Po dny trajacych zliwkach bědźa so w Delnjosakskej a Durinskej z wulkej wodu. Dźensa je z kanalizacije so tłóčaca woda stare město delnjosakskeho Goslara zapławiła (hlej wobraz). Wohnjowa wobora spyta z pěskowymi měchami nasypy rěkow skrućić. Dźěle města dyrbjachu ewakuować. Tež druhdźe nuzowe kwartěry za wobydlerjow přihotuja. Foto: dpa/Swen Pförtner

Žane dojednanje

Mittwoch, 26. Juli 2017 geschrieben von:
Rom (dpa/K/SN). Zastojnicy italskeho knježerstwa a pomocnych organizacijow su wčera w italskej stolicy wo kodeksu zadźerženja jako zakład za wuchowanje migrantow na Srjedźnym morju jednali, dojednać pak so njemóhli. Tohodla so woni jutře znowa zeńdu, rozprawja Titus Molkenbur, kiž wobdźěla so na jednanjach za němsku NGO Jugend rettet. Z kodeksom zadźerženja chce italske knježerstwo nastajić jasne prawidła za wuchowanske akcije na Srjedźnym morju, štož pak je pola pomocnych organizacijow njewěstosć wuskutkowało. Z postupowanjom italskeho knježerstwa čuja so skriminalizowane, byrnjež po prawu a zakonjach za morjo jednali.

Poražka so bliži

Mittwoch, 26. Juli 2017 geschrieben von:
Luxemburg (dpa/SN). W zwadźe rozdźělowanja ćěkancow dla je poražka Madźarskeje a Słowakskeje před Europskim sudnistwom wotwidźomna. Generalny prawiznik Yves Bot je dźensa poručił, skóržbje wobeju krajow přećiwo rozdźělowanju migrantow z Italskeje a Grjekskeje na tamne čłonske staty EU wotpokazać. Po jeho měnjenju měłoj so Madźarska a Słowakska na tym wobdźělić. Zwjetša sudnicy w Luxemburgu doporučenju wěcywustojneho slěduja. Wusud wočakuja w septembru. Knježerstwje w Budapesće a Bratislawje běštej přećiwo wobzamknjenju EU w septembrje 2015 skoržiłoj, hač do 120 000 ćěkancow rozdźělić. Wobaj krajej běštaj runje tak kaž Čěska a Rumunska při wothłosowanju podležałoj. Pólska bě swój čas małemu kontingentej přihłosowała, mjeztym pak tohorunja wotpokazuje, ćěkancow přiwzać.

USA chcedźa dalše sankcije

Mittwoch, 26. Juli 2017 geschrieben von:
Washington/Berlin/Moskwa (dpa/K/SN). Dom reprezentantow je z přemóžacej wjetšinu naćisk zakonja schwalił, kiž předwidźi dalše sankcije napřećo Ruskej, Iranej a Sewjernej Koreji. Nětko dyrbi hišće senat wo nim wothłosować a potom prezident Donald Trump jón podpisać. Po wonym zakonju je wotmyslene, dotalne sankcije, napřećo Ruskej praktikowane jeje pozdatneje róle w ukrainskim konflikće a móžneho wobwliwowanja prezidentskich wólbow dla, rozšěrić a wutwarić. Naćisk zdobom prezidentej mjezy staja nastupajo ewentualne zběhnjenje sankcijow. Němski wonkowny minister Sigmar Gabriel (SPD) komentuje wotpohlad dalšich sankcijow ze słowami: „Njemóže być, zo sankcije nětkole za to znjewužiwaja, wutłóčeć ruski płun, zo móhli ameriski předawać.“ Ruska předwidźane rozšěrjenje sankcijow přećiwo njej zasudźa, dokelž je to zadźěwk na puću normalizowanja poćahow mjez woběmaj krajomaj.

Sej druhich zwjazkarjow pytać

Mittwoch, 26. Juli 2017 geschrieben von:

Předsyda čěskeho wustawoweho sudnistwa kritizuje reformy w Pólskej

Brno (dpa/SN). Najwyši sudnik Čěskeje republiki Pavel Rychetský wobhladuje wuwiće w susodnej Pólskej jara starosćiwje. Tež weto prezidenta Andrzeja Dudy nastupajo zakoń wo noworjadowanju krajneje sudniskeje rady a najwyšeho sudnistwa je w jeho wočach jeno dźělny wuspěch. Duda bě wobaj zakonjej póndźelu blokował, na druhim boku pak noworjadowanje powšitkowneje justicy podpisał. „To je runje tajki hoberski nadpad na njewotwisnosć sudniskeje mocy kaž tamnej zakonjej“, kritizowaše předsyda čěskeho wustawoweho sudnistwa, kotrež ma swoje sydło w Brnje, w telewizijnym sćelaku ČT.

„Demokratija woznamjenja dialog, a tón smy w Pólskej dotal parowali“, Rychetský­ rjekny. Wo reformje justicy njesměła jenička politiska strona rozsudźić, byrnjež wona wjetšinu w parlamenće měła. „Nazhonjenja z 1930tych lět a z kónca Weimarskeje republiki wuča, zo móže so demokratija tež sama zničić“, 73lětny napomina.

To a tamne (26.07.17)

Mittwoch, 26. Juli 2017 geschrieben von:

Dospołnje nimo kulił je so pospyt žony w Mnichowje, wosace hnězdo na balkonje bydlenja wotpalić. Po tym zo běchu so meble na balkonje zapalili, rozpřestrěchu so płomjenja w bydlenju a na balkon přichodneho poschoda, wohnjowa wobora zdźěli. Wobornicy woheń podusychu. Cyłkownu škodu trochuja na 50 000 eurow. Žona móžeše bydlenje hišće w prawym času wopušćić a so njezrani. Wosace hnězdo njejsu po wohenju hižo namakali, kaž rěkaše.

Štyrilětny je w badiskim Kehlu zasadźenje policije zawinował, po tym zo je chowanje hrał. Kaž policija zdźěli, bě so přiwuzny, kiž měješe na hólca kedźbować, přizjewił a zdźělił, zo je hólc tež po dokładnym pytanju zhubjeny. Na to policija za nim pytaše. Muž so w tym času hišće raz dokładnišo po domje rozhladowaše a namaka štyrilětneho – pod łožom.

Cyrkwi zasudźatej protesty

Dienstag, 25. Juli 2017 geschrieben von:

Bonn (B/SN). Wobě wulkej cyrkwi w Němskej běštej we wobłuku wjerška G 20 namołwjałoj k měrliwym a konstruktiwnym protestam. Kritika na politice G 20 je trěbna, rjeknyštaj předsyda Němskeje biskopskeje konferency, kardinal Reinhard Marx, a bayerski ewangelski krajny biskop Heinrich Bedford-Strohm. Mnohe kraje hroža, zo njepřewozmu hižo zamołwitosć za derjeměće swěta. Rosćaca njerunosć pak swětowu stabilitu wosłabja. Zo je k eska­laciji dóšło, biskopaj raznje zasudźataj.

Wo awtonomnych systemach

Miliony za natwar Mossula

Dienstag, 25. Juli 2017 geschrieben von:

Berlin (dpa/SN). Po wuswobodźenju Mossula wot teroristiskeje milicy Islamski stat (IS) je zwjazkowe hospodarske a wuwićowe ministerstwo sto milionow eurow za nowonatwar irakskeho města přilubiło. „Nětko, hdyž je město wuswobodźene, móžemy swoje programy spěšnje wutwarić“, rjekny minister Gerd Müller (CSU) nowinarjam. Mossul bě tři lěta wažny centrum IS. Při wuswobodźenju přez irakske wójsko bu roztřělane.

Politiske rozmołwy z EU

Brüssel (dpa/SN). Turkowski wonkowny minister Mevlüt Çavuşoğlu a minister za europske naležnosće Ömer Çelik staj so dźensa k politiskim rozmołwam do Brüssela podałoj. Tam wočakowaštaj jeju społnomócnjena EU za wonkowne naležnosće Federica Mogherini a komisar Europskeje unije za rozšěrjenje Johannes Hahn. Na programje stejachu rozmołwy wo hospodarskich stykach mjez Turkowskej a EU a wo migraciskej politice.

Talibanojo Dshani Khel zdobyli

Z wulkim nawalom medijow je so dźensa na Mnichowskim wyšim krajnym sudnistwje poslednja faza procesa přećiwo neonacistiskej teroristiskej a mordarskej skupinje NSU a hłownej wobskorženej Beaće Zschäpe (nalěwo) zahajił: Statne rěčnistwo je zakónčacy pledoajej přednjesć započało. Proces přećiwo NSU bě so 6. meje 2013 započał. Foto: dpa/Peter Kneffel

Detektory zaso wotstronjene

Dienstag, 25. Juli 2017 geschrieben von:
Jerusalem (dpa/K/SN). Kowowe detektory, kotrež bě Israel na Templowej horje po njedawnych njeměrach nastajił, su zaso wotstronili. Nětko chcedźa je z hinašej technologiju narunać. Postupne technologiske pomocne srědki maja po israelskich medijach „mudre přepruwowanje po cyłym starym měsće Jerusalema zmóžnić“. Na te wašnje wopytowarjam Temploweje hory wěstotu lěpje zaruča. Instalowanje detektorow bě přiwótřiło napjatosće mjez Israelom a Palestinjanami. Israel bě nastroje nastajić dał, po tym zo běchu atentatnicy na Templowej horje israelskeju policistow morili. Palestinjenjo nowych kontrolnych naprawow dla Templowu horu bojkotuja.

Serbska debata

Neuheiten LND