Nowe pólske knježerstwo připowědźa razne změny

Waršawa. Nowe knježerstwo Pólskeje je minjene dny dźěłać započało a při tym jara spěšnje pokazało, što měli ludźo přichodnje wot njeho wočakować – w kraju samym runje tak kaž po wšej Europje.

Prěni mjezynarodny akcent je tele dny nutřkowny minister Mariusz Błaszczyk sadźił. Na konferency nutřkownych ministrow Europskeje unije w Brüsselu wón hišće raz potwjerdźi, zo Pólska, kaž wot stareho knježerstwa hišće přilubjene, 7 500 ćěkancow njepřiwozmje. Wotpowědny rozsud dotalneho knježerstwa mjenowaše minister Błaszczyk „wulki zmylk“. W tym zwisku wón připowědźi, zo chcyła Pólska nětko swoje mjezy zaso kruće škitać, kaž bě to hižo do přistupa kraja k Schengenskemu rumej w lěće 2007 praktikowała.