W Čěskej móža so židźa wěsći čuć

Donnerstag, 10. Juni 2021 geschrieben von:

Praha (dpa/SN). Zastupjerjo židow w Čěskej skorža přiběraceje antisemitiskeje šćuwańcy w interneće dla. W zwisku z koronapandemiju so zapřisahanske teorije rozšěrjeja, rěka we wčera wozjewjenej lětnej rozprawje čěskeje federacije židowskich wosadow. Wot cyłkownje 874 přeńdźenjow su loni 866 blogowych zapiskow, komentarow, karikaturow a dalšich awdiowizuelnych zapisow w interneće zwěsćili, kotrež běchu přećiwo židam wusměrjene. W lěće 2019 bě ličba tajkich nadpadow w interneće hišće 685.

Ličba registrowanych padow fyziskeje namocy přećiwo židam a jich zarjadnišćam zwosta porno tomu w jednocyfrowym wobłuku. Čěska wostanje potajkim kraj, w kotrymž móža so přisłušnicy tejele mjeńšiny wěsći čuć, tež w přirunanju z druhimi krajemi srjedźneje a zapadneje Europy, kaž w mjenowanej rozprawje rěka.

W Čěskej bydli po trochowanjach mjeztym zaso něhdźe 15 000 a 20 000 židow. W lětach wobsadniskeje fašistiskeje Němskeje w Druhej swětowej wójnje bě so nimale 80 000 čěskich židow z wo­porom holocausta stało.

Prěni elefant so coowej narodźił

Mittwoch, 09. Juni 2021 geschrieben von:

Marek Krawc rozprawja za Serbske Nowiny ze susodneje Čěskeje

Zlín. Prěni króć w stawiznach čěskich coologiskich zahrodow je so młodźo afriskeho słona narodźiło. Zašłu njedźelu rano je słonica Kali jeho w Zlínskim zwěrjencu porodźiła, rěčnica coowa zdźěli. Tamne zwěrjata ze słonjaceje skupiny su drohotny dorost bjez wulkich ćežow do swojeho cyłka přiwzali. Plahować afriske elefanty w zwěrjencach je wosebje komplikowane. Hižo před třomi lětami bychu so hladarjo eksotiskich tołstokóžnikow w Zlínskim zwěrjencu nimale nad přirostom wjeselili. Bohužel pak bě so mały elefant tehdy mortwy narodźił.

Šćěpja „Sputnik“

Dienstag, 08. Juni 2021 geschrieben von:
Bratislava (SŽ/K/SN). Wot póndźele sem je wobydlerjam Słowakskeje móžno, přećiwo koronawirusej dać so z ruskim serumom Sputnik V šćěpić. Składnosć k tomu maja w Bratislavje, Michalovicach, Novych Z’amkach, Humennom, Bojniciach, Piešt’anach a Žilinje. Za wužiwanje ruskeho wudźěłka bě ministerstwo za strowotnistwo tydźenja dowolnosć dało. Zdobom skedźbnja na fakt, zo njeje šćěpiwo Sputnik pola europskeje instancy za lěki EMA dotal registrowane. Runo­časnu pokazku na to, zo je lěkar za šćěpjenje ze Sputnikom V zamołwity, mi­nisterstwo sobotu skorigowa, zdźělejo, zo přewozmje stat zamołwitosć. Hač do kónca tydźenja bě so do připrawjenych wirtuelnych čakarnjow wjac hač 6 000 zajimcow za šćěpjenje z ruskim wakcinom přizjewiło. Šćěpiwo Sputnik V bě so hižo w měrcu w nahladnym mnóstwje z Ruskeje do Słowakskeje dóstało. Dokelž njehodźeše pak so wuswětlić, štó bě sej skazał, wuskutkowa to knježerstwowu krizu. Na kóncu přewostaji premier Igor Matovič zastojnstwo ministrej za financy Eduardej Hegerej a sam z nawodom toho ressorta spokoji.

Babiš wotum njedowěry přetrał

Freitag, 04. Juni 2021 geschrieben von:

Praha (dpa/SN). Štyri měsacy do wólbow parlamenta w Čěskej je ministerski prezident Andrej Babiš wotum njedowěry přetrał. Wčera wječor je 89 zapósłancow za wotsadźenje knježerstwa hłosowało. Trěbnu wjetšinu 101 hłosa w parlamenće z 200 zapósłancami su misnyli. Do toho bě opozicija Babišej w raznej debaće zaprajenje w koronapandemiji wumjetowała. Wot spočatka pandemije bě Čěska z 30 000 smjertnymi padami jedne z najhóršich žórłow wirusa.

Rozsudne na kóncu bě, zo su komunisća do wothłosowanja demonstratiwnje žurlu wopušćili, město toho zo bychu přećiwo knježerstwu hłosowali. „Na tajkim dźiwadle so njewobdźělimy“, rjekny stronski předsyda Vojtěch Filip. Prezident Miloš Zeman bě wšak připowědźił, zo chcył knježerstwo hač do oktobra w zastojnstwje wostajić. Babiš steji pod wulkim ćišćom. Jemu hrozy mjez druhim skóržba znjewužiwanja srědkow EU dla. Po tuchwilnych naprašowanjach by wón wólby přěhrał.

Naprawy EU su opoziciji problem

Freitag, 04. Juni 2021 geschrieben von:

Pólska sej žada zajatych aktiwistow swojeje mjeńšiny w Běłoruskej pušćić

Waršawa. Wunuzowane přizemjenje lětadła předewzaća Ryanair w Minsku a zajeće pasažěra, běłoruskeho aktiwista ­Romana Protasjewiča, přez běłorusku policiju je Pólskej wosebite wužadanje. Wšako ma z Běłoruskej tež swoje ćeže.

Ministerski prezident Mateusz Morawiecki reagowaše spočatnje tak kaž wšitcy wodźacy politikarjo Europskeje unije: Wón zasudźi wotwjedźenje mašiny přez běłoruske wojerske lětadło jako „statny terorizm“ a žadaše sej hnydomne pušćenje Protasjewiča z jastwa. Zdobom namołwješe běłoruskeho mócnarja Aleksandera Lukašenka, prawa pólskeje mjeńšiny w Běłoruskej akceptować a jatych pólskich aktiwistow pušćić.

W Běłoruskej bydli po trochowanjach něhdźe 200 000 Polakow jako narodna mjeńšina. Režimej Lukašenka napřećo su někotři z nich kritisce nastajeni, štož wunjese jim přesćěhanje a represalije. Hakle w měrcu bě policija Angeliku Borys, předsydku Zwjazka Polakow w Běłoruskej, a pólsko-běłoruskeho žurnalista Andrzeja Poczobuta do jastwa tyknyła.

Čěske žony móža so rozsudźić

Donnerstag, 03. Juni 2021 geschrieben von:

Praha (dpa/SN). W Čěskej připowědźa so historiski přewrót pola mjenow. Dom ­zapósłancow je wčera noworjadowanje zakonja schwalił, kotrež žonam zmóžnja so pola swójbneho mjena mjez žónskej a muskej formu rozsudźić. Dotal dyrbja žony, kaž w najwjace słowjanskich rěčach tež, swójbne mjeno z kóncowku „ová“ nosyć. Rěka-li mandźelski Novak, rěkaja mandźelska a jeju dźowki Novaková. To pak móhło so bórze změnić. Za změnu hłosowaše 91 zapósłancow, 33 bě přećiwo tomu. Druha komora parlamenta dyrbi noweli hišće přihłosować.

Wot tradicionalneho rjadowanja wu­wzate su dotal žony, kiž su na wukrajnikow wudate, přisłušeja narodnej mjeńšinje abo němskej ludowej skupinje. To bě stajnje zaso kritiku budźiło. Bywša justicna ministerka Helena Valková rěčeše wo „znamjenju njerunohódnoty“ a wo za dźensniši čas absurdnym rjadowanju. Aktiwistki za prawa žonow na to skedźbnjeja, zo zwuraznja so w kóncowce „ová“ tež forma wobsydstwa muža.

Wotpokazany bu zakonski namjet Piratow, splah čłowjeka we wupokazu přichodnje scyła wjace njenaspomnić.

Ma Babiš z wobskóržbu ličić?

Mittwoch, 02. Juni 2021 geschrieben von:

Marek Krawc rozprawja za Serbske Nowiny z čěskeje stolicy

Praha. Ličba infekcijow z koronawirusom w Čěskej dale woteběra. Njedźelu registrowachu strowotniske zarjady jenož hišće 113 nowonatyknjenjow. To je najmjenje wot 2. žnjenca minjeneho lěta. Sydomdnjowska incidenca wučinja tuchwilu třiceći padow na 100 000 woby­dlerjow, wobwod Karlovy Vary měješe ze štyrjomi padami najnišu, Zlínska woko­lina pak z 49 padami najwyšu hódnotu po cyłym kraju.

Tajkich dobrych powěsćow dla kiwaja Čecham dalše přijomne wolóženja. Tak smědźa wot póndźele, po wjace hač pjeć měsacach, hosćencarjo swojich wopytowarjow wonka kaž tež w nutřkownych rumnosćach swojich lokalow posłužować. Tež wobhospodarjerjo sawnow, wellnessowych oazow, kupjelow, diskotekow a kazinow móža so skónčnje zaso wopytowarjow nadźijeć. Přiwisnicy sporta dyrbja wězo płaćiwy negatiwny test wobsedźeć, šćěpjeni być abo wustrowjenje po infekciji dopokazać móc.

Wuslědki za lěto

Mittwoch, 02. Juni 2021 geschrieben von:

Praha (ČŽ/K). Ludličenje 2021 w Čěskej je so njedźiwajcy jeho njezwučeneho digitalneho razu bjez komplikacijow wotměło, hódnoći Čěski statistiski zarjad (ČSÚ) jako organizator akcije. Nětko wón informuje, zo je 87 procentow wobdźělnikow jemu swoje data elektronisce sposrědkowało a tak wjace, hač běchu wočakowali. Dobrych 795 000 ludźi připósła wupjelnjene formulary z póštu. Sobudźěłaćerjo zarjada naprašniki nětko wuhódnoćeja, štož wězo swój čas traje. Wuslědki lud­ličenja 2021 tuž za lěto wočakuja.

Ličenje wobydlerjow, bydlenjow a twarjenjow přewjeduja kóždych dźesać lět. Na nim so wobdźělić je winowatosć čěskich staćanow, ale tež wšěch wosobow, kotrež smědźa dlěje hač 90 dnjow w kraju přebywać abo kiž su w nim azyl dóstali. Štóž tutu winowatosć njespjelni, tomu hrozy pokuta hač do 10 000 krónow.

Narodny plan

Freitag, 28. Mai 2021 geschrieben von:

Praha (ČŽ/K/SN) Čěske knježerstwo je „Narodni plan obnovy“ schwaliło. Za jeho zwoprawdźenje su inwesticije přibližnje 200 miliardow krónow (ně­hdźe 78,5 miliardow eurow) předwidźane. Wot Europskeje unije wočakuje Čěska 171 miliardow krónow (67,7 miliardow eurow) podpěry.

Wony plan wobsahuje šěsć hłownych polow, za kotrež chcedźa pjenjezy předewšěm nałožić. Najwjetši dźěl z nich, cyłkownje 91 miliardow krónow (dobrych 3,75 miliardow eurow), je za wu­twar infrastruktury a tak mjenowaneje zeleneje transformacije předwidźany. Nahladne sumy maja tež hić do klimatiskich projektow a do digitalizacije. Nic naposledk chcedźa z pjenjezami spěchować zdźěłowanje, dźěłowe wiki, wuwiće energije, inowaciju a strowotnistwo.

Wukaz Pólsku chětro zamyla

Freitag, 28. Mai 2021 geschrieben von:

Europske sudnistwo přećiwo Turówskej brunicowej jamje rozsudźiło

Waršawa. Nimale tři lěta trajacy konflikt mjez Čěskej a Pólskej Turówskeje brunicoweje jamy dla je so minjene dny dale přiwótřił. Mjeztym dochadźa k protes­tam pólskich hórnikow a k zaraćenjam na pólsko-čěskich dróhach.

Europske sudnistwo w Luxemburgu bě dźens tydźenja wukazało, zo ma Pólska brunicowu jamu Turów w pólsko-čěsko-němskim třikrajowym róžku hnydom zawrěć. Do toho bě Čěska wot lěta 2019 stajnje zaso na škody skedźbnjała, kotrež Turówska jama zawostaja. Tak su zwěsćili, zo dnowna woda na čěskej stronje spochi woteběra. Rozmołwy ze zastupnikami Pólskeje běchu wobćežne, dokelž woni wobmyslenja susodneho kraja ignorowachu. Tak we Waršawje twjerdźachu, zo su problemy dnowneje wody w Čěskej wuskutki změny klimy a pobrachowaceho dešća. Jako Polacy skónčnje zdźělichu, zo chcedźa brunicownju hač do lěta 2044 dale wjesć a samo hišće rozšěrić, je Čěska na Europskim sudnistwje skoržiła.

Anzeige