STROWOTNISTWO Čěskeje republiki bědźi so z problemom, zo wotchadźa spochi wjace lěkarjow a chorobnych sotrow do wukraja, mnozy do Němskeje. Hač do­srjedź meje je 160 medicinarjow wo trěbne podłožki požadało, kaž přisłušne městna wozjewichu. Telewizija ČT 24 zdźěli, na lěkarsku komoru so powołujo, zo kóždy pjaty absolwent mediciny do wukraja dźe. W někotrych regionach knježi w strowotnistwje napjata situacija. Tak dyrbjachu w Karlovarskej chorowni njedostatka lěkarjow a sotrow dla někotre stacije hromadu połožić. Chorownja spyta tuž z přidatnej zasłužbu personal wabić, přilubjejo lěkarjam a sotram nahladne přiražki k normalnej mzdźě.

Pjenjezy su nimo lěpšich dźěłowych wuměnjenjow a přihódnišeho systema zdźěłowanja sobu hłowna přičina, zo wotchadźa telko strowotniskeho personala za hranicy. Minister za strowotnistwo Svatopluk Němeček tohodla při­powědźi, zo nimo tuchwilneho zwyšenja mzdow wo pjeć procentow dalše 4,5 miliardow krónow (něhdźe 164 milionow eurow) za tónle zaměr přewostaji. Sotry dóstanu nimo toho wjace kompetencow.