Awtor dźensa
Jurij Nuk
Wšitkim serbskim sportowcam a čitarjam přeju žohnowane, strowe a wuspěšne lěto 2017. Pjeć lětdźesatkow mjeztym, a to bjez přetorhnjenja, startuja wot lěta 1967 w Budyšinje sportowi entuziasća k silwesterskemu běhej, prajo tak staremu lětu božemje! Nan ideje běha běše tehdy Manfred Lohse, sportowy wučer a trenar młodych lochkoatletow Zawodoweho sportoweho zjednoćenstwa Motora Budyšin. Na prěnim tajkim wobdźěli so lědma dźesatk zajimcow. Bě wšak tež mysleny jako interny. Jara spěšnje pak so tónle wobłuk w slědowacych lětach přełama. Razantnje stupaše zajim za tele kónclětne wubědźowanje w Budyskim a susodnych wokrjesach. Tak wobdźěli so na 10. jubilejnym silwesterskim běhu 1976 hižo 150 atletow. Tajkeho rozrosta dla bě trjeba, zo Budyski wokrjesny fachowy wuběrk za lochkoatletiku wurisanje přewozmje. Předsyda wuběrka běše absolwent Serbskeho wučerskeho wustawa Wolfgang Schumacher.
Wokrjesna wyša koparska liga
staw: 15. hrajny dźeń
1. ST Ćisk 40 dypkow
2. Rakečanske ST 31 dypkow
3. SC Großröhrsdorf 25 dypkow
4. Póst Germ. Budyšin 25 dypkow
5. Sokoł Ralbicy/Hórki 24 dypkow
6. Módro-běli Kulow 22 dypkow
7. ST Kinspork/Łužnica 21 dypkow
8. ST Hnašecy-Dobruša 20 dypkow
9. Motor Kumwałd 20 dypkow
10. LSV Hory 18 dypkow
11. Wojerowski FC 16 dypkow
12. Drohotka Ramnow 16 dypkow
13. FV Ottendorf-Okrilla 16 dypkow
14. Zeleno-běli Bukecy 14 dypkow
15. TSV Połčnica 11 dypkow
16. ST Wjelećin 9 dypkow
wrota cyłkownje: 474
přerěznje 3,95 wrotow na hru
najlěpši třělc: Franz Rösner, LSV Hory, 22 wrotow
přihladowarjo: přerěznje 74 na hru
hódnoćenje fairnesy:
1. LSV Hory 19 dypkow
16. Motor Kumwałd 39 dypkow
žołta karta: 384
najwjac: Póst Germania Budyšin 34
najmjenje: ST Wjelećin 13
žołto-čerwjena karta: 12
čerwjena karta: 6
wosebitosće:
Jónu dyrbješe trenar nutřkowny rum wopušćić.
Jónu bu sudnik skřiwdźeny žołto-čerwjeneje karty dla.
Jónu nochcyše narunanski kopar sobu hrać.
Jónu su domjacy přiwisnicy hru přetorhny. Kilian Hrjehor
Turněr wo pokal TCM
Towarstwo Cyrila a Metoda zarjaduje sobotu, 7. januara, w 14 hodź. w Chróšćanskej „Jednoće“ halowy koparski turněr wo pokal TCM. Přeprošene su wosadne a wjesne mustwa młodźiny kaž tež sportowych jednotkow. Kóžde měło z wosom hrajerjemi nastupić. Přizjewić maja so hač do pjatka, 30. decembra, pola Guida Zahrodnika pod telefonowym čisłom 0151/52 221759.
Na nowolětne płuwanje
Njedźelu, 8. januara, přewjedźe młodźina w Hózku nowolětne płuwanje pod hesłom Early blackbird, a to w Čornym Halštrowje. Za startowy pjenjez dweju eurow dóstanje płuwar/ka ćopły napoj. W 13 hodź. so wobdźělnicy zetkaja, płuwanje započnje so w 14 hodź. při wulkim spušćadle pola Hózka.
Kurs za koparskich sudnikow
Koparski zwjazk Hornja Łužica přewjedźe spočatk lěta kurs za sudnikow-započatkarjow. Tež zajimcy Zapadołužiskeho koparskeho zwjazka (WFV) móža so wobdźělić a pruwowanje złožić. Přizjewjenja su móžne pod . Wukubłanje započnje so 20. januara w 17 hodź. w hosćencu „Am Markt“ we Waldhufenje pola Dźěžow (Diehsa). Přizjewjenski formular namakaće na internetnej stronje WFV.
Běły Chołmc (SN/MWj). Mjeztym hižo wosmy raz je Wojerowske płuwanske sportowe towarstwo wčera kónclětne płuwanje přewjedło, tónraz w Třižonjanskim jězoru. K tomu njeběchu jeno čłonojo towarstwa přišli, ale tež dalši sportowcy z cyłeje Sakskeje. Dohromady 30 atletow so zwaži do pjeć stopnjow zymneje wody skočić a wokoło małeho přistawnišća płuwać. Zaso wróćo na pobrjohu nječakachu na nich jeno ćopła drasta, ale tež horce napoje a za kóždeho wobdźělnika wosebite wopismo.
W minjenych sydom lětach běchu chrobli płuwarjo hižo něštožkuli dožiwili. Tak dyrbjachu na Hórnikečanskim jězoru raz dźěru do tołsteje woršty loda wudypać. Tehdy bě to dźesać zmužitych, kotřiž do lódzymneje wody skočichu. Třižonjanski jězor pola Běłeho Chołmca drje wčera zamjerznjeny njebě, přiwšěm dyrbjachu so wobdźělnicy přewinyć, při temperaturje wokoło štyrjoch stopnjow do wody hić. Kaž pak wobkrućichu, njebě to za nich dale zlě, tež nic při mjezsobnym napryskanju.
20. króć wčera tomu bě, zo přeprosy blidotenisowe towarstwo Konjecy njeaktiwnych hrajerjow po hodownych swjatych dnjach na žurlu towarstwoweho domu. Wjace hač dwaceći wólnočasnych blidotenistow z wokolnych wsow je składnosć rady wužiwało.
Předsyda Konječanskeho sportoweho towarstwa Křesćan Gruhn hódnoćeše přiběracy zajim na tymle zarjadowanju a wuzběhny: „Wot wšeho spočatka njebě wotpohlad so wubědźować wo myta abo pokal, ale prosće budźić zajim na rjanym sporće za zelenym blidom.“ Najstarši mjez wobdźělnikami bě 65lětny Konječan Jan Hajnk, kiž runje tak na swoje zamóžnosće skedźbni kaž Marija Šołćina, wčera jenička žona. „Nimale stajnje běch dotal pódla a sym wjesoła, zo zamołwići tutu tradiciju swěru haja.“ Hižo wjacore lěta sej Blidotenisowi přećeljo Satkula z Koćiny do susodnych Konjec dojědu, a lětsa přidruži so jim tež Kulowski farar Gabriš Nawka. „Sym hižo stajnje rady blidotenis hrał. Tole je mi witana składnosć, swoje zamóžnosće pokazać a so zaso raz porjadnje napinać“, wón měnješe.