Dobry tydźeń po zahubnym cyklonje „Idai“ w juhowuchodnej Africe ...
Namołwjeja k dostojnosći
Oświęcim (dpa/SN). Wopomnišćo bywšeho němskeho nacistiskeho zaničowanskeho lěhwa Auschwitz njedaloko pólskeho Oświęcima wopytowarjow napomina so dostojnje zadźeržeć. Tak njesměli ludźo po kolijach balansować a to hišće fotografować. „Myslće na to, zo sće na městnje, hdźež su wjace hač milion ludźi morili“, wopomnišćo twitteruje a namołwja, wopory holocausta z respektom wopomnić.
„Je lěpšich městnosćow, běhanje po wuskej žerdźi zwučować hač ta, kotraž symbolizuje deportaciju statysacow ludźi do smjerće.“ Tak rěka w internetnej zdźělence, kotrejž su wobrazy wopytowarjow připowěsnjene, balansowacych po kolijach smjertneho lěhwa. „Fotografowanje we wopomnišću nochcemy zakazać. Prosymy pak wopytowarjow, so při tym dostojnje zadźeržeć.“ W Auschwitzu běchu nacionalsocialisća wjace hač milion ludźi, zwjetša Židow, morili.
Časniki wjace njepřestajić
Milion ludźi demonstrowało
London/Brüssel (dpa/SN). Britiska premierministerka Theresa May steji hladajo na hrožacy chaotiski wustup kraja z Europskeje unije pod dźeń a wjetšim ćišćom. Knježerstwo móhło ju hižo bórze k wotstupej nuzować, kaž britiske medije rozprawjeja. Tak budźe tutón tydźeń za politiski přichod Theresy May rozsudny. Pječa chcyła wona parlament jutře hišće raz wo z Brüsselom wujednanym zrěčenju wothłosować dać. EU bě Londonej poskićiła, wustup ze zhromadźenstwa na 22. meju přestorčić, jeli parlament zrěčenju přihłosuje. W druhim padźe dyrbi Wulka Britaniska hač do 12. apryla rjec, kak sej brexit předstaja.
Wčera bě w Londonje wjace hač milion ludźi ze wšěch dźělow Wulkeje Britaniskeje přećiwo wustupej kraja z Europskeje unije demonstrowało. Demonstrowali pak su tež přiwisnicy brexita, byrnjež zdawna nic telko. Mjeztym je wjace hač pjeć milionow wobydlerjow kraja internetnu peticiju přećiwo brexitej podpisało. Tak je parlament nuzowany hišće raz wo tym debatować.
Wjace pjenjez na dobro dźěći
Zwjazkowy sejm wyše přiražki chudym swójbam wobzamknył
Berlin (dpa/SN). Swójby ze snadnymi dochodami móža hižo bórze z wjace pjenjezami ličić. Zwjazkowy sejm je kónc tydźenja nowy swójbny zakoń swójbneje ministerki Franziski Giffey a dźěłoweho ministra Hubertusa Heila (wobaj SPD) schwalił. Zakoń předwidźi wyše přiražki k dźěćacemu pjenjezej, wjace darmotnych pěstowarskich městnow a dalše socialne lěpšiny, kaž darmotny wobjed w šuli. Swoje lěpšiny změja po wobličenjach zwjazkoweho knježerstwa wjacore miliony dźěći, jeli starši wotpowědnu próstwu wo přiražku zapodadźa. Staršim skići noworjadowanje financielne wolóženja, Hubertus Heil připowědźi. Dźěćom wotewru tak šansy na samopostajowane žiwjenje, njewotwisnje wot socialneho pochada. „Chcemy, zo kóžde dźěćo w Němskej swoje žiwjenje zmištruje.“
SPD chce wojować
To a tamne (25.03.19)
Jastwo hač do pjeć lět hrozy 19lětnemu Čechej za dospołnje nimokulene zadobyće do fitnesoweho kluba w Praze. Tam bě so wón wucychnował a nimale 8 000 eurow škody zawostajił. Po tym sej w pódlanskej stwě wusny, hdźež jeho wobsedźer kluba nazajtra rano nańdźe a nablaku policiju zawoła. Prawdźepodobnje steješe paduch pod wliwom drogow a njebě hižo kmany twochnyć.
Z kwasom je sej jaty na dowolu na Mallorce drogi wobstarać chcył. Zastojnikam, kotřiž jeho jako nawoženju na kwas přewodźachu, napadny podhladne zadźerženje njewjesty a tamnych hosći. Po tym zo bě nawoženja na nuzniku pobył, namakachu w jeho kabaće wjacore z hašišom pjelnjene kondomy. Policisća na to wšu kwasnu hosćinu zajachu a dowjezechu muža njewoženjeneho wróćo do jastwa.
Ruska kritizuje Trumpa
Moskwa (dpa/SN). Ruska je prezidenta USA Donalda Trumpa jeho wuprajenjow k statusej Golanskich wyšin dla kritizowała. Trump bě so za to wuprajił, lěta 1967 wot Israela wobsadźene syriske Golanske wyšiny jako israelski teritorij připóznać. Z Moskwy nětko rěka, zo by to direktne ranjenje wobzamknjenjow UNO było. Po mjezynarodnym prawje su wyšiny dale teritorij Syriskeje. Tež Turkowska a Syriska Trumpa kritizujetej.
Mandat wojakow podlěšeny
Berlin (dpa/SN). Zwjazkowy sejm je mandat zasadźenja němskich wojakow w Afghanistanje wo dalše lěto podlěšił. Wjetšina zapósłancow wčera w Berlinje za to hłosowaše, ze zasadźenjom praktisce bjez změnow hač do 31. měrca 2020 pokročować. Zwjazkowa wobora móže tak za zasadźenje NATO „Resolute Support“ dale hač do 1 300 wojakow do Afghanistana słać. Tam maja woni wěstotne mocy podpěrać a wukubłać.
Wopory nadpada wopominali
