LĚKOWAĆ po chinskim wašnju móža ludźi bórze w Čěskej. W Hrádecu Kralovym nastanje prěnja klinika tradicionalneje chinskeje mediciny. Zrěčenje wo tym je ministerski prezident Bohuslav Sobotka składnostnje swojeho wopyta kraja wulkeje murje w Pekingu podpisał. „Tradicionalna chinska medicina je za Čěsku bjezdwěla nowa wěc“, rjekny direktor Hrádeckralovskeje chorownje prof. Roman Prymula. Financować budźe projekt Shanghaiska towaršnosć CEFC, kotraž ma hižo podźěle mjez druhim na koparskim klubje Slavia. „Zasadnje mjez tradicionalnej chinskej medicinu a zapadnej njeje wulkich rozdźělow – wobě skutkujetej za strowotu a dobro čłowjeka“, měni chinski eksperta Tchou Chua. Wěsty rozdźěl wobsteji w tym, zo wužiwa zapadna medicina wjace syntetiskich lěkow a produktow, tradicionalna chinska medicina złožuje so porno tomu skerje na přirodne produkty a procedury. Po słowach prof. Prymule pomha wona wosebje při chroniskich chorosćach a migreny, lěkuje pak tež zahorjenja. K tomu maja Chinjenjo dobre nazhonjenja z lěkowanjom njepłódnosće.