Start do zeleneje sezony lětsa pozdźišo hač hewak
Hižo před tydźenjemi běchu w jěchanskim sporće zaso prěnje turněry přewjedli, ale jeno za profijow a powołanskich jěcharjow. Wot minjeneho tydźenja su nětko zaso prěnje wubědźowanja za amaterow w Sakskej wupisane.
Tež dorost serbskich mnohostronskich jěcharjow je z konkurencu mocy měrił. Jakub a Marija Bobkec běštaj na přikład w Seelitzu pola Rochlitza, hdźež wotmě so turněr w mnohostronskim jěchanju. Jakub startowaše ze swojim młodym konjom w pruwowanju za hišće njenazhonite konje. Kobła je bjez skakanskich zmylkow pruwowanje zakónčiła a tak prěnje pozitiwne nazhonjenja zběrała. Marija wobdźěli so na pruwowanju za młodych jěcharjow. Z konjom Carlosom bě wona tohorunja bjez zmylka po puću a doby samo myto. Sotře Franciska a Felicitas Bobkec běštej na skakanskim a jěchanskim turněrje w Kulowje a běštej tam wuspěšnej na skakanjach wšelakich klasow. Konstantny trening za čas koronapandemije bě so wudanił.