach eurow, kotrež móža přichodne sydom lět za swoje slědźenje wužiwać. Nowu swobodu chwaleše sej tež zwjazkowa ministerka za slědźenje Anja Karliczek (CDU) w swojich postrownych słowach na zarjadowanju.

Kóžda ideja je witana

Montag, 18. März 2019 geschrieben von:
Ani měsac wjace chwile njeje, zo bychu so tež serbscy zajimcy ze swojim projektom na wubědźowanju „Sakskeho fondsa Čiń sobu“ wobdźělili. Zo Zwjazkowe předsydstwo Domowiny župy a towarstwa namołwja, so tam wobdźělić, je prawje. Samozrozumliwe je, zo płaći to za wšěch Serbow. Wosebita kategorija „Łužica – žiwa dwurěčnosć“ je na „specifiske wužadanja strukturneje změny za serbsku ludowu skupinu“ wusměrjena, kaž we wupisanju rěka. Ideje zapodać potajkim měli Domowinjenjo a Njedomowinjenjo. Wšako trjebamy kóždu mysl. A za to je njewotwisna jury trěbna. Hač je zbožowne, zo mjez šěsć wosobami hnydom tři sakskej Radźe za serbske naležnosće přisłušeja? Předsydka zastupuje gremij po předwidźanym kluču. Zo pak w dwěmaj župomaj angažowanu wosobu nimo pomjenowaneje ze serbskeje rady za sobudźěło w tajkej jury nimaja, zda so znjeměrnjace być. Nadźijam pak so, zo ideja rólu hraje a nic, štó je ju zapodał. Axel Arlt

Budyšin dyrbi rozrosć

Montag, 18. März 2019 geschrieben von:

Budyšin (CRM/SN). Kandidaća strony CDU za Budysku měšćansku radu a wjesne rady su so minjenu srjedu w hotelu „Best Western Plus“ při Serbskich hrjebjach w Budyšinje zjawnosći předstajili. Wjace hač połsta kandidatkow a kandidatow je zwólniwych, pak dale na komunalnej runinje so angažować pak so jako nowačk do tohole čestnohamtskeho skutkowanja zadźěłać.

Dokelž je ličba wobydlerjow Budyšina mjeztym pod 40 000 spadnyła, dyrbi so parlament pomjeńšić. Tak je wězo slogan „Budyšin dyrbi rozrosć“ na městnje.

„Naša lisćina je dosć wobšěrna, štož wězo jara zwjesela. Nažel pak njeje so najebać wosobinske rozmołwy poradźiło, nowych serbskich kandidatow zdobyć“, praji předsyda měšćanskeho zwjazka CDU Tobias Schilling. Dotalnemu čłonej Joachimej Cyžej z Bolborc njejsu so dalši Serbja za kandidaturu měšćanskeje rady w stronje CDU přidružili. Situacija we wjesnych radach Mały Wjelkow, Delnja Kina, Słona Boršć/Bolborcy a Sćijecy pak je trochu lěpša.

To a tamne (18.03.19)

Montag, 18. März 2019 geschrieben von:

W awće na kromje dróhi dźěćo porodźiła je žona we wuchodnej Hessenskej. 28lětna bě wčera po puću do chorownje, jako dósta sylne hrona. Tak muž na kromje zwjazkoweje dróhi B 84 pola Hünfelda zasta. Policija wodźeše wobchad nimo awta, nuzowy lěkar při porodźe pomhaše. Mać a hólčk Feliks staj strowaj. Tež nan je wšitko derje přetrał.

W cuzym domje wusnyłoj staj sej wopitaj młodostnaj w saksko-anhaltskim Halberstadće. Na dompuću z party běštaj so zabłudźiłoj. Jedyn z njeju widźeše wote­wrjene durje terasy a dźěše do ćopłeho bydlenja. Tamny sej na stólcu na zahrodźe wusny. Jako wobsedźer domu jeju wuhlada, zawoła policiju. Zastojnicy su 16lětneju na to domoj pósłali.

Serbska debata

Neuheiten LND