Hodowny čas a zymski sport słušatej hromadźe. A hdyž njeje móžno tuchwilneho skerje ćopłeho wjedra dla zymskemu sportej pod hołym njebjom hołdować, pytaja sej na přikład wólnočasni lodohokejisća druhe městnosće, kaž tule w Běłowodźanskej zymskej arenje. Tam zetkachu so mjez swjatymi dnjemi Panošic swójbni ze Slepoho, Noweho Města nad Sprjewju a Běłeje Wody ke kóždolětnemu duelej. Wuslědk njebě wažny, přiwšěm je wrotar Jürgen Ziesch jako jedyn z najstaršich hrajerjow lodohokeja swoju klětku lětsa čistu dźeržał. Foto: Joachim Rjela

Turněr wo pokal TCM

Towarstwo Cyrila a Metoda zarjaduje sobotu, 7. januara, w 14 hodź. w Chróšćanskej „Jednoće“ halowy koparski turněr wo pokal TCM. Přeprošene su wo­sadne a wjesne mustwa młodźiny kaž tež sportowych jednotkow. Kóžde měło z wosom hrajerjemi nastupić. Přizjewić maja so hač do pjatka, 30. decembra, pola Guida Zahrodnika pod telefonowym čisłom 0151/52 221759.

Na nowolětne płuwanje

Njedźelu, 8. januara, přewjedźe młodźina w Hózku nowolětne płuwanje pod hesłom Early blackbird, a to w Čornym Halštrowje. Za startowy pjenjez dweju eurow dóstanje płuwar/ka ćopły napoj. W 13 hodź. so wobdźělnicy zetkaja, płuwanje započnje so w 14 hodź. při wulkim spušćadle pola Hózka.

Kurs za koparskich sudnikow

Koparski zwjazk Hornja Łužica přewjedźe spočatk lěta kurs za sudnikow-započatkarjow. Tež zajimcy Zapadołužiskeho koparskeho zwjazka (WFV) móža so wobdźělić a pruwowanje złožić. Přizjewje­nja su móžne pod . Wukubłanje započnje so 20. januara w 17 hodź. w hosćencu „Am Markt“ we Waldhufenje pola Dźěžow (Diehsa). Přizjewjenski formular namakaće na internetnej stronje WFV.

Běły Chołmc (SN/MWj). Mjeztym hižo wosmy raz je Wojerowske płuwanske sportowe towarstwo wčera kónclětne płuwanje přewjedło, tónraz w Třižonjanskim jězoru. K tomu njeběchu jeno čłonojo towarstwa přišli, ale tež dalši sportowcy z cyłeje Sakskeje. Dohromady 30 atletow so zwaži do pjeć stopnjow zymneje wody skočić a wokoło małeho přistawnišća płuwać. Zaso wróćo na pobrjohu nječakachu na nich jeno ćopła drasta, ale tež horce napoje a za kóždeho wobdźělnika wosebite wopismo.

W minjenych sydom lětach běchu chrobli płuwarjo hižo něštožkuli dožiwili. Tak dyrbjachu na Hórnikečanskim jězoru raz dźěru do tołsteje woršty loda wudypać. Tehdy bě to dźesać zmužitych, kotřiž do lódzymneje wody skočichu. Třižonjanski jězor pola Běłeho Chołmca drje wčera zamjerznjeny njebě, přiwšěm dyrbjachu so wobdźělnicy přewinyć, při temperaturje wokoło štyrjoch stopnjow do wody hić. Kaž pak wobkrućichu, njebě to za nich dale zlě, tež nic při mjez­sobnym napryskanju.

Za 35. sokołski volleyballowy turněr wo pokal Domowiny klětu 1. apryla je so hač do wčerawšeho dźesać cyłkow přizjewiło: Mustwo 1296, Serbski dom Budyšin, Skupina Brodatych, ST 1922 Radwor, Serbski gymnazij-wučerjo, Rapaki, Dom biskopa Bena, Drježdźanscy studenća, SJ 1981 Chrósćicy a Serbski gymnazij Budyšin-12. lětnik. Hač do 31. decembra je hišće móžno so za turněr, kotryž budźe w hali na Budyskim Třělnišću, přizjewić. Trěbne informacije steja na internetnej stronje Serbskeho Sokoła pod www.sokol.sorben.com. Zamołwići Sokoła liča na kóždy pad hišće ze sćěhowacymi mustwami: Sokoł Budyšin, Róžant, ST Marijina hwězda, Škit Budyšin, Dźiwje micki, 11. lětnik Serbskeho gymnazija Budyšin, Šulerske mustwo Delnjoserbskeho gymnazija Choćebuz. Tež nowačcy su witani. Serijowy dobyćer minjenych lět, mustwo z pólskeje Tokarnje, so hižo njewobdźěli. Jurij Bjeńš