Tež wojacy za ćahom pytaja

Dienstag, 29. September 2015 geschrieben von:

Wałbrzych (dpa/SN). W Pólskej so wojacy tele dny na to hotuja, při pytanju za tak mjenowanym „złotym ćahom“ z časa Druheje swětoweje wójny pomhać. Pioněrske jednotki přepytuja kónčinu, w kotrejž běchu wólnočasni slědźerjo za ćahom pytali, schowanym pječa w podzemskim tunlowym systemje. „Chcemy předewšěm wuzamknyć, zo su w zemi strašne maćizny schowane, kaž na přikład miny“, rjekny Tomasz Smolarz, nawoda delnjošleskeho regionalneho zarjadnistwa, wčera nowinarjam. Dźěła po- dłu železniskeje čary mjez Wrócławjom a Wałbrzychom traja prawdźepodobnje cyły tydźeń. Hdy ma so konkretne py­tanje za ćahom započeć, hišće njewědźa.

W awgusće běštaj mužej, Polak a Němc, zdźěliłoj, zo staj němski pancerowany ćah w tunlu namakałoj. Dopokazać tole dotal njemóžeštaj. Wot njeju předpołoženy radarowy wobraz, kotryž ma ćah pokazać, njeje po měnjenju fachowcow jasny dosć. Najebać to je w kónčinje hotowa hysterija wudyriła, dokelž tukaja na to, zo je w ćahu 300 tonow złota.

„Ty imigranto“ nowe wudmo

Freitag, 25. September 2015 geschrieben von:

Pólska zjawnosć debatuje wo syriskich ćěkancach

Waršawa. Pólska hotuje so z wotmachom na přichad syriskich ćěkancow, kotrychž wot spočatka přichodneho lěta wočakuja. Wot minjeneho wjerškoweho zetkanja Europskeje unije je jasne, zo přiwozmje kraj 7 082 město dotal planowanych 2 000 migrantow. Medije witaja připrajenje ministerskeje prezidentki Ewy Kopacz w Brüsselu přewažnje jako zmužity a čłowjeski krok, ćim bóle, dokelž je dźě Pólska minjene lěta wot spěchowanskich srědkow EU profitowała.

Klětuši budget wobzamknjeny

Donnerstag, 24. September 2015 geschrieben von:
Praha (ČŽ/K). Čěske knježerstwo je wobzamknyło naćisk budgeta za 2016. Předwidźane su wudawki 1,249 bilionow krónow (něhdźe 46 miliardow eurow) a dochody 1,179 bio. krónow (43 mrd. eurow). „Z naćiskom spjelnimy wažne zawjazki napřećo wobydlerjam, přilubjene z programowym wozjewjenjom“, rjekny premier Bohuslav Sobotka. Po jeho słowach zaměrja so budget na to, zwoprawdźić strategiske inwesticije, z kotrymiž ma so róst hospodarstwa tež přichodnje zawěsćić. Njezapomni so ani na podpěru kónčin z wulkej bjezdźěłnosću. „Prioritu matej wutwar wobchadneje infrastruktury a skutkowniše spěchowanje slědźenja. Trěbne srědki nałožimy tež za wjetšu wěstotu kraja“, praji Sobotka. Naćisk budgeta zakalkuluje zwyšenje mzdow wobornikam, wučerjam, policistam a zastojnikam. Předsyda opozicionelneje ODS Petr Fiala kritizuje wulki deficit 70 mrd. krónow (2,6 mrd. eurow) mjez wudawkami a dochodami. Prezident Miloš Zeman zdźěli, zo zakoń wo budgeće podpiše, jeli jón sejm schwali.

Znowa rozbuchnjenje

Mittwoch, 23. September 2015 geschrieben von:

Dobrovíce (dpa/SN). Při rozbuchnjenju w čěskim zawodźe za zhotowjenje bio­etanola je so 14 wosobow zraniło. Dwě z nich dyrbjachu z helikopterom do specialneje chorownje dowjezć, kaž rěčnik wohnjoweje wobory wčera zdźěli. Sčasami bě połsta wohnjowych wobornikow a sanitetarjow zasadźenych. K detonaciji w Dobrovícach, 50 kilometrow sewjerowuchodnje Prahi, je prawdźepodobnje při rjedźenju dóšło. Dokładne přičiny fachowcy hišće přepytuja.

Po detonaciji w municiskim zawodźe srjedźočěskeho města Vlašim je policija třoch mortwych našła. Tam bě póndźelu k njezbožu dóšło, jako jedyn z dźěłaćerjow wulce strašny wołojowy styfnat z produkciskeje hale do składa transportowaše. Trajaceho stracha dalšeho rozbuchnjenja dla su hašenske a wuchowanske dźěła přewšo wobćežne. Fachowcy za rozbuchlinu su mjeztym specialny roboter zasadźili. We Vlašimskim zawodźe produkuja municiju z małym kalibrom za ciwilnu potrjebu, kaž za hajnikow, ale tež za čěske wójsko.

Awtowy tunl wotewrjeny

Dienstag, 22. September 2015 geschrieben von:
Praha (ČŽ/K). Sobotu bě tak daloko: Po wospjetnym přestorčenju bu awtowy tunl Blanka na kromje Prahi wobchadej přepodaty. Po přetřihanju banćika, mjez druhim přez primatorku stolicy Adrianu Krnáčovu a kardinala Dominika Duku, poda so w přitomnosći stow zajimcow Škodowka jako prěnja na puć přez jaskrawje wobswětlenu a wulkomyslnje wuhotowanu rołu. Po­dobnje kaž pola noweho Berlinskeho wulkolětanišća BER je tež projekt tunla Blanka časowje runje tak kaž financielnje wšo kalkulowane daloko přetrjechił. Twarić započeli běchu jón lěta­ 2007, hotowy być je měł 2011, potom 2012, naposledk 2014. Prěnjotnje běchu z kóštami něhdźe 1,15 miliardow eurow ličili, płaćił je 5,9 kilometrow dołhi „kolos“, kaž jón nowina Mladá fronta dnes woznamjenja, na kóncu dobrych 1,5 mrd. Tunl Blanka je hromadźe z Brusnickim, Dejvickim a Bubenečskim tunlom wobstatk sewjerozapadneho wot­rězka Praskeho wobkruha. Ze swojimi šěsć kilometrami je wón před Madridskim najdlěši měšćanski tunl Europy.

Mać třoch dźěći do šule šła

Montag, 21. September 2015 geschrieben von:

NAJSTARŠA šulerka Čěskeje w nowym šulskim lěće je Simona Havlíčková. 32lětna je mać třoch dźěći. W Jindřichovym Hradecu zastupi wona do 7. lětnika 5. zakładneje šule. Hišće jónu do šule chodźić a nawjazać hač do kónčneho wuswědčenja tam, hdźež bě něhdy wučbu ze „swójbnych přičin“ přetorhnyła, je ju zmotiwował wotpohlad, zabsolwować hotelowu šulu, zo móhła so z powołanskej kucharku stać. Wučerjo spomnjeneho kubłanišća rozsud młodeje žony podpěruja, zdobom přiznawajo, zo něšto podobneho dotal njejsu hišće dožiwili. „Šulerka“ sama so zmužiće, přiwšěm z tróšku strachom „gratu přima“, wěsta sej pomocy swójby a dobrych znatych. „Wšitke klasifikowane předmjety na mnje čakaja inkluziwnje tworićelske a hudźbne kubłanje“, Simona Havlíčková čěskim medijam přeradźi. Studij je eksterny. „Direktor postaji wučerjow, kotřiž su jej poboku. Wot nich dóstawa jednotliwe nadawki, kotrež ma doma spjelnić. Do šule přińdźe na pruwowanske konsultacije. Wuslědki wuhódnoći naposledk wosebita komisija“, zrysuje naměstnica­ direktora Alena Mazancová praksu wučby najstaršeje šulerki kraja.

„Nětko žnějemy njelube płody“

Freitag, 18. September 2015 geschrieben von:

Pólska debatuje wo ćěkancach – towaršnosć w tym prašenju pačena

Waršawa. Pólska towaršnosć je w prašenju ćěkancow pačena. Tole pokaza so minjeny kónc tydźenja we Waršawje. Ně- hdźe 7 000 ludźi demonstrowaše přećiwo přiwzaću dalšich ćěkancow. Běchu to předewšěm čłonojo prawicarskich stron a skupin, tak mjenowanych „narodnych mocow“. Cyle wotewrjenje woni swoje hesła wołachu. Tak rěčachu mjez druhim wo „ciwilizaciskej wójnje“. W samsnym času demonstrowachu tež přiwisnicy ćěkancow. Njemóžachu pak wjace hač 2 000 wobdźělnikow mobilizować.

Nade wšo horca debata knježeše tele dny tež w pólskim sejmje. Ministerska prezidentka Ewa Kopacz zasadźowaše so za to, wjace hač tuchwilu planowanych 2 000 požadarjow azyla přiwzać. Hladajo na wólby parlamenta kónc oktobra pak tež­ wahaše. Ryzy hospodarskich ćě­kancow chcyła wona raznje wotpokazać.

Nahlady rozdźělne

Donnerstag, 17. September 2015 geschrieben von:
Praha (ČŽ/K). Čěska njeje jeno z principa přećiwo zawjazowacej kwoće ćěkancow abo dokelž so wjetšina ludnosće tomu spřećiwja, ale tež z teje přičiny, zo dyrbi z tójšto dalšimi migrantami z Ukrainy ličić. Tole zwurazni wonkowny minister Lubomír Zaorálek w telewiziji. Wón skedźbni na to, zo je połojca z 990 ludźi, kotřiž běchu lětsa z Ukrainy do kraja přišli, wo azyl požadała. Nimo nich je něšto Kubačanow resp. Syričanow tež tak jednało. Minister za čłowjeske prawa Jiří Dienstbier porno tomu měni, zo móhła Česka hač do 15 000 ćěkancow přiwzać. Njecyłych 4 000 migrantow zaměstnić, kaž to kwota Europskeje unije za Čěsku předwidźi, po jeho měnjenju scyła žadyn problem njeje. Zdobom bychu čěske firmy kmane byli, hač do 5 000 migrantam ze Syriskeje dźěło dać, kaž je Zwjazk čěskich předewzaćelow wozjewił. Čěski minister za zakitowanje Martin Stropnický wusprawnja „płótnu“ naprawu Madźarskeje, byrnjež idealna njebyła. Wón namjetuje, zo měli kraje Visegrádskeje štyrki wutwarić zhromadne lěhwo ćěkancow.

Syły migrantow Europu docpěli

Mittwoch, 16. September 2015 geschrieben von:

Waršawa (dpa/SN). Europska agentura za škit mjezow Frontex je w prěnich wosom měsacach lěta wjace hač 500 000 migrantow zličiła, kotřiž su do Europskeje unije přišli. Tole zdźěli Frontex wčera we Waršawje. Woprawdźita ličba wšak je prawdźepodobnje wo wjele wjetša. Jeničce w Němskej je po informacijach Zwjazkoweho zarjada za migraciju a ćěkancow wot januara hač do awgusta 256 938 ludźi próstwu wo azyl stajiło. Po trochowanju wicekanclera Sigmara Gabriela (SPD) móhła zwjazkowa republika lětsa hač do milion­ ćěkancow přiwzać.

Kaž agentura Frontex pisa, su jeničce w awgusće na wonkownych mjezach Europskeje­ unije 156 000 migrantow registrowali. To je pjaty měsačny rekord za sobu­. Cyłe lěto 2014 bě jich 280 000.

Najwjetši ćišć dožiwjeja grjekske kupy, na kotrež je so w awgusće 88 000 ludźi dóstało, jědnaće króć telko kaž samsny čas loni. Kupy steja pod „intensiwnym migraciskim ćišćom“, kaž zamołwići zdźěleja. Frontex poskića Grjekskej pomoc při registrowanju ćěkancow.

Amazon dźěła tež w Čěskej

Dienstag, 15. September 2015 geschrieben von:
Dobrovíz (dpa/SN). W Čěskej republice je nětko hoberski rozdźělowanski centrum internetneho wikowarja Amazon dźěłać započał. W dohodownym času móža tam wšědnje miliony nadawkow wobdźěłać, rjekny regionalny direktor Amazon Erwin Brunner čěskej powěsćerni ČTK. Hala w Dobrovízu njedaloko Prahi ma płoninu 95 000 kwadratnych metrow, štož nimale 14 koparskim hrajnišćam wotpowěduje. Něhdźe 1 500 kruće přistajenych tam skazanki přijimuje a posyłki zestaja. Hač do lěta 2018 ma ličba sobudźěłaćerjow na 2 000 rozrosć. We wosebje napjatych časach chcedźa 3 000 sezonowych mocow přidatnje zasadźić. Tući přińdu zdźěla z busami z daloko zdalenych, strukturnje słabych kónčin sewjerozapadneje Čěskeje. Předewzaće Amazon je po swójskich informacijach 75 milionow eurow do noweho rozdźělowanskeho centruma inwestowało. Z nim chcedźa kupcow po wšej Europje posłužować. Dotal nimaja tam hišće žane čěskorěčne internetne poskitki, přiwšěm pak hižo 50 000 čěskich kupcow, Amazon zdźěla.

Anzeige