Choćebuz (SN/at). „Łužica njeje a njebě ženje skiwlacy region, ale hordy.“ Słowa braniborskeho ministerskeho prezidenta Dietmara Woidki (SPD) wčera na nowolětnym přijeću města Choćebuza rěčachu mnohim přitomnym z wutroby. A premier bě sej wěsty, zo „dyrbi tele město region zaso bóle nawjedować“. A to wosebje pod njelochkimi wužadanjemi předstejaceje strukturneje změny. Dietmar Woidke žada sej tohodla wotnožku zwjazkoweje towaršnosće za planowanje a twar dalnodróhow njezasydlić w Bayerskej, ale we Łužicy. To wotpowěduje žadanju noweje hospodarskeje towaršnosće Łužica za zwjazkowymi zarjadami a wědomostnymi zarjadnišćemi, kotrež přinjesu na přichod orientowane a derje zapłaćene dźěłowe městna do regiona. Zdobom wobkrući Woidke wusku zhromadnosć nastupajo přichodne wuwiće Delnjeje a Hornjeje Łužicy tež z nowym sakskim ministerskim prezidentom Michaeolom Kretschmerom (CDU).
Berlin (AW/SN). Swoju diplomatisku misiju w Zwjazkowej republice Němskej zakónči po sydom lětach skutkowanja wulkopósłanc Ruskeje federacije Wladimir Michajlowič Grinin. Wčera popołdnju přeprosy wón do domu ruskeho wulkopósłanstwa w Berlinje Pod lipami na rozžohnowanske přijeće. Na nim wobdźělichu so wysocy politikarjo zwjazkoweje republiki, w Berlinje akreditowani diplomaća druhich krajow, předewzaćeljo, kulturnicy a zastupjerjo towaršnostnych organizacijow. Woni wupřachu wysokemu diplomatej, kiž bě w nowembru 70. narodniny woswjećił, do dalšeho skutkowanja wšo najlěpše.
Z kradnjenym wojerskim awtom je muž w sewjernej Ruskej njedaloko Murmanska cuze awto wobškodźił a na to do wukładneho wokna kupnicy jeł. Njewobrónjeny transporter bě wón do toho na ležownosći paramilitariskeho wukubłanišća pokradnył. Po puću do města zrazy wón do parkowaceho awta a přełama z rjećazowym jězdźidłom wukładne wokno. W kupnicy chcyše samo hišće blešu wina spakosćić. Policija wšak muža zaja, bjez toho zo by so wobarał.
W ćěłowym měše zaso wotućił je jaty w Španiskej. Do toho běchu lěkarjo, kotřiž chcychu jeho poprawom obdukować, smjerć muža zwěsćili. Dohladowarjo běchu jateho z módrym mjezwočom a bjez žiwjenskeho znamjenja w celi našli. Strach lěkarjow, zo móhli mozy muža předołho bjez kislika być, bě njewoprawnjeny: Wón prašeše so hnydom za swojej žonu.
Zhorjelc (AK/SN). Wobydlerjo Zhorjelskeho wokrjesa ćěkancow a migrantow zwjetša ćerpja, nimaja pak jich za runoprawnych. To je jedyn z wuslědkow najnowšeho woprašowanja w naležnosći, kotrež su wčera w Zhorjelcu předstajili. W nadawku krajnoradneho zarjada běštej so Zhorjelski Institut za komunikaciju, informaciju a kubłanje kaž tež Lipšćanska Towaršnosć za analyzu wikow a strategiju loni w nowembru a decembru telefonisce reprezentatiwnje tysac wobydlerjow woprašowałoj. Sakske statne ministerstwo za socialne a škit přetrjebarjow bě studiju financowało.
Při woprašowanju so mjez druhim wukopa, zo chce wjetšina ludźi ličbu nowych ćěkancow we wokrjesu Zhorjelc wobmjezować. Kriminelnych wukrajnikow dyrbjeli zamołwići konsekwentnje wupokazać. Na tamnym boku měli so připóznaći ćěkancy tak derje kaž móžno integrować.
Berlin (dpa/SN). Najebać zwadu wo daledawanje internych informacijow su wodźacy zastupnicy CDU, CSU a SPD do dźensnišich sonděrowanskich rozmołwow k wutworjenju knježerstwoweje koalicije dźensa signale nadźije wusyłali. Dotalne rozmołwy su „dobry zakład dowěry a kolegialnosće“, rjekny generalny sekretar CSU Andreas Scheuer w Berlinje. Prěnje mjezywuslědki drje hižo předleža, přiwšěm prošeše Scheuer wo sćerpnosć. Sonděrowanja traja po planje hač do jutřišeho wječora.
K zetkanju zwólniwy
Seoul (dpa/SN). Prezident Južneje Koreje Moon Jae In je zwólniwy so ze sewjerokorejskim mócnarjm Kimom Jong Unom zetkać, su-li „wuměnjenja prawe“. By-li ke „konkretnym wuslědkam“ dóšło, by wón tajkemu zetkanju přihłosował, rjekny Moon w stolicy Seoulu. Kónčny zaměr je dalšej wójnje zadźěwać a wšitke jadrowe brónje na korejskej połkupje wotstronić. Wčera běštej so delegaciji wobeju krajow dojednałoj swoje poćahi polěpšić. Sewjerna Koreja chcyła w februaru delegaciju na Olympiske zymske hry do južnokorejskeho Pyeongchanga pósłać.
Staji prašenje dowěry
Brüssel/Waršawa (dpa/SN). Tři tydźenje po zahajenju prawniskostatneho jednanja Europskeje unije přećiwo Pólskej so Waršawa a komisija EU zaso zbližatej. Prezident komisije Jean-Claude Juncker přija wčera wječor ministerskeho prezidenta Mateusza Morawieckeho w Brüsselu. Při tym staj wobaj zwólniwosć k dialogej signalizowałoj. Komisija nadźija so nětko konstruktiwneho rozrisanja, kaž rěčnik Junckera zdźěli.
Komisija EU bě w decembru justicneje reformy w Pólskej dla sankciske jednanje po artiklu 7 europskich zrěčenjow zahajiła, dokelž ma prawniskostatnosć a dźělenje mocy w Pólskej za wohrožene. Dotal njesłyšana to eskalacija w zwadźe wo čłonski kraj EU.
Ćěkańca po spadnej role při domje je so paduchej w Frankfurće nad Mohanom dospołnje nimokuliła. Wón padny z druheho poschoda a złama sej wjacore kosće. 27lětny bě so do běrowoweho twarjenja zadobył, při čimž aktiwizowaše alarmowu připrawu. W panice je z woknom won zalězł a spytał, po role ćeknyć. Ta pak so wułama a wopity muž padny do hłubiny.
Za wobchad njekmane nakładne awto je zwjazkowa policija na awtodróze A 4 pola Budyšina zadźeržała. Při Lkw-ju pobrachowaše jedne koleso. 40lětny šofer njebě skóncowane koleso wuměnił, ale měješe wósku bjez kolesa z pasami horje zwjazanu. Tak bě wón ze 14 tonami awtowych dźělow po puću. Policistam wšak napadny, zo so připowěšak strašnje na prawy bok chila. Na wotpočnišću pola Słoneje Boršće woni strašnu jězbu zakónčichu.
Budyšin (CS/SN). Přetorhnjene sonděrowanske jednanja k wutworjenju tak mjenowaneje jamaiskeje koalicije CDU/CSU, FDP a Zelenych su sakskim politikarjam FDP tež jasne wuznaće k brunicy. Tole zwuraznichu generalny sekretar sakskeje FDP a zapósłanc zwjazkoweho sejma Torsten Herbst runje tak kaž krajny předsyda strony Holger Zastrow na tradicionalnym zetkanju Třoch kralow sakskeje FDP zawčerawšim, njedźelu, w Budyskim Dźiwadle na hrodźe. Sakscy liberalni su tuž dosć spokojom, zo je zwjazkowy předsyda FDP Christian Lindner runje hišće w prawym času jednanja zakónčił, wšako běchu mnozy w stronje tak a tak přećiwo tomule zwjazkej. „Bychmy-li jamaiskej koaliciji přistupili, bychmy spěšny kónc wudobywanja brunicy sobu podpisać dyrbjeli“, rjekny Holger Zastrow. Njemóžeš pak politiku činić, bjez toho zo zajimy ludźi wobkedźbuješ, wón podšmórny. Při tym kritizowaše Zelenych, kotřiž su so bjez dopokazanych teorijow přećiwo cyłemu regionej wobroćili.