To a tamne (28.09.22)

Mittwoch, 28. September 2022 geschrieben von:

Za swoju rólu jako kriminalistka w nowym rjedźe kriminalnych filmow „Lauchhammer“ je dźiwadźelnica Odine Johne samo jězbnu dowolnosć wuspěšnje złožiła. Tole je 35lětna nowinarjam přeradźiła. Cyłkownje šěsć pokročowanjow su produkowali, w kotrychž tež ničenje łužiskeje krajiny přez brunicowe ­jamy nazornje dokumentuja. Prěni dźěl serije „Łuchow – smjerć we Łužicy“ wusyłaja dźensa wječor w 20.15 hodź. w ARD.

Pućowaca policistka Sandra Köhler je wjace hač 10 000 eurow za wopory katastrofalneho zapławjenja w dole rěki Ahr nazběrała. 48lětna kriminalna hłowna komisarka je předwčerawšim, póndźelu, po 24 dnjach, 19 etapach a 415 kilometrach do Kassela doběžała. Policistka bě so 3. septembra na puć podała a je na swojim puću we wšitkich policajskich prezidijach Hessenskeje pozastała.

To a tamne (27.09.22)

Dienstag, 27. September 2022 geschrieben von:

Jako policist je so wudawał 16lětny w Kasselu a je w parku młodostnych narěčał. Tući běchu staroby młodeho zastojnika dla hnydom zadźiwani a informowachu policiju, kotraž wopačneho kolegu na to zaja. 16lětny měješe powětrowu pistoli, retl a ručne puta při sebi. Čehodla bě so młodostny w parku jako policist wudawał, njeje dotal znate.

Swětowe mišterstwa w skakanju ka­muškow nad wodu su předwčerawšim, njedźelu, na brjoze Baltiskeho morja w schleswigsko-holsteinskim Schönhagenje pola Kappelna přewjedli. Cyłkownje 35 muži, žonow a dźěći so na wubědźowanju wobdźěli, něhdźe 150 ludźi jim přihladowaše. Za titul „Swětowy mišter tysac skokow“ dosahaše, kamjeń jědnaće króć skakać dać. Pola žonow a dźěći zmištrowachu dobyćerjo lětsa wosom skokow pod dohladom sudnikow.

To a tamne (26.09.22)

Montag, 26. September 2022 geschrieben von:

Wotběžana jězbna dowolnosć, pobrachowace warnowanske tafle a lědma zwěstosćene sudobja na awće, takle chcyše šofer nakładneho awta w bayerskim Rosenheimje policajsku stražu z tepjenskim wolijom zastarać. Zastojnikam napadnychu spočatnje pobrachowace tafle nastupajo transport strašnych maćiznow. Při kontroli jězbneje dowolnosće 32lětneho zwěsćichu, zo bě wona wotběžana. Sudobja so za transport wolija njehodźachu. Facit: Žana to dobra ideja.

Cłownicy su w Gottmadingenje blisko Konstanza minjeny tydźeń dwaj kilogramaj złota w kófrowym rumje awta namakali. 73lětny muž a jeho 72lětna mandźelska běštaj ze Šwicarskeje přijěłoj a poda­łoj, zo nimataj twory abo pjenjezy při sebi, kotrež měli so do toho přizjewić. Jako cłownicy awto přepruwowachu, złoto w hódnoće 106 000 eurow namakachu.

To a tamne (23.09.22)

Freitag, 23. September 2022 geschrieben von:

Pozdatne znjezboženje lětadła su wčera wjacori wobydlerjo w delnjosakskim Nettlingenje njedaloko Hildesheima wobkedźbowali a policiju informowali. Małe lětadło bě napadnje nisko lećało, so na bok chilało a so za štomami zhubiło. Wjacore wohnjowe wobory z něhdźe 50 čłonami, chorobne awto, tři policajske awta a dwaj helikopteraj so na to na městno njezboža podachu. Njezbožo pak wukopa so jako zwučowanje nuzoweho pada, policija zdźěli. Po nim wróći so pilot zaso na swoje domjace lětanišćo.

Nakładne awto z motorowej piłu na třěše je patrulja awtodróhoweje policije na awtodróze A113 pola Schönefelda južnje Berlina zadźeržała. Kaž policija zdźěla, bě piłu „drje něchtó zabył“. K tomu wozjewi wona fota w interneće, na kotrychž bě wona jasnje widźeć. Po tym, zo bě šofer nastroj zrumował, smědźeše dale jěć.

To a tamne (22.09.22)

Donnerstag, 22. September 2022 geschrieben von:

Při wobchadnych kontrolach na spočatku noweho šulskeho lěta w Sakskej je policija wjace hač 3 300 přeńdźenjow zwěsćiła. Najčasćišo su šoferojo wobmjezowanje spěšnosće ranili, nutřkowne mi­nisterstwo zdźěli. Na to su 2 170 šoferow z pokutu warnowali a 360 chłostankow wukazali. Kontrole trajachu tři tydźenje hač do 16. septembra.

Plantažu konopje na ležownosći klóštra su grjekscy policisća na kupje Kreta zapadnje přistawneho města Herakliona namakali, z wjace hač 1 100 rostlinami. Skućićeljo, za kotrymiž hišće pytaja, běchu płót přerězali a wulce profesionalnje puć za ćeknjenje a zastaranje twarili. Samo hat su zapołožili, zo móhli rostliny krjepić. Na kupje namakaja stajnje zaso plantaže konopje. Znjewužiwanje klóštra pak ludźi wosebje rozhorja. Skućićeljo běchu so jako putnicy wudawali.

To a tamne (21.09.22)

Mittwoch, 21. September 2022 geschrieben von:

K pruwowanskemu časej na lěto a pjeć měsacow je sudnistwo w badensko-württembergskim Donaueschingenje twarskeho předewzaćela zasudźiło, dokelž bě wón před lětom z bagrom fasadu noweho domu wobškodźił. Sudnistwo 48lětnemu přiliči, zo je swoju winu při­znał a so pola wobydlerjow domu zamołwił. Muž bě z wotpohladom wjacore balkony wottorhnył a při tym fasadu wobškodźił. Přičina bě zwada z twarskim knjezom nje­zapłaćenych zličbowankow dla.

Bjez prawniskich konsekwencow wostanje nócny wulět dweju muži w Braunschweigu – z tramwajku. Wobaj běštaj so do depota wobchadneho předewzaća zadobyłoj, z tramwajku jěłoj, so filmowałoj a ludźi sobu wzałoj. Statne rěčnistwo na to pokaza, zo njebě depot zawrjeny ani tramwajka zamknjena. Tež jězba njeje chłostajomna, wšako bě w nocy lědma wobchada.

To a tamne (20.09.22)

Dienstag, 20. September 2022 geschrieben von:

Za swojim ćeknjenym psom pyta ameriski model Paris Hilton. „Činju wšitko, štož móžu, zo bych jeho wróćo dóstała“, piše Hilton w interneće. Mjeztym je wona zwěrjaceho detektiwa, psyčeho trenarja a zwěrjaceho psychologu zasadźiła. Nětko chcedźa tež trutu wužiwać. Mały chihuahua „Diamond Baby“ bě před tydźenjom z bydlenja twochnył, jako durje wočinjene stejachu. Hilton swojich fanow prosy, při pytanju w Los Angelesu a wokolinje pomhać.

Při hriby pytanju w Drježdźanskej holi je so pjećlětny zabłudźił a tak swojeju staršeju zhubił. 33lětny widźeše po infor­macijach policije žałosćaceho hólca při busowym zastanišću w měšćanskim dźělu Hellerberge a wołaše policiju. Zastojnicy na to za staršimaj pytachu. Krótko po tym so wonaj telefonisce pola ­policije přizjewištaj a syna wotewzaštaj.

To a tamne (19.09.22)

Montag, 19. September 2022 geschrieben von:

Nachribjetnik z drogami je 22lětny na Braunschweigskim dwórnišću zabył – a sej jón pola policije zaso wotewzać chcył. Muž bě wčera rano pola policije zazwonił a so prašał, hač je něchtó wačok wotedał. Zastojnicy tole wobkrućichu a najprjedy raz do nachribjetnika pohladachu. Tam namakachu marihuanu a amphetaminy. Jako 22lětny na stražu přińdźe, njedósta drogi, ale skóržbu ranjenja zakonja wo wopojnych srědkach dla.

Hnydom dwójce w dołhim rynku čakacych před kašćom zemrěteje britiskeje kralowny Elizabeth II. so nastupił je ­Londonjan Sam Mason. Tole rjekny wón nowinarjam. Prěni króć čakaše wón dwanaće hodźin. Po krótkej přestawce, w kotrejž dowjeze awto do porjedźernje, so Mason rozsudźi so hišće raz nastupić. „To je wulki stawizniski podawk a chcych dźěl toho być“, wón rjekny.

To a tamne (16.09.22)

Freitag, 16. September 2022 geschrieben von:

Z kurioznym wustupom w tuchwilnym wólbnym boju w jednym z Neapelskich hosćencow je italski wonkowny minister Luigi Di Maio kedźbnosć zbudźił. 36lětny da so wot pinčnikow wuzběhnyć a „lećeše“ z rozpřestrětymaj rukomaj k hudźbje znateho filma „Dirty Dancing“ po hosćencu „da Nennella“, kiž je za tajke swojoraznosće znaty. Opozicija akciju wusměšuje. Po prognozach smě so opoziciski prawicarski zwjazk wólbneho dobyća nadźijeć.

Na wšě 1 500 litrow barby chcedźa nałožić, zo bychu sławny symbol Los Angelesa ponowili, hoberski napis „HOLLYWOOD“ w horach nad filmowej metropolu. Za ponowjenje objekta w přihotach k stolětnemu jubilejej su wjacore tydźenje zaplanowali. Nadměru wulke pismiki běchu 1923 prěni króć nastajili a 1949 ponowili. Symbol je wosebje mjez turistami woblubowana kulisa za selfije.

To a tamne (15.09.22)

Donnerstag, 15. September 2022 geschrieben von:

Po 142 lětach chcedźa w Šwicarskej kónc lěta ćišćanu telefonowu knihu doskónčnje wotstronić. Wot 2023 wozjewja priwatne telefoniske čisła jenož hišće internetnje, zdźěla zhotowjer knihow Localsearch w Zürichu. Dale a mjenje ludźi swoje priwatne čisła wozjewja, předewzaće informuje. Nimo toho ma dźeń a wjace ludźi jenož hišće mobilny telefon.

Za paduchami gullyjowych wěkow pyta policija w južnej Předpomorskej. Njeznaći běchu minjene dny wjace hač 20 tajkich železnych wěkow pokradnyli, policija w Pasewalku zdźěli. Potrjechene běchu wjacore dróhi w Penkunje, Krackowje a Bismarku njedaloko pólskeje mjezy. Policija namołwja šoferow k wosebitej kedźbnosći, dokelž móža pobrachowacych wěkow dla strašne dźěry nastać.

Anzeige