Praha (dpa/SN). W nowej zwadźe wo tak mjenowane Benešowe dekrety je Čěska madźarskeho wulkopósłanca do wonkowneho ministerstwa skazała. Wukazy čěskeho prezidenta Edvarda Beneša běchu po kóncu Druheje swětoweje wójny zakład, zo wuhnachu miliony sudetskich Němcow a statysacy Madźarow z tehdyšeje Čěskosłowakskeje.
Wo najnowše njedorozumjenja bě so prezident madźarskeho parlamenta László Kövér postarał, jako nowinje Pravo rjekny: „Čěska a Słowakska njebyštej so z čłonom Europskeje unije stać směłoj, dołhož je zakoń, kotryž bazuje na principje kolektiwneje winy, wobstatk zakonskeho porjada.“ Nětko madźarski wulkopósłanc twjerdźeše, zo njeje wuprajenje prezidenta parlamenta zdobom pozicija knježerstwa w Budapesće. Čěski wonkowny minister Lubomír Zaorálek sej žadaše, zo njesměli so podobne misnjenja wospjetować. Benešowe dekrety su kruty wobstatk čěskeho zakonskeho porjada, w swojej skutkownosći pak mjeztym „wotpočuja“, kaž Zaorálek w rozmołwje z madźarskim wulkopósłancom w Praze zwurazni.
