To a tamne (23.04.24)
Do wuhenja padnył je šup minjeny kónc tydźenja w Berlinje – a bu w druhim pospyće wot wohnjoweje wobory wuchowany. Wobornicy běchu spočatnje z rěblom podarmo spytali, šupa wućahnyć. Skótna lěkarka móžeše pomhać: Wona zwěrjo pohłuši. Na to móžachu małeho šupa wuchować. „Wšitcy běchu zbožowni“, wohnjowa wobora piše.
Njelubozne zetkanje z dingami w Awstralskej měł je spěwar Johannes Oerding (42). Hnydom pjeć dźiwich psow jeho wobkružichu, měrjo so na całty spěwarja. „To je ći naraz cyle hinak“, hudźbnik nowinarjam rjekny. Oerding njeměješe ničo při sebi, zo móhł so zakitować. Na zbožo njeje so ničo stało. Na potrjechenych městnach, na přikład na kupje Fraser Island, zamołwići doraznje před zwěrjatami warnuja. Te njeměrja so jenož na jědź turistow, ale wohrožuja tež dźěći.
To a tamne (22.04.24)
Cyłkownje 2 094 přeńdźenjow nastupajo předpisanu spěšnosć je policija w Braniborskej we wobłuku marathona błyskačow minjeny pjatk zwěsćiła. Na akciji bě so 286 zastojnikow wobdźěliło, kotřiž na 131 městnach w zwjazkowym kraju spěšnosć šoferow kontrolowachu. Loni bě tam při 74 000 wobchadnych zražkach 11 000 ludźi znjezbožiło, 108 smjertnje.
Metalowe platy na železniske kolije połožili su njeznaći njedaloko dwórnišća w Rotenburgu na sewjerowuchodźe Delnjeje Sakskeje a su tak ćah wobškodźili. Na lokomotiwje a na kolijach nasta škoda wjacorych dźesaćitysacy eurow. 24lětny lokomotiwnik bě ze swojim ćahom regionalneho předewzaća Metronom krótko po wopušćenju dwórnišća přez 23 kilogramow ćežke dźěle zjěł. Nichtó ze 600 pasažěrow w ćahu so njezrani. Policija pyta za swědkami.
To a tamne (19.04.24)
Spodźiwne zwuki w hawbje nad kuchinskimi kachlemi su swójbu w poruhrskim Hünxe pohnuli, z nuzowym čisłom 110 wohnjowu woboru wołać. Wobydlerjo na to tukachu, zo je so zwěrjo do hawby zabłudźiło. Dobrowólni wohnjowi wobornicy na to dwě wjewjerčce wuswobodźichu. Zwěrjeći běštej so přez klapu wonkowneje murje do kuchnje předrěłoj. Jednu wjewjerčku přepodachu skótnemu lěkarjej, tamna so hnydom zminy.
Z nowej družinu lodu su Italčenjo składnostnje tuchwilneho předsydstwa skupiny G7 swojemu dobremu mjenu jako najkreatiwniši narod słódkeho lodu wotpowědowali: Składnostnje zetkanja wonkownych ministrow skupiny najwjetšich industrijnych krajow swěta na kupje Capri w Neapelskim zaliwje su nowu družinu „Gelato G7“ předstajili: Wšelake słody w barbach wšěch krajow.
To a tamne (18.04.24)
Njewšědny přirodny biologiski spektakl wočakuja prawje bórze w USA: Inwaziju miliardow cikadow. Larwy překasancow wotpočuja hišće w zemi a so wudrapaja, je-li so zemja na 18 stopnjow woćopliła. Lětsa budźe wosebje zlě, dokelž su hnydom dwě hoberskej populaciji na rjedźe. Cikady su njestrašne, šěrja pak njesměrnu haru. Čehodla so cikady hakle po wjele lětach jewja, hišće njewědźa.
Mortweho muža do banki přiwjezła je žona w Brazilskej, zo by kredit dóstała. Muž sedźeše w kolesatym stole, medije rozprawjeja. Na wideju je widźeć, kak žona z mužom rěči a spyta, jeho k podpisanju zrěčenja pohnuć. Sobudźěłaćerjam banki wona rozłoži, zo so mužej strowotnisce derje njeńdźe. Tući wołachu na to lěkarja, kotryž smjerć muža zwěsći. Policija žonu zaja. Ta twjerdźi, zo bě muž hišće žiwy, jako z nim do banki přińdźe.
To a tamne (17.04.24)
Blešu wina za šmóratko! Z tutej akciju chce hosćencar w sewjernej italskej Veronje swojich hosći pohnuć, so znajmjeńša wěsty čas mobilneho telefona wzdać. „Njeje žaneje přičiny, stajnje po pjeć sekundach na telefon wudźěrać. Někotrym je to mjeztym kaž droga. Njech sej w tym času radšo dobru kapku wina popřeja.“ Za blešu wina dyrbja hosćo handy při zachodźe do kamora zamknyć dać. Pječa 90 procentow hosći poskitk wužiwa.
Wjace hac 1 100 přizjewjenjow za dohladowarja swětłownje dóšło je na kupje Wangerooge w Sewjernym morju. Zamołwići běchu městno w februaru wupisali. Swětłownju wužiwaja jako wuhladnu wěžu za turistow. Zamołwity ma zastupne lisćiki a suweněry předawać a so wo porjad starać. Najwjetši problem gmejnskeho zarjada nětko je, ze wšěmi požadarjemi personalne rozmołwy wjesć.
To a tamne (16.04.24)
Njewšědneho hrajerja – z kožuchom a štyrjomi nohami – pytaja w dźiwadle w badensko-württembergskim Ulmje. Za operu „Lessons in Love and Violence“ ma pos na jewišću stać, dwójce 15 mjeńšin w kóždym předstajenju. Činić ničo njetrjeba. Jeho nadawk je, měrnje pódla spěwarki stać. Dźesać předstajenjow w juniju a juliju tuchwilu planuja. Při prěnim castingu su třo wobsedźerjo swojeho psa předstajili, intendantej, sopranistce a zastupjerjej weterinarneho zarjada, kiž ma wustupej psa přizwolić. Kriterije zarjada su krute: Psyk ma dorosćeny, strowy a sebjewědomy być. Dźiwadłowy stres za jewišćom njeměł jeho mylić.
To a tamne (15.04.24)
Wopita šoferka bjez jězbneje dowolnosće je so při wobchadnym njezbožu w vogtlandskim wokrjesu ćežko zraniła. 41lětna bě w Reichenbachu z 1,7 promilemi alkohola w kreji po puću. W křiwicy zhubi wona kontrolu a prasny do laterny a wobchadnych taflow. Skónčnje wosta wona mjez štomami tčacy. Zastojnicy zwěsćichu, zo šoferka hižo dlěši časa žanu jězbnu dowolnosć wjace nima.
Z wosebje wjele błyskačemi chce policija šoferow tutón tydźeń na problem smalenja skedźbnić. Tak mjenowany Speedweek přewjedu tež w druhich europskich krajach. W Němskeje wobdźěli pak so jenož pjeć zwjazkowych krajow na marathonje błyskačow. Sakska je wotprajiła a Braniborska chce so jenož na wjeršku akcije, přichodny pjatk, wobdźělić. Kritikarjo pokazuja na nadměrnje wulku prócu a na poměrnje snadny wužitk akcije.
To a tamne (12.04.24)
Najstarše zwěrjo Berlinskeje coologiskeje zahrody ma narodniny. Gorilowa dama Fatou swjeći jutře swoje 67ćiny. Hižo dźensa chcychu ju z „wulkej zelenej“ překwapjenku zwjeselić, nawodnistwo zwěrjenca zdźěla. Hladajo na starobu wobydlerjo na to dźiwaja, zo njedóstanje Fatou přewjele słódkich płodow. Prawdźepodobnje je Fatou najstarši gorila na swěće. Hoberske zwěrjata docpěwaja w přirodźe starobu 35 lět, w zwěrjencach 50 lět.
18 kilogramow złota namakali su policisća při kontroli awta na awtodróze w Bayerskej. Sobujěduceju nachwilnje zajachu, wumjetujo jimaj „płokanje pjenjez“. Złoto bě do dulow late, njeměješe pak hamtsku ličbu podźěla złota zadypanu. Po aktualnych kursach złota na wikach bě złoto znajmjeńša 400 000 eurow wunjesło. Ciwilnym zastojnikam bě awto napadnyło, na čož je přeslědźichu.
To a tamne (11.04.24)
Wulke rozhorjenje zbudźa reklamowy widejo za běrnjacy chip tuchwilu w Italskej. W filmje podawa duchowny rjadniskej sotře město woblatka tajki chip. 30 sekundow trajacy spot skónči so z wuprajenjom „Wšědnje něšto bójskeho“. K tomu zaklinči typiske knaknjenje při rozkusnjenju chipa w hubje. Kontrolny organ wabjenskeje industrije poruči, wabjenski film cofnyć, dokelž wón nabožne začuća milionow Italčanow rani.
60 dnjow kruće we łožu ležeć ma skupina dobrowólnych w nadawku Němskeho centruma za lětarstwo a swětnišćo w Kölnje. Po tutym puću chcedźa wuslědźić, kak čłowjeske ćěło na dołho trajacu bjezćežitosć w swětnišću reaguje a što móhli přećiwo negatiwnym sćěham činić. Astronawća skorža, zo bědźa so we swětnišću z hłowywjerćenjom a špatnej koordinaciju w rumnosćach.
To a tamne (10.04.24)
Swětowe mišterstwo slědźacych psow su wčera w mecklenburgsko-předpomorskim Linstowje zahajili. Cyłkownje 48 psow z 22 krajow so na wubědźowanju wobdźěli. Spřihotowali su wjacore stopy na wulkich zahonach, kotrež maja psy slědować. Při tym njesmědźa so wot wopačnych slědow zamylić dać. Wjacore ratarske zawody su swoje pola z něhdźe tysac hektarami za to přewostajili.
Na wšě 570 litrow diesela pokradnyli su njeznaći na twarnišću w vogtlandskim Auerbachu. Paduši běchu prawdźepodobnje w nocy na wutoru wěko bagroweho tanka wotłamali a diesel wotklumpali. Kradnjene ćěriwo płaći tysac eurow. Policija pyta za swědkami.
