Nowy pólski medijowy zakoń schwaleny – prěnje personalne změny

Waršawa. Z wotmachom nowe pólske knježerstwo planowane zakonske a personalne změny w kraju zwoprawdźa. Tak su hišće silwester w sejmje a senaće – druhej komorje parlamenta – nowy medijowy zakoń wobzamknyli, kotryž ma daloko sahace wuskutki na wšón medialny system w kraju.

Sobu najwažniša změna potrjechi dotal njewotwisny Komitej rozhłosa a telewizije. Gremij bě w personalnych a financnych prašenjach rozsudźał, bjez toho zo móhło knježerstwo wliw wukonjeć. Tónle komitej je z nowym zakonjom faktisce rozpušćeny. Wot 1. januara dohladuje medije jenička wosobina: wot knježerstwa pósłany minister Dawid Jackiewicz. Wón nětko postaja, štó smě w nowej Radźe narodnych medijow dźěłać. To wšak rěka, zo přichodnje šef narodnokonserwatiwneje strony Prawo a sprawnosć Jarosław Kaczyński a prezident Andrzej Duda w personalnych a financnych naležnosćach medijow postajataj.