Pólska chce kontrolować

Donnerstag, 03. März 2016 geschrieben von:
Waršawa (dpa/SN). Pólska chce přez cyły měsac julij zaso wosoby na mjezy kontrolować. Tole je nutřkowny minister kraja Mariusz Blaszczak wčera rozhłosowemu sćelakej Polskie Radio připowědźił. Kontrole su dźěl wěstotnych naprawow w zwisku z wjerškowym zetkanjom NATO 8. a 9. julija we Waršawje kaž tež ze swětowym zjězdom katolskeje młodźiny w Krakowje, hdźež wočakuja tež bamža Franciskusa. Kontrole nimaja ničo z aktualnej krizu ćěkancow dla činić, kaž narodnokonserwatiwny politikar po­twjerdźi. Na zetkanje młodźiny wot 26. do 31. julija wočakuja dźesaćitysacy młodych wěriwych w starym kralowskim měsće nad Wisłu. „Smy zwólniwi, wěstotu bamža runje tak zaručić kaž wěstotu putnikow“, Blaszczak rjekny. Pólska słuša runje tak kaž Čěska wot lěta 2007 k Schengenskemu rumej z wotewrjenej mjezu a njewobmjezowanym pućowanjom ludźi. Po prawidłach Schengenskeho ruma smě kóždy kraj w zwisku z wulkozarjadowanjemi swoju mjezu měsac dołho kontrolować.

Premier Fico nahladnosć zhubił

Donnerstag, 03. März 2016 geschrieben von:

Peter Čačko z Bratislavy rozprawja za Serbske­ Nowiny:

Přichodnu sobotu je zaso jónu tak daloko – 5. měrca woli słowakska ludnosć přichodny parlament. Zo strona Smer-Socialna demokratija tež tónkróć z wotuma jako dobyćer wuńdźe, je po wšěch woprašowanjach tak derje kaž wěste. Hačrunjež njebudźe snano hižo tak wuspěšna kaž před štyrjomi lětami, jako wona telko hłosow nažnja, zo je z Robertom Ficom na čole sama knježić móhła. Woprašowanja mjenujcy tohorunja wujewjeja, zo je ministerski prezident mjez wolerjemi nahladnosć zhubił. Přinošowali su k tomu předewšěm někotre korupciske afery toho razu, zo su so „sympatizanća“ z pomocu zjawnych skazankow z milionami eurow wobohaćili.

„Wón je pomhał swět změnić“

Freitag, 26. Februar 2016 geschrieben von:

Stasiakty Lecha Wałęsy zbudźeja w Pólskej wšelake reakcije

Waršawa. Pólska debatuje tele dny naležnje wo politikarju, kiž je kaž nichtó druhi symbol spjećowanja pólskich dźěławych přećiwo komunistiskemu režimej. W zawostajenstwje zemrěteho něhdyšeho nutřkowneho ministra, generala Czesława Kiszczaka běchu so dokumenty namakali, po kotrychž je Lech Wałęsa w 70tych lětach za pólsku stasi – Służbu Bezpie- czeństwa (SB) – dźěłał. Dokumentowane su tež wjacore protokole zetkanjow Wałęsy z oficěrami SB. W tychle dokumentach wón dźěłowe wobstejnosće na łódźnicy w Gdańsku, hdźež swój čas jako elektrikar dźěłaše, wótrje kritizuje.

Konserwatiwne nowiny, kotrež podpěruja nowe narodnokonserwatiwne knježerstwo strony Prawo a sprawnosć (PiS), dosć raznje reaguja. Z wěstym spokojenjom niča wone wobraz 72lětneho Wałęsy, něhdyšeho statneho prezidenta a lawreta Měroweho Nobeloweho myta.

Wałęsa wobara so wumjetowanjam

Mittwoch, 24. Februar 2016 geschrieben von:
Waršawa (dpa/SN). Něhdyši pólski dźěłaćerski nawoda Lech Wałęsa nadźija so w zwisku z pozdatnymi aktami pólskeje stasi wo sebi na mjezynarodnu pomoc. „Dam to dale k mjezynarodnemu wujasnjenju“, rjekny wón wčera powěsćowemu sćelakej TVN24. „Njedowolu, zo ćěło Kiszczaka dobudźe.“ Fachowcy běchu w zawostajenstwje zemrěteho něhdyšeho nutřkowneho ministra Czesława Kiszczaka aktu něhdyšeje tajneje słužby našli, w kotrejž Lecha Wałęsu jako sobudźěłaćerja wjedu. Mjeztym su přiwisnicy Wałęsy připowědźili, zo chcedźa njedźelu před jeho domom demonstrować a tak swoju solidaritu z nim zwuraznić.

„Oranžowa hela“ trapi ludźi

Mittwoch, 24. Februar 2016 geschrieben von:
Štož na němskej stronje najskerje nikoho dale njemyli – dotal w medijach znajmjeńša njeje žanych skóržbow, wo protestach scyła njerěčo –, zbudźa na čěskej stronje k pólskej hranicy dale a razniši pohóršk: njesměrne wobswětlenje nócneho wobzora. Přirodny zjaw wšak to njeje, kotryž so to wobydlerjam kónčin Jizerskich horin na woči skići. Pochadźa z hoberskeho škleńčnišća njedaloko Bogatynje. Tam wudźeržuje pólske pře­dewzaće Citronex zaškleńčene wono, wupřestrěwace so na dźesać hektarach a něhdźe 15 metrow wysoke. W nim plahu­je z pomocu wotpadkoweje ćopłoty z Turówskeje brunicoweje milinarnje tomaty, z kotrymiž zastaruje cyłu Pólsku, a dźěl samo eksportuje. Ludnosć wokoło Hrádeka nad Nisou a Frýdlanta nadawa njepřijomnemu swětlenju wudmo „oranžowa hela“. Čěskemu rozhłosej žona z předmjenom Alžběta rjekny: „Tele swětło w nocy je tragedija. Starši ludźo bjeru tablety, zo bychu spać móhli, a zaćěmnjeja wokna.“ Tak mjenowany „swětłowy smog“ mjerza tež astronomow regiona – kazy dźě jim, wobkedźbować hwězdy na njebju.

Nawodnicu zarjada zasudźili

Dienstag, 23. Februar 2016 geschrieben von:

Praha (dpa/SN). Wysokorjadna čěska zastojnica dyrbi wosom a poł lěta do jastwa, dokelž bě dowolnosće za dwě solarnej připrawje manipulowała. Krajne sudnistwo w Brnje je nawodnicu mócneho energijoweho regulowanskeho zarjada ERU Alenu Vitáskovu wčera korupcije dla zasudźiło, kaž powěsćernja ČTK rozprawja. Wobsedźerjej připrawow kaž tež dalša sobudźěłaćerka Vitáskoveje dyrbja tohorunja wjacore lěta do jastwa. Sudnistwo wukaza nimo toho pjenježne chłostanja we wobjimje wjacorych milionow krónow. Regulowanski zarjad dohladuje energijowy sektor a płaćizny za přetrjebarjow w Čěskej.

Po słowach sudnikow bě zarjad ERU za solarnej projektaj hišće stare, jara wysoke spěchowanske subwencije přizwolił, byrnjež mjeztym nowe, snadniše spěchowanje płaćiło. Knježerstwo bě subwencije za solarnu milinu kónc lěta 2011 wo wjace hač połojcu znižiło. Alena Vitásková prěje, zo bě dowolnosć manipulowała. Nastata škoda wučinja pječa hač do 75 milionow eurow, ČTK informuje.

Zmylk přiznał

Freitag, 19. Februar 2016 geschrieben von:
Waršawa (PŽ/K). Wšelcy ludźo su přeco twjerdźili, Lech Wałęsa, załožićel Solidarnośće, je z pólskej stasi hromadźe dźěłał, Wałęsa je to zasakle prěł, tež tak mjenowane lustraciske sudnistwo jeho z tukaneho podhlada „wučisći“. Nětko předleža dopokazy, zo je Wałęsa tola skradźu informant był. Našli běchu tajke w zawostajenstwje poslednjeho nutřkowneho ministra PLR Czesława Kiszczaka. Po toho smjerći w nowembru poskići jeho wudowa doma chowane dokumenty na pře- dań Institutej narodneho pomjatka (IPN), wuswětlowacemu złóstnistwa nacizma a komunizma. IPN wšak transakciju wotpokaza a z prawomocu statneho rěčnistwa zatajene spisy sćaza. Jeho sobudźěłaćerjo su mjez nimi našli dwě relewantnej akće spisow. Jedna je podpisana z „Wałęsa“, tamna signowana z „Bolek“, štož bě krywne mjeno Wałesy. Direktor instituta Łukasz Kamiński rjekny, jedyn z ekspertow je spisy jako awtentiske posudźił. Mjeztym je Wałęsa „zmylk“ přiznał. „Njejsym z wěstotnym aparatom hromdźe dźěłał, njejsym pjenjezy přizwał, sym pak zmylki činił“, piše wón dźensa w swojim mikroblogu.

Čěska warnuje

Donnerstag, 18. Februar 2016 geschrieben von:
Praha (dpa/SN). Čěski ministerski prezident Bohuslav Sobotka je před domino-efektom warnował, za pad, zo Wulka Britaniska Europsku uniju wopušći. „Reakcija by zawěsće była, zo šěri so po cyłej Europje žołma nacionalizma a separa­tizma“, rjekny Sobotka powěsćerni ČTK w Praze. Přikład su jemu prócowanja Šotow a Katalanow wo njewotwisnosć .

Běłoruska wodychnje

Donnerstag, 18. Februar 2016 geschrieben von:
Minsk (ČŽ/K). Wot měrca zběhnje EU wjetšinu sankcijow přećiwo Běłoruskej. 170 wosobam inkluziwnje prezidentej Aleksandrej Lukašenkej spadnje potom zakaz přistupa do EU, třom předewzaćam budźe „zamróžene“ swójstwo zaso přistupne. Jeničce embargo brónjow ma dale płaćić, rozsudźichu wonkowni ministrojo 28 krajow. Čěski wonkowny minister Lubomír Zaorálek komentuje naprawu EU takle: „Je to wuslědk poslednjeho wuwića w Běłoruskej.“ Jako přikład naspomni wón pušćenje rjada politiskich jatych. Po jeho słowach „je Běłoruska tež zwólniwa, přewjesć kročele za to, lětuše parlamentne wólby sčinić transparentniše“. Nic naposledk ma Zaorálek za to, zo wotewrjeja so nětko nowe móžnosće zhromadneho dźěła z Minskom na polu hospodarstwa. W dobrym stawje kraj njeje, dokelž je jeho hospodarstwo wusko zwjazane z ruskim, kotrež pak ma so same z njemałymi ćežemi bědźić. Słowakski wonkowny minister Miroslav Lajčák měni, zo je EU na te wašnje mytowała naprawy Běłoruskeje w zašłym času.

Wuměłska wuměna

Mittwoch, 17. Februar 2016 geschrieben von:

Wrócław (SN). Wuměłcy z europskeje kulturneje stolicy Wrócławja móža w słowakskich Košicach tworić, mjeztym zo změja jich kolegojo z wuzwolenych europskich městow přiležnosć za to w delnjošleskej stolicy. To předwidźi program agentury Wuměłske rezidency A-i-R Wro, kaž je na stronje www.wrócław.pl zhonić.

Za Košice su so organizatorojo rozsudźili, dokelž bě město lěta 2013 europska kulturna stolica. Tam mnohe tehdy zahajene ideje dale pěstuja. Jedna tajka je program „Košice Artist in Residence“ za wuměłcow ze wšelakich wobłukow a wjacorych, nic na kóždy pad europskich krajow. Wuměłcy, kotřiž dóstanu stipendij 1 400 eurow, móža w měrcu a aprylu w Košicach dźěłać. Jich twórby wustaja potom w jednej galeriji města.

Anzeige